Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 14:1-72

14  Kutani paseka+ ni nkhuvo+ wa swinkwa leswo-ke-comela a swi ta va kona hi siku+ ra vumbirhi. Naswona vaprista lavakulu ni vatsari a va lava ndlela yo n’wi khoma hi rhengu ra vuxisi va n’wi dlaya;+  hikuva a va hamba va ku: “Ku nga ri enkhubyeni; swi nga ha endleka vanhu va pfuxa hasahasa.”+  Loko a ha ri eBetaniya endlwini ya Simoni lowa nhlokonho,+ a ha vurhame eswakudyeni, wansati a ta ni xikutsu xa alabasta xa mafurha yo nun’hwela, narda ya xiviri, yo durha swinene. A faya xikutsu xa alabasta xi pfuleka, a ma chela enhlokweni yakwe.+  A ku ri ni van’wana lava a va hlundzukile hikwalaho ka leswi: “Ha yini mafurha yo nun’hwela ma tlangisiwe hi ndlela leyi?+  Hikuva mafurha lawa yo nun’hwela a ma ta va ma xavisiwe hi tidenari to tlula 300 ti nyikiwa swisiwana!” Naswona a va vilela swinene hi wansati loyi.+  Kambe Yesu a ku: “Tshikani wansati loyi. Ha yini mi ringeta ku karhata wansati loyi? U ndzi endlele xiendlo lexinene.+  Hikuva swisiwana+ mi tshama mi ri na swona nkarhi hinkwawo, naswona rini na rini loko mi swi lava, mi nga swi endlela leswinene, kambe a mi na mina nkarhi hinkwawo.+  Wansati loyi u endle leswi a swi kotaka; u hlawule ku ndzi tota mafurha yo nun’hwela emirini wa mina ka ha ri emahlweni hi xikongomelo xa ku lahliwa ka mina.+  Ndzi tiyisile ndzi ri eka n’wina, Kun’wana ni kun’wana laha mahungu lamanene ma nga ta chumayeriwa kona emisaveni+ hinkwayo, leswi wansati loyi a swi endleke na swona swi ta vuriwa, a tsundzukiwa ha swona.”+ 10  Kutani Yudasi Iskariyota un’wana wa lava 12, a ya eka vaprista lavakulu leswaku a n’wi xenga eka vona.+ 11  Loko va swi twa, va tsaka naswona va n’wi tshembisa ku n’wi nyika mali ya silivhere.+ Kutani a sungula ku lava ndlela leyinene yo n’wi xenga.+ 12  Kutani hi siku ro sungula ra swinkwa leswo-ke-comela,+ leri hi ntolovelo va endlaka xitlhavelo xa gandzelo ra paseka ha rona, vadyondzisiwa+ vakwe va ku eka yena: “Xana u lava leswaku hi ya ku lunghisela kwihi laha u nga ta dyela kona paseka?”+ 13  Hiloko a rhuma vadyondzisiwa vakwe vambirhi a ku eka vona: “Yanani emutini, naswona mi ta hlangana ni munhu a rhwale khuwana ra mati.+ Mi n’wi landzela, 14  naswona laha a nga ta nghena kona, byelani n’wini wa yindlu mi ku, ‘Mudyondzisi u ri: “Ri kwihi kamara ra vaendzi ra mina leri ndzi nga dyelaka eka rona paseka+ ni vadyondzisiwa va mina?”’+ 15  U ta mi komba kamara lerikulu ra le henhla, ri lunghiseleriwile ri ri ni nhundzu; hi lunghiseleleni kwalaho.”+ 16  Kutani vadyondzisiwa va huma, va nghena emutini, va swi kuma swi ri hilaha a va byeleke hakona; kutani va lunghiselela paseka.+ 17  Nimadyambu, a ta ni lava 12.+ 18  Loko va ha vurhame etafuleni va ri eku dyeni, Yesu a ku: “Ndzi tiyisile ndzi ri eka n’wina, Un’wana wa n’wina, loyi a dyaka+ na mina, u ta ndzi xenga.”+ 19  Va sungula ku va ni gome naswona un’wana ni un’wana wa vona a ku eka yena: “A hi mina, a hi swona ke?”+ 20  A ku eka vona: “I un’wana wa lava 12, la nghenisaka voko na mina enkambaneni+ wun’we. 21  I ntiyiso, N’wana wa munhu wa famba, hilaha swi tsariweke hakona malunghana na yena, kambe u ni khombo munhu yoloye loyi N’wana wa munhu a xengiwaka ha yena! A swi ta va swinene ngopfu loko munhu yoloye a a nga velekiwanga.”