Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Luka 16:1-31

16  Kutani a ya emahlweni a byela ni vadyondzisiwa vakwe a ku: “Munhu un’wana a a fuwile naswona a ri ni mulanguteri,+ mulanguteri loyi a a hehliwa hileswaku u tlanga+ hi nhundzu ya yena.  Hiloko a n’wi vitana a ku eka yena, ‘I yini leswi ndzi swi twaka malunghana na wena? Tisa tsalwa+ ra vulanguteri bya wena hikuva a wu nge he yi languteli yindlu leyi.’  Kutani mulanguteri a tibyela leswi, ‘Xana ndzi ta endla yini, hikuva n’wini+ wa mina u ta ndzi tekela vulanguteri? A ndzi na matimba lama ringaneke yo cela, ndzi ni tingana to kombela.  Aha! Ndza swi tiva leswi ndzi nga ta swi endla leswaku loko ndzi susiwa eka vulanguteri, vanhu va ta ndzi amukela emakaya ya vona.’+  Kutani a vitana un’wana ni un’wana wa lava kolotaka n’wini wa yena a vula leswi eka lowo sungula, ‘Xana u n’wi kolota yini n’wini wanga?’  A ku, ‘Mafurha ya mutlhwari ya swibya swa 100.’ A ku eka yena, ‘Teka ntwanano wa wena lowu tsariweke, u tshama ehansi u hatlisa u tsala 50.’  Endzhaku, a byela un’wana, ‘Wena ke, xana u kolota yini?’ A ku, ‘Koroni ya swibya swa 100.’ A ku eka yena, ‘Tlhela ni ntwanano wa wena lowu tsariweke u tsala 80.’  Kutani n’wini wa yena a bumabumela mulanguteri loyi, hambileswi a a nga lulamanga, hikuva u endle hi vutlhari lebyi pfunaka;+ hikuva vana va mafambiselo lawa ya swilo va tlharihile hi ndlela leyi pfunaka eka xitukulwana xa vona ku tlula vana va ku vonakala.+  “Nakambe, ndza mi byela, Tiendleleni vanakuloni+ hi rifuwo+ leri nga lulamangiki, leswaku, loko ri hela, va mi amukela eka vutshamo lebyi nga heriki.+ 10  Munhu la tshembekeke eka leswitsongo wa tshembeka ni le ka swo tala, naswona munhu la nga lulamangiki eka leswitsongo a nga lulamanga ni le ka swo tala.+ 11  Hikokwalaho, loko mi nga kumekanga mi tshembekile mayelana ni rifuwo leri nga lulamangiki, i mani la nga ta mi tamerisa leswi nga ntiyiso?+ 12  Naswona loko mi nga kumekanga mi tshembekile mayelana ni leswi nga swa un’wana,+ i mani la nga ta mi nyika leswi nga swa n’wina? 13  Ku hava nandza wa yindlu loyi a nga vaka hlonga ra vini vambirhi; hikuva u ta venga un’wana a rhandza un’wanyana, kumbe u ta namarhela un’wana a n’wi langutela ehansi un’wanyana. A mi nge vi mahlonga ya Xikwembu ni Rifuwo.”+ 14  Kutani Vafarisi, lava a va ri varhandzi va mali, a va yingise swilo leswi hinkwaswo, hiloko va sungula ku n’wi khovolela.+ 15  Kutani a ku eka vona: “Mi tivula lava lulameke emahlweni ka vanhu,+ kambe Xikwembu xi tiva timbilu+ ta n’wina; hikuva lexi tlakukeke exikarhi ka vanhu i xilo lexi nyenyetsaka emahlweni+ ka Xikwembu. 16  “Nawu ni Vaprofeta a swi ri kona ku fika eka Yohane.+ Ku sukela kwalaho mfumo wa Xikwembu wu twarisiwa wu ri mahungu lamanene, naswona munhu un’wana ni un’wana u lwela ku wu kuma.+ 17  Hakunene, swi nga olova swinene leswaku tilo ni misava swi hundza+ ku ri ni ku va xiphemu+ xin’we xa nhlanga ya Nawu xi nga hetiseki.+ 18  “Un’wana ni un’wana loyi a tshikaka nsati wakwe a teka un’wana u endla vuoswi, naswona loyi a tekaka wansati la tshikeke nuna wa yena u endla vuoswi.+ 19  “Kambe munhu+ un’wana a a fuwile, naswona a a hamba a ambala xivunguvungu ni ntsembyana, a tiphina siku rin’wana ni rin’wana hi vulovolovo.+ 20  Kambe mukomberi un’wana la vuriwaka Lazaro a a hamba a vekiwa enyangweni ya yena, a tele swilondza 21  naswona a a navela ku dya swilo leswi a swi wa etafuleni ra munhu loyi a fuweke. Ina, ni timbyana a ti ta ti nantswela swilondza swakwe. 22  Kutani hi ku famba ka nkarhi mukomberi a fa+ ivi a tekiwa hi tintsumi a yisiwa exifuveni+ xa Abrahama.+ “Na yena munhu loyi a fuweke a fa+ ivi a lahliwa. 23  Loko a ri eHayidesi a tlakusa mahlo yakwe, yena a ri eku xanisiweni,+ hiloko a vona Abrahama ekule swinene na Lazaro a ri exifuveni xa yena. 24  Kutani a huwelela a ku, ‘Tatana Abrahama,+ ndzi kombe tintswalo u rhuma Lazaro a peta makumu ya ritiho rakwe ematini a ta timula ririmi+ ra mina, hikuva ndza vaviseka emalangavini lawa ya ndzilo.’+ 25  Kambe Abrahama a ku, ‘N’wananga, tsundzuka leswaku u swi amukele hi ku helela swilo swa wena leswinene enkarhini wa ku hanya ka wena, kambe hilaha ku fanaka Lazaro u langutane ni swilo swo biha. Hambiswiritano, sweswi yena u kuma nchavelelo laha kambe wena u le ku vavisekeni.+ 26  Naswona handle ka swilo leswi hinkwaswo, ku ni riwa+ lerikulu exikarhi ka hina na n’wina,+ lerova lava lavaka ku tlulela eka n’wina va suka haleno a va nge swi koti, naswona vanhu va tsandzeka ku suka kwahalano va pelela eka hina.’+ 27  Kutani a ku, ‘Loko swi ri tano ndza ku kombela, tatana, leswaku u n’wi rhuma endlwini ya tatana, 28  hikuva ndzi ni vamakwerhu va ntlhanu, ku endlela leswaku a va nyika vumbhoni bya rixaladza, leswaku na vona va nga ngheni endhawini leyi ya nxaniso.’ 29  Kambe Abrahama a ku, ‘Va na Muxe+ ni Vaprofeta;+ a va va yingise.’+ 30  Kutani a ku, ‘Swi nga tshuki swi va tano, tatana Abrahama, kambe loko un’wana wa lava feke a ya eka vona va ta hundzuka.’ 31  Kambe a ku eka yena, ‘Loko va nga n’wi yingisi Muxe+ ni Vaprofeta, a va nge khorwiseki ni loko un’wana o pfuka eka lava feke.’”

Tinhlamuselo ta le hansi