Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Luka 8:1-56

8  Endzhakunyana ka sweswo a famba hi muti ni muti ni hi ximutana ni ximutana, a chumayela ni ku vula mahungu lamanene ya mfumo wa Xikwembu.+ Naswona lava 12 a va ri na yena,  ni vavasati+ van’wana lava hanyisiweke emimoyeni yo homboloka ni le mavabyini, Mariya loyi a vuriwaka Magadala, loyi madimona ya nkombo ma humeke eka yena,+  na Yowana+ nsati wa Khuza, wanuna la langutelaka Heroda, na Suzana ni vavasati van’wana vo tala, lava a va va tirhela hi leswi nga swa vona.  Kuteloko ntshungu lowukulu wu hlengeletane swin’we ni lava a va ya eka yena va huma emitini, a vulavula hi ku tirhisa xifaniso:+  “Muhaxi u humile a ya haxa mbewu yakwe. Kambe, loko a ri karhi a haxa, yin’wana ya yona yi wela etlhelo ka gondzo, yi kandziyeriwa, kutani tinyenyana ta tilo ti yi dya hinkwayo.+  Yin’wana yi wela ehenhla ka ribye lerikulu, kuteloko yi mirile, yi oma hikwalaho ka ku pfumala ndzhongo.+  Yin’wana yi wela exikarhi ka mitwa, kutani mitwa leyi kuleke swin’we na yona yi yi kamanyeta.+  Yin’wana yi wela emisaveni leyinene, kuteloko yi mirile, yi humesa mihandzu leyi phindhiweke ka 100.”+ Loko a ri karhi a vula swilo leswi, a huwelela a ku: “Loyi a nga ni tindleve ta ku yingisa, a a yingise.”+  Kambe vadyondzisiwa vakwe va sungula ku n’wi vutisa leswi xifaniso lexi xi nga ha vaka xi vula swona.+ 10  A ku: “N’wina mi nyikiwe ku twisisa swihundla swo kwetsima swa mfumo wa Xikwembu, kambe lavan’wana hinkwavo va byeriwa swona hi ku tirhisa swifaniso,+ leswaku, hambiloko va languta, va languta va nga voni nchumu naswona, hambiloko va twa, va nga yi kumi nhlamuselo ya kona.+ 11  Kutani xifaniso+ xi vula leswi: Mbewu i rito ra Xikwembu.+ 12  Leyi nga etlhelweni ka gondzo hi lava va tweke,+ kutani Diyavulosi+ a ta a susa rito etimbilwini ta vona leswaku va nga pfumeli, va ta ponisiwa.+ 13  Leyi nga eribyeni lerikulu hi lava loko va ri twa, va amukelaka rito hi ntsako, kambe a va na rimitsu; va pfumela nkarhi wo karhi, kambe hi nguva ya ku ringiwa va wa.+ 14  Loko ku ri leyi nga wela exikarhi ka mitwa, vona hi lava va tweke, kambe, hi ku hluriwa hi ku karhateka, rifuwo ni ntsako+ wa vutomi lebyi, va kamanyetiwa hi ku helela naswona a ku na lexi va xi hetisisaka.+ 15  Loko ku ri leyi nga emisaveni leyinene, hi lava, endzhaku ko twa rito hi mbilu yo xonga,+ leyinene, va ri hlayisaka ivi va veka mihandzu hi ku tiyisela.+ 16  “A nga kona loyi, loko a lumeke rivoni, a ri khubumetaka hi xibya kumbe a ri vekaka ehansi ka mubedo, kambe u ri veka ehenhla ka xo tlhandleka rivoni, leswaku lava nghenaka va vona ku vonakala.+ 17  Hikuva a ku na nchumu lexi fihliweke+ lexi nga ta ka xi nga voniwi, hambi ku ri yini lexi nga tumbetiwa hi vukheta lexi nga ta ka xi nga tiviwi ni ku ka xi nga vi erivaleni.