+ 22  Loko va ri karhi va dya, a teka xinkwa, a nkhensa, a xi phema a va nyika, a ku: “Xi tekeni, leswi swi vula miri+ wa mina.” 23  A teka xinwelo, a nkhensa, a va nyika xona, hinkwavo va nwela eka xona.+ 24  Kutani a ku eka vona: “Leswi swi vula ‘ngati+ ya ntwanano’+ ya mina, leyi nga ta halateriwa+ vo tala.+ 25  Ndzi tiyisile ndzi ri eka n’wina, A ndzi nge he tlheli ndzi nwa leswi humaka emadiriveni ya vhinya ku fikela siku rero loko ndzi swi nwa hi vuntshwa emfun’weni wa Xikwembu.”+ 26  Eku heteleleni, loko va yimbelele marito yo dzunisa,+ va huma va ya eNtshaveni ya Mitlhwari.+ 27  Kutani Yesu a ku eka vona: “Hinkwenu mi ta khunguvanyeka, hikuva ku tsariwile, ‘Ndzi ta ba murisi,+ kutani tinyimpfu ti ta hangalaka hinkwako.’+ 28  Kambe loko ndzi pfuxiwile, ndzi ta mi rhangela ku ya eGaleliya.”+ 29  Kambe Petro a ku eka yena: “Hambiloko lavan’wana hinkwavo va nga khunguvanyeka, kambe mina a ndzi nge khunguvanyeki.”+ 30  Hiloko Yesu a ku eka yena: “Ndzi tiyisile ndzi ri eka wena, Namuntlha wena, ina, vusiku byolebyi, nkuku wu nga si ringa kambirhi, u ta ndzi ala kanharhu.”+ 31  Kambe a sungula ku vula hi ku tiyisa a ku: “Loko ndzi fanele ku fa na wena, a ndzi nge ku ali nikatsongo.” Ni lavan’wana hinkwavo va vula nchumu lowu fanaka.+ 32  Hiloko va fika endhawini leyi vuriwaka Getsemani, kutani a ku eka vadyondzisiwa vakwe: “Tshamani laha, ndza ha khongela.”+ 33  Hiloko a teka Petro na Yakobo na Yohane+ a famba na vona, kutani a sungula ku tshuka ni ku karhateka+ ngopfu. 34  Kutani a ku eka vona: “Moya-xiviri wa mina wu ni gome+ lerikulu, ku yisa eku feni. Tshamani laha mi hambeta mi rindza.”+ 35  A ya emahlweninyana, a wela ehansi a khongela a vula leswaku loko swi koteka, awara yoleyo yi hundza eka yena.+ 36  A ya emahlweni a ku: “Abba, Tatana,+ swilo hinkwaswo swa koteka eka wena; susa xinwelo lexi eka mina. Kambe ku nga vi hi ku lava ka mina, kambe a ku ve hi ku lava ka wena.”+ 37  Kutani a ta, a va kuma va etlele, a ku eka Petro: “Simoni, u etlele ke? Xana a wu vanga na ntamu wo tshama u rindzile awara yin’we?+ 38  Vavanuna, tshamani mi rindzile naswona mi khongela,+ leswaku mi nga ngheni endzingweni. Ina, moya wu ni mapfundza, kambe nyama yi tsanile.”+ 39  Hiloko a tlhelela a ya khongela, a vula marito lama fanaka.+ 40  Nakambe a vuya a va kuma va etlele, hikuva mahlo ya vona a ma tika, kutani a va nga swi tivi leswi a va ta n’wi hlamula swona.+ 41  A ta ra vunharhu kutani a ku eka vona: “Enkarhini lowu mi etlele, ma wisa! Swi ringene! Awara yi fikile!+ Maswivo! N’wana wa munhu wa xengiwa emavokweni ya vadyohi.+ 42  Pfukani, a hi fambeni.+ Maswivo! Muxengi wa mina u tshinele.”+ 43  Kutani hi ku hatlisa, loko a ha vulavula, Yudasi, un’wana wa lava 12, a fika a ri ni ntshungu wu ri ni mabanga ni michizo wu huma eka vaprista lavakulu ni vatsari ni vakulukumba.+ 44  Muxengi wakwe a a va nyike xikombiso lexi va twananeke ha xona, a ku: “Loyi ndzi nga ta n’wi ntswontswa, hi yena; n’wi khomeni mi famba na yena a hlayisekile.”+ 45  Hiloko a ta a n’wi kongomile, a n’wi tshinelela kutani a ku: “Rabi,” hiloko a n’wi ntswontswa+ swinene hi rirhandzu. 46  Kutani va yisa mavoko ya vona eka yena, va n’wi khoma.+ 47  Hambiswiritano, un’wana wa lava a va yime kwalaho ekusuhi a hlomula banga rakwe a khemba hlonga ra muprista lonkulu, a susa ndleve ya rona.