Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Luka 4:1-44

4  Kutani Yesu, a tale moya lowo kwetsima, a suka eYordani, a yisiwa hi moya emananga+  ku ringana masiku+ ya 40, a ri karhi a ringiwa+ hi Diyavulosi. Naswona, a nga dyanga nchumu emasikwini wolawo, kutani loko ma herile, a khomiwa hi ndlala.  Hikwalaho ka sweswo Diyavulosi a ku eka yena: “Loko u ri n’wana wa Xikwembu, byela ribye leri leswaku ri hundzuka xinkwa.”  Kambe Yesu a n’wi angula: “Ku tsariwile, ‘Munhu a nga fanelanga a hanya hi xinkwa ntsena.’”+  Kutani a n’wi tlhandlukisa, a n’wi komba mimfumo hinkwayo ya misava leyi akiweke, hi xinkarhana;  Diyavulosi a ku eka yena: “Ndzi ta ku nyika vulawuri+ lebyi hinkwabyo ni ku vangama ka byona, hikuva byi nyikiwe mina, naswona ndzi byi nyika hambi ku ri mani loyi ndzi rhandzaka ku n’wi nyika byona.+  Hikokwalaho, loko wena wo nkhinsama+ u ndzi gandzela, byi ta va bya wena hinkwabyo.”  Yesu a n’wi angula a ku: “Ku tsariwile, ‘U fanele ku gandzela Yehovha Xikwembu+ xa wena, naswona u fanele ku endlela yena ntsena ntirho wo kwetsima.’”+  Hiloko a n’wi yisa eYerusalema kutani a n’wi yimisa exihlungweni+ xa tempele kutani a ku eka yena: “Loko u ri n’wana wa Xikwembu, suka u tilahlela ehansi;+ 10  hikuva ku tsariwile, ‘Xi ta lerisa tintsumi ta xona malunghana na wena, leswaku ti ku hlayisa,’+ 11  kutani, ‘Ti ta ku khawulela hi mavoko, leswaku nenge wa wena wu nga tshuki wu hima ribye.’”+ 12  Yesu a n’wi hlamula a ku: “Ku vuriwile, ‘U nga tshuki u ringa Yehovha Xikwembu xa wena.’”+ 13  Kutani Diyavulosi, loko a hete ndzingo hinkwawo, a n’wi sukela ku fikela nkarhi wun’wana lowu fanelekaka.+ 14  Kutani Yesu a vuyela eGaleliya+ hi matimba ya moya. Naswona ndhuma yakwe leyinene yi hangalaka emugangeni+ hinkwawo wa le kusuhi. 15  Nakambe, a sungula ku dyondzisa emasinagogeni ya vona, hinkwavo va n’wi xixima.+ 16  Kutani a ta eNazareta,+ laha a nga kulela kona; hi ku ya hi ntolovelo wakwe hi siku ra savata, a nghena esinagogeni,+ a suka a yima leswaku a hlaya. 17  Kutani a nyikiwa buku-nsongwa ya muprofeta Esaya, ivi a pfula buku-nsongwa, a kuma ndhawu leyi a ku tsariwe leswi: 18  “Moya+ wa Yehovha wu le henhla ka mina, hikuva u ndzi tote leswaku ndzi vula mahungu lamanene eka swisiwana, u ndzi rhume leswaku ndzi chumayela ku ntshunxiwa ka makhumbi ni ku endliwa ka lava feke mahlo leswaku va tlhela va vona, ku ntshunxa lava tshikeleriweke va tifambela,+ 19  ku chumayela lembe ra Yehovha ra ku amukeriwa.”+ 20  Endzhaku ka sweswo a songa buku-nsongwa, a yi tlherisela eka mulanguteri ivi a tshama ehansi; mahlo ya hinkwavo lava a va ri esinagogeni a ma n’wi honolerile. 21  Kutani a va byela a ku: “Namuntlha tsalwa leri ma ha ku ri twaka ri hetisekile.”+ 22  Hinkwavo va sungula ku nyika vumbhoni lebyinene malunghana na yena ni ku hlamarisiwa hi marito+ lamanene lama humaka enon’wini wakwe, naswona a va vula va ku: “Loyi i n’wana wa Yosefa, a swi tano ke?”+ 23  Hikwalaho ka sweswo a ku eka vona: “Handle ko kanakana xifaniso lexi mi ta xi tirhisa eka mina, ‘N’anga,+ tihanyise; swilo+ leswi hi tweke leswaku swi endlekile eKapernawume+ swa endleka ni laha tikweni+ ra rikwenu.’” 