Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Luka 11:1-54

11  Kutani enkarhini lowu a a ri endhawini yin’wana a khongela, loko a heta, un’wana wa vadyondzisiwa vakwe a ku eka yena: “Hosi, hi dyondzise ndlela ya ku khongela,+ hilaha Yohane na yena a dyondziseke vadyondzisiwa+ vakwe hakona.”  Kutani a ku eka vona: “Loko mi khongela,+ vulani leswi, ‘Tatana, vito ra wena a ri kwetsimisiwe.+ Mfumo wa wena a wu te.+  Hi nyike xinkwa+ xa hina xa siku hi ku ya hi xilaveko xa siku.  Naswona u hi rivalela swidyoho+ swa hina, hikuva na hina ha va rivalela hinkwavo lava nga ni nandzu+ eka hina; u nga hi yisi endzingweni.’”+  Ku tlula kwalaho, a ku eka vona: “Xana i mani eka n’wina loyi loko a ri ni nakulobye, a nga yaka eka yena exikarhi ka vusiku, a ku eka yena, ‘Nakulorhi, ndzi lombe swinkwa swinharhu,  hikuva ka ha ku fika nakulorhi la ndzi endzeleke naswona a ndzi na nchumu xo xi veka emahlweni ka yena’?  Kutani loyi a nga endzeni a angula a ku, ‘Tshika ku ndzi karhata.+ Nyangwa se yi lotleriwile, naswona se ndzi etlele, ni vana va mina lavatsongo va etlele; a ndzi nge pfuki ndzi ku nyika xanchumu.’  Ndza mi byela, Hambiloko a a nga ta pfuka a n’wi nyika xanchumu hikwalaho ka leswi a nga nakulobye wakwe, hakunene hikwalaho ka ku phikelela+ kakwe ka vurhena u ta pfuka a n’wi nyika swilo leswi a swi lavaka.  Hikwalaho ndzi ri eka n’wina, Hambetani mi kombela,+ mi ta nyikiwa; hambetani mi lava,+ mi ta swi kuma; hambetani mi gongondza, mi ta pfuleriwa. 10  Hikuva un’wana ni un’wana la kombelaka wa nyikiwa,+ naswona un’wana ni un’wana la lavaka wa swi kuma, naswona un’wana ni un’wana la gongondzaka u ta pfuleriwa. 11  Hakunene, xana hi wihi tatana exikarhi ka n’wina, loyi loko n’wana+ wakwe a kombela nhlampfi, swi nga ha endlekaka a n’wi nyika nyoka ematshan’weni ya nhlampfi? 12  Kumbe loko a kombela tandza, a nga n’wi nyikaka xipame ke? 13  Hikokwalaho, loko n’wina, hambiloko mi hombolokile mi tiva ndlela ya ku nyika vana+ va n’wina tinyiko letinene, Tatana la nge tilweni u ta nyika moya lowo kwetsima+ hilaha ku tlurisaka swinene eka lava n’wi kombelaka!” 14  Endzhakunyana a a hlongola dimona ra mbheveve.+ Loko dimona se ri humile, munhu la nga mbheveve a vulavula. Kutani mintshungu yi hlamala. 15  Kambe van’wana va ku: “U hlongola madimona hi Belzebule mufumi wa madimona.”+ 16  Hambiswiritano, leswaku va n’wi ringa, van’wana va sungule ku lava xikombiso+ lexi humaka etilweni eka yena. 17  Hi ku tiva mianakanyo+ ya vona a ku eka vona: “Mfumo wun’wana ni wun’wana lowu avaneke hi vuwona wa wa, ni yindlu leyi avaneke hi vuyona ya wa.+ 18  Kutani loko Sathana na yena a avanile hi vuyena, xana mfumo wakwe wu ta yimisa+ ku yini? Hikuva mi ri ndzi hlongola madimona hi Belzebule. 