+ 18  Hikokwalaho, nyikelani nyingiso eka ndlela leyi mi yingisaka ha yona; hikuva un’wana ni un’wana la nga ni swo karhi, u ta nyikiwa+ leswi engetelekeke, kambe loyi a nga riki na nchumu, u ta tekeriwa ni leswi a anakanyaka leswaku u na swona.”+ 19  Kutani mana wakwe ni vamakwavo+ va ta eka yena, kambe a va nga swi koti ku fika eka yena hikwalaho ka ntshungu.+ 20  Hambiswiritano, va n’wi vikele va ku: “Mana wa wena ni vamakwenu va yime hala handle va lava ku ku vona.”+ 21  A va angula a ku: “Mana wa mina ni vamakwerhu hi lava va twaka rito ra Xikwembu va ri endla.”+ 22  Eka rin’wana ra masiku yena ni vadyondzisiwa vakwe va nghena ebyatsweni, a ku eka vona: “A hi peleleni etlhelweni lerin’wana ra tiva.” Kutani va sungula ku tluta.+ 23  Kambe loko va ri karhi va tluta, a khomiwa hi vurhongo. Kutani xidzedze xa matimba xi xikela etiveni, va sungula ku taleriwa hi mati ni ku va ekhombyeni.+ 24  Hiloko va hetelela va ya eka yena va n’wi pfuxa, va ku: “Muleteri, Muleteri, ha lova!”+ Eku pfukeni kakwe, a tshinya+ mheho ni ku kariha ka mati, kutani ma hunguteka, ku va ni ku rhula. 25  Kutani a ku eka vona: “Ripfumelo ra n’wina ri kwihi?” Kambe hi ku khomiwa hi ku chava, va hlamala, va byelana va ku: “Kahle-kahle loyi i mani, hikuva u lerisa hambi timheho ni mati, swi vuya swi n’wi yingisa?”+ 26  Kutani va hambukela eribuweni etikweni ra Vagerasa, leri nga entsungeni wa Galeliya.+ 27  Kambe loko a xikela esaveni wanuna un’wana wa muti loyi a a ri ni madimona a hlangana na yena. Kutani a swi endla nkarhi wo leha a nga ambali swiambalo, naswona a a nga tshami ekaya, a a tshama exikarhi ka masirha-bako.+ 28  Kuteloko a vona Yesu, a huwelela hi matimba a wela ehansi emahlweni ka yena, u vule hi rito lerikulu a ku: “Xana ndzi ni mhaka yihi na wena,+ wena Yesu N’wana wa Xikwembu Lexi nge Henhla-henhla? Ndza ku kombela, u nga ndzi xanisi.”+ 29  (Hikuva a a lerisa moya lowu nga basangiki leswaku wu huma eka munhu loyi. A wu n’wi khome swi tiya+ nkarhi wo leha, naswona a a tshama a bohiwe hi tinketana ni tinsimbi a rindziwile, kambe a a tshova swiboho sweswo kutani dimona ri n’wi yisa enhoveni.) 30  Yesu a n’wi vutisa: “Hi wena mani vito ra wena?” Yena ku: “Ndzi Vandla,” hikuva a a ngheniwe hi madimona yo tala.+ 31  Kutani ma hambeta ma n’wi kombela+ ku ka a nga ma lerisi leswaku ma ya ekheleni+ ro enta. 32  Kutani ntlhambi lowukulu wa tinguluve+ a wu dya kwalaho entshaveni; ma n’wi kombela leswaku a ma pfumelela ku nghena eka tona.+ Kutani a ma pfumelela. 33  Hiloko madimona ma huma eka munhu loyi ma nghena etingulubyeni, ntlhambi wu tsutsuma wu wela eriweni etiveni wu nwela.+ 34  Kambe loko varisi va vona leswi endlekeke, va baleka va ya swi vika emutini ni le mantanghaleni.+ 35  Kutani vanhu va ta ku ta vona leswi endlekeke, va fika eka Yesu va kuma munhu loyi madimona ma humeke eka yena, a ambarile naswona a hanye kahle emianakanyweni, a tshame hi le milengeni ya Yesu; hiloko va khomiwa hi ku chava.+ 36  Lava va swi voneke va va vikela hilaha munhu loyi a a ri ni madimona a hanyisiweke hakona.