24  Kambe a ku: “Ndzi tiyisile ndza mi byela leswaku ku hava muprofeta loyi a amukeriwaka etikweni ra rikwavo. 25  Hi xikombiso, ndzi mi byela ntiyiso, A ku ri ni tinoni to tala eIsrayele emasikwini ya Eliya, loko matilo ma pfariwe malembe manharhu ni tin’hweti ta tsevu, lerova ndlala leyikulu yi wela tiko hinkwaro,+ 26  kambe Eliya a nga rhumiwanga ni le ka un’we wa vavasati volavo, kambe u rhumiwe ntsena eka noni le Sarepta+ etikweni ra Sidoni. 27  Nakambe, a ku ri ni vo tala va nhlokonho eIsrayele hi nkarhi wa Elixa lowa muprofeta, kambe a nga kona ni un’we wa vona loyi a basisiweke, loko ku nga ri Namani munhu wa le Siriya.”+ 28  Kutani hinkwavo lava tweke swilo leswi esinagogeni va hlundzuka+ ngopfu; 29  va suka va yima, va n’wi tsutsumisela ehandle ka muti, kutani va n’wi yisa enhlohlorhini ya ntshava leyi muti wa vona a wu akiwe ehenhla ka yona, ku endlela leswaku va ta n’wi cukumetela ehansi hi nhloko.+ 30  Kambe a tsemakanya exikarhi ka vona, a ya emahlweni ni ndlela yakwe.+ 31  Kutani a rhelela a ya eKapernawume,+ muti wa Galeliya. Naswona a a va dyondzisa hi savata; 32  kutani va hlamarisiwa hi ndlela yakwe yo dyondzisa,+ hikuva ku vulavula kakwe a ku ri ni vulawuri.+ 33  Kutani esinagogeni a ku ri ni munhu loyi a a ri ni moya,+ ku nga dimona leri nga basangiki, naswona a a huwelela hi rito lerikulu: 34  “Aa! Xana hi ni mhaka yihi na wena,+ wena Yesu, Munazareta?+ Xana u tele ku ta hi lovisa? Ndzi swi tiva+ kahle leswaku u mani, u Mukwetsimi wa Xikwembu.”+ 35  Kambe Yesu a ri tshinya, a ku: “Miyela, u huma eka yena.” Kutani endzhaku ko tlatlalata munhu loyi ehansi exikarhi ka vona, dimona ri huma eka yena ri nga n’wi vavisanga.+ 36  Hikwalaho ka leswi, hinkwavo va hlamala, ivi va byelana, va ku: “Xana i ku vulavula ka muxaka muni loku, hikuva u lerisa mimoya leyi nga basangiki hi vulawuri ni matimba, yi huma?”+ 37  Kutani mahungu lama khumbaka yena ma hambeta ma hangalakela etlhelweni rin’wana ni rin’wana ra muganga wolowo.+ 38  Endzhaku ko suka a yima, u hume esinagogeni a nghena ekaya ra Simoni. Kasi mana wa nsati wa Simoni a a karhatiwa hi ku hisa lokukulu ka miri, hiloko va n’wi kombelela yena.+ 39  Kutani a korhamela eka yena, a tshinya ku hisa ka miri,+ hiloko ku n’wi sukela. Hi ku hatlisa a pfuka kutani a sungula ku va tirhela.+ 40  Kambe loko dyambu ri pela, hinkwavo lava a va ri ni vavabyi lava khomiweke hi swifo swo hambana-hambana va va tisa eka yena. A a hanyisa un’wana ni un’wana wa vona hi ku va tlhandleka mavoko.+ 41  Madimona na wona a ma huma eka vo tala,+ ma huwelela ma ku: “Wena u N’wana+ wa Xikwembu.” Kambe a ma tshinya, a nga ma pfumeleli leswaku ma vulavula,+ hikuva a ma n’wi tiva+ leswaku i Kreste.+ 42  Hambiswiritano, loko ri xa, a huma a ya enhoveni.+ Kambe mintshungu yi sungula ku famba yi n’wi lava kutani yi ya fika laha a a ri kona, yi ringeta ku n’wi sivela leswaku a nga yi siyi. 43  Kambe a ku eka yona: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.”+ 44  Xisweswo a hambeta a chumayela emasinagogeni ya Yudiya.+

Tinhlamuselo ta le hansi