19  Loko ndzi hlongola madimona hi Belzebule, xana vana+ va n’wina va ma hlongola hi mani? Va ta mi avanyisa hikwalaho ka sweswo. 20  Kambe loko ndzi hlongola madimona hi ritiho+ ra Xikwembu, mfumo wa Xikwembu wu mi hundzile+ hakunene. 21  Loko wanuna+ wa matimba, la hlomeke kahle, a rindza xigodlo xa yena, leswi nga swa yena swi tshama hi ku rhula. 22  Kambe loko un’wana la nga ni matimba+ yo tlula ya yena a ta a ta lwisana na yena ivi a n’wi hlula,+ u teka matlhari yakwe hinkwawo lawa a a tshemba wona, kutani a avelana ni van’wana swilo leswi a swi tekeke eka yena. 23  Loyi a nga riki etlhelweni ra mina u lwisana na mina, naswona loyi a nga hlengeletiki na mina wa hangalasa.+ 24  “Loko moya lowu nga basangiki wu huma emunhwini, wu hundza etindhawini leti omeke wu lavisisa ndhawu yo wisela eka yona, loko wu nga yi kumi, wu ri, ‘Ndzi ta vuyela endlwini ya mina leyi ndzi humeke eka yona.’+ 25  Kutani wu fika wu yi kuma yi kukuriwe yi basa yi tlhela yi sasekisiwa. 26  Kutani wu khoma ndlela, wu ya vuya ni mimoya yin’wanyana ya nkombo+ leyi hombolokeke ngopfu ku tlula wona, loko se yi nghenile, yi tshama kona; kutani swiyimo swo hetelela swa munhu yoloye swi biha ngopfu ku tlula eku sunguleni.”+ 27  Loko a ha vula swilo leswi wansati un’wana exikarhi ka ntshungu a tlakusa rito rakwe a ku eka yena: “Ra tsaka khwiri+ leri ku rhwaleke ni mavele lawa u ma an’weke!” 28  Kambe yena a ku: “E-e, ematshan’weni ya sweswo, Va tsaka lava twaka rito ra Xikwembu va tlhela va ri hlayisa!”+ 29  Kuteloko mintshungu yi vungane swin’we, a ku: “Xitukulwana lexi i xitukulwana xo homboloka; xi lava xikombiso.+ Kambe ku hava xikombiso lexi nga ta nyikiwa xona handle ka xikombiso xa Yonasi.+ 30  Hikuva tanihi leswi Yonasi+ a veke xikombiso eka Vaninivha, hi ndlela leyi fanaka N’wana wa munhu na yena u ta va xona eka xitukulwana lexi. 31  Hosi ya xisati+ ya le dzongeni yi ta pfuxiwa swin’we ni vanhu va xitukulwana lexi loko ku avanyisiwa naswona yi ta va gweva; hikuva yi te yi huma emakun’wini ya misava ku ta twa vutlhari bya Solomoni, kambe maswivo, nchumu wo tlula+ Solomoni wu kona. 32  Vanhu va Ninivha va ta pfuka swin’we ni xitukulwana lexi loko ku avanyisiwa naswona va ta xi gweva; hikuva va hundzukile eka leswi Yonasi a swi chumayeleke;+ kambe maswivo, nchumu wo tlula+ Yonasi wu kona. 33  Loko munhu a heta ku lumeka rivoni, a nga ri veki ebakweni kumbe ehansi ka xirhundzu xo pima, kambe u ri veka ehenhla ka xo tlhandleka rivoni,+ leswaku lava nghenaka va vona ku vonakala. 34  Rivoni ra miri i tihlo ra wena. Loko tihlo ra wena ri olova, miri wa wena hinkwawo na wona wa vangama;+ kambe loko ri hombolokile, miri wa wena na wona wu va ni munyama. 35  Hikokwalaho, tlhariha. Swi nga ha endleka leswaku ku vonakala loku nga eka wena i munyama.