Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 11:1-33

11  Loko va ri karhi va tshinela eYerusalema, eBetefage ni le Betaniya+ eNtshaveni ya Mitlhwari, a rhuma vadyondzisiwa+ vakwe vambirhi  a va byela a ku: “Yanani eximutanini lexi mi langutaneke na xona, kutani loko ma ha ku nghena eka xona mi ta kuma ximbhongolwana xi tsimbiwile, lexi ku nga riki na munhu la nga tshama a xi gada; xi ntshunxeni mi xi tisa.+  Naswona loko un’wana a ku eka n’wina, ‘Ha yini mi endla leswi?’ mi ku, ‘Hosi ya xi lava, yi ta hatlisa yi xi vuyisa.’”+  Hiloko va famba kutani va kuma ximbhongolwana xi tsimbiwile enyangweni, ehandle exitarateni xa le tlhelo, kutani va xi ntshunxa.+  Kambe van’wana va lava a va yime kwalaho va sungula ku va vutisa va ku: “Xana mi xi ntshunxela yini ximbhongolwana+ lexi?”  Hiloko va va byela hilaha Yesu a vuleke hakona; kutani va va tshika va famba.+  Hiloko va tisa ximbhongolwana+ eka Yesu, va kapeka tinguvu ta vona ta le handle eka xona, kutani a xi gada.+  Nakambe, vo tala va andlala tinguvu+ ta vona ta le handle egondzweni, kambe van’wana va tsema switluka+ emasin’wini.+  Lava a va rhangile ni lava a va ta hi le ndzhaku a va hambeta va huwelela va ku: “Ha khongela,+ n’wi ponise! U katekile loyi a taka hi vito+ ra Yehovha! 10  Wu katekile mfumo lowu taka wa tata wa hina Davhida!+ Ha khongela, n’wi ponise, wena la nge henhla-henhla!” 11  Kutani a nghena eYerusalema, etempeleni; a rhalarhala swilo hinkwaswo, naswona, leswi nkarhi a wu fambile, a huma a ya eBetaniya ni lava 12.+ 12  Siku leri tlhandlamaka, loko va humile eBetaniya, a khomiwa hi ndlala.+ 13  Kutani a vona nkuwa lowu nga ni matluka a ri ekule, a ya kona a ya languta loko kumbexana a ta kuma swo karhi eka wona. Kambe, loko a fika eka wona, a nga kumanga nchumu loko ku nga ri matluka ntsena, hikuva a ku nga ri nguva ya makuwa.+ 14  Hiloko a wu angula a ku: “Ku nga ha tshuki ku va ni loyi a dyaka mihandzu eka wena hi masiku.”+ Naswona vadyondzisiwa vakwe a va yingiserile. 15  Kutani va fika eYerusalema. Kwalaho a nghena etempeleni kutani a sungula ku hlongola lava xavisaka ni lava xavaka etempeleni, a wisetela matafula ya vacinci va mali ni switshamo swa lava xavisaka matuva;+ 16  naswona a nga pfumelelanga munhu ku tsemakanya etempeleni a rhwele xanchumu, 17  kambe a ya emahlweni a dyondzisa a ku: “Xana a ku tsariwanga leswaku, ‘Yindlu ya mina yi ta vuriwa yindlu ya xikhongelo+ ya matiko+ hinkwawo’? Kambe n’wina mi yi endle bako ra swigevenga.”+ 18  Kutani vaprista lavakulu ni vatsari va swi twa, va sungula ku lava ndlela yo n’wi dlaya;+ hikuva a va n’wi chava, naswona ntshungu hinkwawo a wu hlamarisiwa hi ku dyondzisa+ ka yena. 19  Loko siku ri ya eku heleni, va huma emutini. 20  Kambe loko va hundza hi kona nimixo swinene, va vona nkuwa wu vunile ku sukela etimitswini.+ 21  Kutani Petro a wu tsundzuka, a ku: “Rabi, waswivo, nkuwa lowu u wu rhukaneke wu vunile.”+ 22  Yesu a va angula a ku: “Vanani ni ripfumelo eka Xikwembu. 23  Ndzi tiyisile ndzi ri eka n’wina, hambi ku ri mani la byelaka ntshava leyi a ku, ‘Simuka u ya nghena elwandle,’ naswona a nga kanakani embilwini yakwe kambe a ri ni ripfumelo ra leswaku leswi a swi vulaka swi ta humelela, u ta endleriwa swona.+ 24  Hi yona mhaka leyi ndzi mi byelaka leswaku, Swilo hinkwaswo leswi mi swi khongelelaka ni ku swi kombela, vanani ni ripfumelo ra leswaku ana se mi swi amukerile hi xiviri, kutani mi ta swi kuma.+ 25  Naswona loko mi yima mi khongela, rivalelani+ xin’wana ni xin’wana lexi mi solaka van’wana ha xona; leswaku Tata wa n’wina la nge matilweni na yena a ta mi rivalela swivi+ swa n’wina.” 26  —— 27  Kavaloko va tlhelela eYerusalema. Kutani loko a ri karhi a famba etempeleni, vaprista lavakulu ni vatsari ni vakulukumba va ta eka yena+ 28  kutani va ku eka yena: “U swi endla hi matimba wahi swilo leswi? kumbe i mani la ku nyikeke matimba yo endla swilo leswi?”+ 29  Yesu a ku eka vona: “Ndzi ta mi vutisa xivutiso xin’we. Loko mi ndzi hlamula, na mina ndzi ta mi byela matimba lawa ndzi endlaka swilo leswi ha wona.+ 30  Xana nkhuvulo+ wa Yohane a wu huma etilweni kumbe a wu huma evanhwini? Ndzi hlamuleni.”+ 31  Kutani va sungula ku kanela va ri voxe, va ku: “Loko hi ku, ‘A wu huma etilweni,’ u ta ku, ‘Ha yini mi nga n’wi kholwanga?’+ 32  Kambe, xana hi nga ku, ‘A wu huma evanhwini’?”—A va chava ntshungu, hikuva hinkwawo a wu pfumela leswaku Yohane hakunene a a ri muprofeta.+ 33  Ina, va angula Yesu va ku: “A hi tivi.” Kutani Yesu a ku eka vona: “Na mina a ndzi mi byeli matimba lawa ndzi endlaka swilo leswi ha wona.”+

Tinhlamuselo ta le hansi