+ 48  Kambe Yesu a va angula a ku: “Xana mi te eka mina ni mabanga ni michizo onge hi loko mi ta khoma xigevenga?+ 49  Siku ni siku a ndzi ri na n’wina etempeleni ndzi dyondzisa,+ kambe a mi ndzi khomanga. Nilokoswiritano, swa endleka leswaku ku ta hetiseka+ Matsalwa.”+ 50  Kutani hinkwavo va n’wi siya+ va baleka.+ 51  Kambe jaha rin’wana leri ambaleke nguvu ya ntsembyana wa risima emirini wa rona lowu nga ambexiwangiki ri n’wi landzela ekusuhi; kutani va ringeta ku ri khoma,+ 52  kambe ri siya nguvu ya rona ya ntsembyana ri tsutsuma ri nga ambalanga. 53  Kutani va yisa Yesu eka muprista lonkulu, hiloko vaprista hinkwavo lavakulu ni vakulukumba ni vatsari va hlengeletana.+ 54  Kambe Petro, a n’wi landzela+ a ri ekulenyana ku fika exivaveni xa muprista lonkulu; a a tshame ni valanguteri va yindlu a ri karhi a tinyawusa endzilweni lowu pfurhaka. 55  Hi nkarhi wolowo vaprista lavakulu ni Sanedri hinkwayo a va lava vumbhoni byo hehla Yesu leswaku va n’wi dlaya,+ kambe a va byi kumanga.+ 56  Hakunene, vo tala a va n’wi hehla hi vumbhoni bya mavunwa,+ kambe vumbhoni bya vona a byi nga twanani.+ 57  Nakambe, van’wana a va yima va n’wi hehla hi vumbhoni bya mavunwa va ku: 58  “Hi n’wi twe a ku, ‘Ndzi ta wisa tempele leyi leyi endliweke hi mavoko, kutani hi masiku manharhu ndzi ta aka yin’wana leyi nga endliwangiki hi mavoko.’”+ 59  Ni hi swivangelo leswi, vumbhoni bya vona a byi nga twanani. 60  Eku heteleleni muprista lonkulu a yima exikarhi ka vona, kutani a vutisa Yesu a ku: “Xana a wu anguli ha nchumu? Xana hi byihi vumbhoni lebyi lava va ku hehlaka ha byona?”+ 61  Hiloko a miyela a nga anguli nchumu.+ Nakambe muprista lonkulu a n’wi vutisa a ku: “Xana hi wena Kreste N’wana wa La Dzunekaka?”+ 62  Hiloko Yesu a ku: “Ndzi yena; kutani n’wina mi ta vona N’wana wa munhu+ a tshame evokweni ra xinene+ ra matimba naswona a ta hi mapapa ya tilo.”+ 63  Hikwalaho ka leswi muprista lonkulu a handzula tinguvu+ takwe ta le ndzeni kutani a ku: “Xana ha ha ti lavela yini timbhoni?+ 64  Mi xi twile xisandzu.+ Mi swi vonisa ku yini?” Hinkwavo va n’wi gweva leswaku u lulameriwa hi rifu. 65  Kutani van’wana va sungula ku n’wi tshwutelela+ ni ku funengeta xikandza xakwe hinkwaxo va n’wi ba hi swibakela, va ku eka yena: “Profeta!” Naswona vatirhi va le hubyeni va n’wi makala exikandzeni, va n’wi teka.+ 66  Loko Petro a ha ri ehansi exivaveni, nandza un’wana wa xisati wa muprista lonkulu a fika,+ 67  loko a vona Petro a tinyawuxa, a n’wi languta hi ku kongoma, a ku: “Na wena, a wu ri na Munazareta, Yesu+ loyi.” 68  Kambe a landzula, a ku: “A ndzi n’wi tivi ni leswi u swi vulaka a ndzi swi twisisi,” kutani a huma a ya enyangweni.+ 69  Kwalaho nandza wa xisati, loko a n’wi vona, a sungula ku byela lava a va yime ekusuhi a ku: “Loyi i un’wana wa vona.”+ 70  A tlhela a landzula. Nakambe endzhakunyana lava a va yime ekusuhi va ku eka Petro: “Hakunene u un’wana wa vona, hikuva, entiyisweni, u Mugaleliya.”+ 71  Kambe a sungula ku hlambanya ni ku tiyisa+ a ku: “A ndzi n’wi tivi munhu loyi mi vulavulaka ha yena.”+ 72  Hi ku hatlisa nkuku wu ringa ra vumbirhi;+ kutani Petro a tsundzuka marito lawa Yesu a n’wi byeleke wona: “Nkuku wu nga si ringa kambirhi, u ta ndzi ala kanharhu.”+ Kutani a hela matimba, a rila.+

Tinhlamuselo ta le hansi