Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 1:1-45

1  Ku sungula ka mahungu lamanene malunghana na Yesu Kreste:  Hilaha swi tsariweke hakona hi Esaya lowa muprofeta: “(Waswivo! Ndzi rhuma murhumiwa wa mina emahlweni ka wena, la nga ta ku lunghiselela ndlela;)+  yingisani, un’wana wa huwelela emananga, ‘Lunghiselelani ndlela ya Yehovha, endlani magondzo yakwe ma lulama,’”+  Yohane lowo khuvula u humelele emananga, a chumayela nkhuvulo wu ri lowu fanekiselaka ku hundzuka ka ku rivaleriwa ka swidyoho.+  Hikwalaho tiko hinkwaro ra Yudiya ni vaaki hinkwavo va Yerusalema va hume va ya eka yena, naswona u va khuvule eNambyeni wa Yordani, va vula swidyoho swa vona erivaleni.+  Yohane a a ambala voya bya kamela, a tikhama hi vamba ra dzovo emasengeni,+ naswona a a dya tinjiya+ ni vulombe bya nhova.+  A a chumayela, a ku: “Endzhaku ka mina ku ta la ndzi tlulaka hi matimba; a ndzi faneleki ku korhama ndzi ntshunxa tingoti ta maphaxani yakwe.+  Mina ndzi mi khuvula hi mati, kambe yena u ta mi khuvula hi moya lowo kwetsima.”+  Siku rin’wana Yesu a ta a huma eNazareta wa Galeliya kutani a khuvuriwa eYordani hi Yohane.+ 10  Hi ku hatlisa loko a huma ematini u vone matilo ma avana, kutani moya wu xikela ehenhla ka yena ku fana ni tuva;+ 11  rito ri huma ematilweni: “U N’wana wa mina, la rhandzekaka; ndzi ku amukerile.”+ 12  Xikan’we-kan’we moya wu n’wi susumetela ku ya emananga.+ 13  Hiloko a tshama emananga masiku ya 40,+ a ringiwa hi Sathana,+ naswona a a tshama ni swivandzana, kambe tintsumi a ti n’wi tirhela.+ 14  Endzhaku ka loko Yohane a khomiwile, Yesu a ya eGaleliya,+ a chumayela mahungu lamanene ya Xikwembu+ 15  a ku: “Nkarhi lowu vekiweke wu hetisekile,+ naswona mfumo wa Xikwembu wu tshinele. Hundzukani,+ mi va ni ripfumelo eka mahungu lamanene.” 16  Loko a ha famba etlhelo ka lwandle ra Galeliya, a vona Simoni+ na Andriya makwavo wa Simoni va hoxa tinkoka ta vona elwandle, hikuva a va ri vaphasi va ti-nhlampfi.+ 17  Kutani Yesu a ku eka vona: “Ndzi landzeleni, ndzi ta mi endla vaphasi va vanhu.”+ 18  Xikan’we-kan’we va tshika tinkoka ta vona va n’wi landzela.+ 19  Loko a ya emahlweninyana, a vona Yakobo n’wana wa Zebediya na Yohane makwavo, entiyisweni, a va ri ebyatsweni bya vona va ri karhi va lunghisa tinkoka ta vona;+ 20  xikan’we-kan’we a va vitana. Hiloko va siya tata wa vona Zebediya ebyatsweni a ri ni vanhu lava thoriweke, vona va famba va n’wi landzela. 21  Kutani va khoma ndlela ya vona va ya eKapernawume.+ Kuteloko ku va savata a nghena esinagogeni, a sungula ku dyondzisa. 22  Kutani va hlamarisiwa hi ndlela yakwe yo dyondzisa,+ hikuva kwalaho a a va dyondzisa kukota munhu la nga ni vulawuri, ku nga ri kukota vatsari.+ 23  Nakambe, hi nkarhi wolowo a ku ri ni munhu loyi a a ri ni moya lowu nga basangiki esinagogeni ya vona, a huwelela,+ 24  a ku: “Xana hi ni mhaka yihi na wena, wena Yesu, Munazareta?