Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Luka 15:1-32

15  Kutani valuvisi+ hinkwavo ni vadyohi+ va hambeta va tshinela eka yena va ta n’wi yingisa.  Hikwalaho Vafarisi swin’we ni vatsari a va tshamela ku gungula, va ku: “Munhu loyi u amukela vadyohi a tlhela a dya na vona.”+  Kutani a va byela xifaniso lexi, a ku:  “I mani eka n’wina la nga ni tinyimpfu ta 100, loyi loko a lahlekeriwa hi yin’we ya tona, a nga ta ka a nga ti siyi leta 99 emananga, a ya lava leyi lahlekeke kukondza a yi kuma?+  Kutani loko a yi kumile wa yi pakatsa, a tsaka.+  Hikwalaho loko a fika ekaya a vitana vanakulobye ni vaakelani va hlengeletana, a ku eka vona, ‘Tsakani na mina, hikuva ndzi kume nyimpfu ya mina leyi a yi lahlekile.’+  Xisweswo ndza mi byela leswaku ku ta va ni ntsako lowukulu swinene etilweni loko mudyohi un’we a hundzuka+ ku tlula lava lulameke va 99 lava swi nga lavekiki leswaku va hundzuka.+  “Kumbe hi wihi wansati loyi a nga ni timali ta nsimbi ta drakma ta khume, loko a lahlekeriwa hi mali yin’we ya nsimbi ya drakma, a nga ri lumekiki rivoni a kukula yindlu ya yena, a lavisisa hi vukheta a kondza a yi kuma?  Kutani loko a yi kumile a vitana vavasati lava nga vanakulobye ni vaakelani va ta hlengeletana, a ku, ‘Tsakani na mina, hikuva ndzi kume mali ya nsimbi ya drakma leyi a yi ndzi lahlekerile.’ 10  Xisweswo, ndza mi byela, tintsumi ta Xikwembu ta tsaka loko mudyohi un’we a hundzuka.”+ 11  Hiloko a ku: “Munhu un’wana a a ri ni vana vambirhi va majaha.+ 12  Kutani lontsongo eka vona a ku eka tata wakwe, ‘Tatana, ndzi nyike rifuwo leri nga xiavelo+ lexi nga xa mina.’ Kutani a va avela rifuwo rakwe ro tihanyisa.+ 13  Endzhaku ka masiku ma nga ri mangani, mufana a hlengeleta swilo hinkwaswo ivi a endzela etikweni ra le kule, a fika a tlanga hi rifuwo rakwe hi ku hanya vutomi bya vusopfa.+ 14  Loko a tirhise hinkwaswo, ku va ni ndlala leyikulu etikweni rero hinkwaro, kutani a sungula ku pfumala. 15  U kale a ya namarhela un’wana wa vaaki va tiko rero, kutani yena a n’wi rhuma emasin’wini yakwe a ya risa tinguluve.+ 16  Naswona a a tshama a navela ku dya swiphambati swa makherobu leswi a swi dyiwa hi tinguluve, kambe a ku nga ri na munhu loyi a a n’wi nyika xanchumu.+ 17  “Loko a anakanyisise kahle, a ku, ‘Ku ni vanhu vo tala lava thoriweke hi tatana, va ni swakudya swo tala, kambe mina ndza fa laha hi ndlala! 18  Ndzi ta pfuka ndzi ya+ eka tatana, ndzi ku eka yena: “Tatana, ndzi dyohele tilo swin’we na wena.+ 19  A ndza ha faneli ku vuriwa n’wana wa wena. Ndzi endle un’wana wa vanhu va wena lava u va tholeke.”’ 20  Kutani a pfuka a ya eka tata wa yena. Loko a ha ri ekulenyana, tata wakwe a n’wi vona, a va ni ntwela-vusiwana, hiloko a tsutsuma a wela enhan’wini yakwe, a n’wi ntswontswa hi rirhandzu. 21  Kutani n’wana a ku eka yena, ‘Tatana, ndzi dyohele tilo swin’we na wena.+ A ndza ha faneli ku vuriwa n’wana wa wena. Ndzi endle un’wana wa vanhu va wena lava u va tholeke.’+ 22  Kambe tata wakwe a byela mahlonga ya yena a ku, ‘Hatlisani, humesani nguvu yo leha, leyinene eka hinkwato, mi n’wi ambexa+ yona, kutani mi vehela xingwavila+ evokweni rakwe ni maphaxani emilengeni yakwe. 23  Mi tisa xinkunzana lexi noneke,+ mi xi tlhava, hi dya hi tiphina, 24  hikuva n’wana loyi wa mina a a file kutani u tlhele a hanya;+ a a lahlekile ivi a kumeka.’ Hiloko va sungula ku tiphina. 25  “N’wana+ wakwe lonkulu a a ri emasin’wini; loko a fika ekusuhi ni yindlu a twa vuyimbeleri ni ku cina. 26  Hiloko a vitana un’wana wa malandza, a vutisa leswaku swilo leswi a swi vula yini. 27  A ku eka yena, ‘Makwenu+ u vuyile, kutani tata+ wa wena u tlhave xinkunzana xo nona, hikuva u vuye a hanye kahle.’ 28  Kambe a kariha naswona a a nga swi lavi ku nghena. Kutani tata wakwe a huma, a sungula ku n’wi khongotela.+ 29  Hiloko a angula tata wakwe a ku, ‘Se swi endla malembe yo tala ndzi ku tirhela naswona a ndzi si tshama ndzi tlula xileriso xa wena ni kan’we, kambe mina a wu si tshama u ndzi nyika ximbutana leswaku ndzi tiphina ni vanakulorhi.+ 30  Kambe hi ku hatlisa loko ku fika n’wana+ wa wena loyi a dyeke rifuwo ra wena ro tihanyisa swin’we ni tinghwavava,+ u n’wi tlhavele xinkunzana xo nona.’+ 31  Kutani a ku eka yena, ‘N’wananga, nkarhi hinkwawo a wu ri na mina, naswona swilo hinkwaswo leswi nga swa mina i swa wena;+ 32  kambe a hi fanele ku tiphina hi tsaka, hikuva makwenu a a file kutani se wa hanya, naswona a a lahlekile kutani u kumekile.’”+

Tinhlamuselo ta le hansi