+ 36  Hikokwalaho, loko miri wa wena hinkwawo wu vangama ku nga ri na xiphemu ni xin’we lexi nga ni munyama, wu ta va wu vangama+ ku fana ni loko rivoni ri ku nyika ku vonakala hi miseve ya rona.” 37  Loko a heta ku vula leswi, Mufarisi a n’wi kombela leswaku a ya dya+ na yena. Kutani a nghena a vurhama etafuleni. 38  Hambiswiritano, Mufarisi a a hlamarisiwe hi ku vona leswaku a nga rhanganga a hlamba+ a nga si dya. 39  Kambe Hosi yi ku eka yena: “N’wina Vafarisi, mi basisa xinwelo ni ndyelo ehandle, kambe endzeni+ ka n’wina ku tele swilo leswi phangiweke ni vuhomboloki.+ 40  Vanhu lava nga anakanyiki! Loyi a endleke ehandle+ u endle ni le ndzeni, a hi swona ke? 41  Nilokoswiritano, leswi nga endzeni swi endleni tinyiko ta tintswalo,+ naswona maswivo, swilo swin’wana hinkwaswo swi basile eka n’wina. 42  Kambe mi ni khombo n’wina Vafarisi, hikuva mi nyikela vukhume+ bya musuzwana ni bya mbowa ni bya matsavu ya muxaka wun’wana ni wun’wana, kambe mi honisa vululami ni rirhandzu ra Xikwembu! Swilo leswi a mi boheka ku swi endla, kambe swilo leswin’wana a mi boheka ku ka mi nga swi tshiki.+ 43  Mi ni khombo n’wina Vafarisi, hikuva mi rhandza switshamo swa le mahlweni emasinagogeni ni ku xewetiwa etindhawini ta ku xavisela!+ 44  Mi ni khombo n’wina, hikuva mi fana ni masirha-bako ya xitsundzuxo lama nga vonakiki, lerova vanhu va famba ehenhla ka wona kambe va nga swi tivi!”+ 45  Un’wana wa lava tivaka+ Nawu a hlamula a ku eka yena: “Mudyondzisi, loko u vula swilo leswi na hina wa hi rhukana.” 46  Kutani a ku: “Mi ni khombo na n’wina lava tivaka Nawu, hikuva mi rhwexa vanhu mindzhwalo yo tika leswaku va yi rhwala, kambe loko ku ri n’wina a mi yi khumbi mindzhwalo ya kona hambi hi rin’we ra tintiho+ ta n’wina! 47  “Mi ni khombo n’wina, hikuva mi akela masirha-bako ya xitsundzuxo ya vaprofeta, kambe va dlayiwe hi vatata wa n’wina!+ 48  Hakunene mi timbhoni ta swiendlo swa vatata wa n’wina naswona mi pfumelelana+ na vona, hikuva vona va dlaye+ vaprofeta kambe n’wina mi akela masirha-bako ya vona. 49  Hikwalaho ni vutlhari+ bya Xikwembu byi te, ‘Ndzi ta rhumela eka vona vaprofeta ni vaapostola, kutani va ta dlaya ni ku xanisa van’wana va vona, 50  leswaku ngati ya vaprofeta+ hinkwavo leyi halatiweke hi mpfhuka misava yi va kona yi ta laviwa eka xitukulwana+ lexi, 51  ku sukela engatini ya Avele+ ku ya fika engatini ya Zakariya,+ loyi a dlayiweke exikarhi ka alitari ni yindlu.’+ Ina, ndza mi byela, yi ta laviwa eka xitukulwana lexi. 52  “Mi ni khombo n’wina lava tivaka Nawu, hikuva mi teke xilotlelo xa vutivi;+ n’wina a mi nghenanga, naswona lava nghenaka mi va siverile!”+ 53  Kuteloko a huma kona vatsari ni Vafarisi va sungula ku n’wi kamanyeta swinene ni ku n’wi tlhandleka swivutiso malunghana ni swilo swin’wana, 54  va n’wi rhiya,+ leswaku va khoma+ xo karhi lexi humaka enon’wini wakwe.

Tinhlamuselo ta le hansi