+ Xana u tele ku ta hi lovisa? Ndzi swi tiva+ kahle leswaku u mani, u Mukwetsimi+ wa Xikwembu.”+ 25  Kambe Yesu a wu tshinya, a ku: “Miyela, huma eka yena!”+ 26  Kutani moya lowu nga basangiki, loko wu n’wi rhurhumelisile naswona wu huwelele hi rito leri tlakukeke, wu huma eka yena.+ 27  Hiloko vanhu hinkwavo va hlamala lerova va sungula ku kanerisana hi xivona, va ku: “I yini leswi? I dyondzo leyintshwa! Hi matimba u lerisa hambi ku ri mimoya leyi nga basangiki, naswona ya n’wi yingisa.”+ 28  Xisweswo ndhuma ya yena yi hangalaka hi ku hatlisa ematlhelweni hinkwawo etikweni hinkwaro ra Galeliya.+ 29  Hi ku hatlisa va huma esinagogeni va ya ekaya ra Simoni+ na Andriya va ri na Yakobo na Yohane. 30  Kasi mana+ wa nsati wa Simoni a a etlele ehansi a karhatiwa hi ku hisa ka miri,+ xikan’we-kan’we va n’wi byela ha yena. 31  Kutani a ya eka yena a n’wi pfuxa a n’wi khoma hi voko; ku hisa ka miri ku n’wi sukela,+ hiloko wansati loyi a sungula ku va tirhela.+ 32  Nimadyambu, endzhaku ka ku pela ka dyambu, vanhu va sungula ku n’wi tisela hinkwavo lava vabyaka+ ni lava va nga ni madimona;+ 33  naswona muti hinkwawo a wu hlengeletane enyangweni. 34  Kutani a hanyisa vo tala lava a va khomiwe hi mavabyi yo hambana-hambana,+ naswona a hlongola madimona yo tala, kambe a a nga ma pfumeleli madimona leswaku ma vulavula, hikuva a ma n’wi tiva leswaku i Kreste.+ 35  Kutani nimixo swinene, loko ka ha ri ni munyama, a pfuka a humela ehandle, a suka a ya enhoveni,+ kutani a sungula ku khongela+ a ri kwale. 36  Hambiswiritano, Simoni ni lava a va ri na yena va famba va n’wi lava 37  ivi va n’wi kuma, kutani va ku eka yena: “Hinkwavo va lava wena.” 38  Kambe a ku eka vona: “A hi yeni kun’wanyana, emadorobeni ya muti lowu nga ekusuhinyana, leswaku ndzi ta chumayela+ na kona, hikuva ndzi hume hi xikongomelo xexo.”+ 39  Hiloko a famba, a ya chumayela emasinagogeni ya vona etikweni hinkwaro ra Galeliya naswona a hlongola madimona.+ 40  Kwalaho ni wa nhlokonho a ta eka yena, a n’wi kombela a nkhinsame hi matsolo, a ku eka yena: “Loko u swi lava, u nga ndzi basisa.”+ 41  Hikwalaho ka sweswo a n’wi twela vusiwana,+ kutani a tshambuluta voko rakwe a n’wi khumba, a ku eka yena: “Ndza swi lava. Basisiwa.”+ 42  Hi ku hatlisa nhlokonho yi nyamalala eka yena, ivi a basa.+ 43  Ku tlula kwalaho, a n’wi lerisa hi matimba kutani a n’wi tlherisa xikan’we-kan’we, 44  a ku eka yena: “Tiyiseka leswaku a ku na munhu loyi u n’wi byelaka xanchumu, kambe famba u ya tikombisa eka muprista+ kutani u nyikela swa ku basisiwa ka wena leswi Muxe a swi leriseke,+ leswaku byi va vumbhoni eka vona.”+ 45  Kambe loko a fambile, munhu loyi a sungula ku swi huwelela ngopfu ni ku hangalasa mhaka leyi hinkwako-nkwako, lerova Yesu a a nga ha swi koti ku nghena emutini vanhu va n’wi langutile, kambe a a tshama enhoveni. Kambe a va hamba va ta eka yena va huma ematlhelweni hinkwawo.+

Tinhlamuselo ta le hansi