+ 37  Kutani vunyingi hinkwabyo lebyi humaka emugangeni wa Vagerasa byi n’wi kombela leswaku a suka eka byona, hikuva a byi khomiwe hi ku chava+ lokukulu. Kutani a ya khandziya byatso a famba. 38  Hambiswiritano, wanuna loyi madimona ma humeke eka yena a hambeta a kombela ku famba na yena; kambe a tlherisa wanuna loyi, a ku:+ 39  “Khoma ndlela u tlhelela ekaya, naswona u hambeta u rungula swilo leswi Xikwembu xi ku endleleke swona.”+ Hi ku pfumelelana ni sweswo a famba, a huwelela emutini hinkwawo swilo leswi Yesu a n’wi endleleke swona.+ 40  Loko Yesu a vuya, ntshungu wu n’wi amukela hi musa, hikuva hinkwavo a va n’wi languterile.+ 41  Kambe, waswivo, ku ta wanuna la vuriwaka Yayiro, wanuna loyi a a ri ndhuna leyi ungamelaka sinagoga. Kutani a wela emilengeni ya Yesu ivi a n’wi kombela leswaku a nghena endlwini+ yakwe, 42  hikuva a a ri ni n’wana wa nhwanyana la tswariweke a ri swakwe wa malembe ya kwalomu ka 12 hi vukhale naswona a ri kusuhi ni ku fa.+ Loko a famba mintshungu yi n’wi kamanyeta.+ 43  Kutani wansati loyi a a khomiwe hi vuvabyi byo khuluka ngati+ ku ringana malembe ya 12, loyi a nga kotangiki ku kuma munhu wa ku n’wi hanyisa,+ 44  a ta hi le ndzhaku a fika a khumba dziva+ ra nguvu+ yakwe ya le handle, kutani hi ku hatlisa vuvabyi byakwe byo khuluka ngati byi hela.+ 45  Kutani Yesu a ku: “I mani loyi a nga ndzi khumba?”+ Loko hinkwavo va landzula, Petro a ku: “Muleteri, mintshungu ya ku mumela ni ku ku kamanyeta.”+ 46  Kambe Yesu a ku: “Ku ni loyi a nga ndzi khumba, hikuva ndzi twe matimba+ ma huma eka mina.”+ 47  Loko wansati a xiya leswaku u voniwile, a ta a ri karhi a rhurhumela a wela ehansi emahlweni ka yena kutani a paluxa emahlweni ka vanhu hinkwavo xivangelo xa ku n’wi khumba ka yena ni ndlela leyi a horisiweke ha yona hi ku hatlisa.+ 48  Kambe a ku eka wansati loyi: “N’wananga, ripfumelo ra wena ri ku hanyisile;+ famba hi ku rhula.”+ 49  Loko a ha vulavula, muyimeri un’wana wa ndhuna leyi ungamelaka sinagoga a ta, a ku: “N’wana wa wena wa nhwanyana u file; u nga ha n’wi karhati mudyondzisi.”+ 50  Loko a twa leswi, Yesu a n’wi hlamula: “U nga chavi, ntsena kombisa ripfumelo,+ kutani yena u ta ponisiwa.” 51  Loko a fika endlwini a nga pfumelelanga munhu a nghena na yena handle ka Petro na Yohane na Yakobo ni tata ni mana wa nhwanyana loyi.+ 52  Kambe vanhu hinkwavo a va rila ni ku tiba hi gome hikwalaho ka yena. Kutani a ku: “Tshikani ku rila,+ hikuva a nga fanga kambe u lo etlela.”+ 53  Hiloko va sungula ku n’wi hleka hi ku hlekula, hikuva a va swi tiva leswaku u file.+ 54  Kambe a n’wi khoma hi voko a vitana, a ku: “Nhwanyana, pfuka!”+ 55  Kutani moya+ wakwe wu vuya, a pfuka+ hi ku hatlisa, yena a lerisa leswaku a nyikiwa xo karhi a dya.+ 56  Kunene, vatswari vakwe a va nga tikoti; kambe a va lerisa leswaku va nga byeli munhu leswi endlekeke.+

Tinhlamuselo ta le hansi