Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Luka 1:1-80

1  Hambileswi vo tala va ringeteke ku hlengeleta rungula ra timhaka+ leti pfumeriwaka hi ku helela exikarhi ka hina,  hilaha hi runguleriweke tona hakona hi lava ku sukela eku sunguleni+ va veke timbhoni+ ta ku swi vona hi mahlo ni vatameri va rungula,+  na mina, hikwalaho ka leswi ndzi lavisiseke swilo hinkwaswo ku sukela emasungulweni hi ku kongoma, ndzi tibohile ku ku tsalela swona hi ntlhandlamano+ lowu twisisekaka, wena Teyofilo+ loyi a chavisekaka+ swinene,  leswaku u ku tiva hi ku helela ku tiya ka swilo leswi u dyondzisiweke swona hi nomu.+  Emasikwini ya Heroda,+ hosi ya Yudiya, a ku ri ni muprista un’wana loyi a a vuriwa Zakariya, wa ntlawa wa Abiya,+ naswona a a ri ni nsati loyi a n’wi tekeke eka vana va xisati va Aroni,+ vito ra yena a a ri Elizabeta.  Havambirhi a va lulamile+ emahlweni ka Xikwembu hileswi a va famba hi ku pfumala xisandzu+ hi ku landza swileriso+ hinkwaswo ni swilaveko swa le nawini+ swa Yehovha.+  Kambe a va nga ri na n’wana, hikuva Elizabeta a a ri mhika,+ naswona havambirhi a va kurile swinene hi malembe.  Tanihi leswi a ri muprista exiavelweni xa ntlawa+ wakwe emahlweni ka Xikwembu,  hi ku ya hi endlelo ro hlawuleka ra ntirho wa vuprista, ku fike nkarhi wa yena wa ku humesa murhi wa risuna+ loko a nghena evukwetsimelweni bya Yehovha;+ 10  naswona vunyingi hinkwabyo bya vanhu a byi khongela ehandle hi nkarhi wa ku humesa murhi wa risuna.+ 11  Ku humelele ntsumi ya Yehovha eka yena, yi yime etlhelweni ra xinene ra altari ya murhi wa risuna.+ 12  Kambe Zakariya u karhatiwe hi leswi a a swi vona, kutani a fikeriwa hi ku chava.+ 13  Hambiswiritano, ntsumi yi ku eka yena: “U nga chavi, Zakariya, hikuva xikombelo xa wena xi twiwe hi tindleve timbirhi,+ naswona nsati wa wena Elizabeta u ta va mana wa n’wana wa wena, kutani vito ra yena u ta n’wi vitana Yohane.+ 14  U ta va ni ntsako ni ku khana lokukulu, kutani vo tala va ta tsakela+ ku velekiwa ka yena; 15  hikuva u ta va lonkulu emahlweni ka Yehovha.+ Kambe a nga fanelanga nikatsongo ku nwa vhinyo ni xakunwa lexi pyopyisaka,+ kutani u ta tala moya lowo kwetsima a ha ri embelekweni+ wa mana wakwe; 16  yena u ta vuyisela vo tala va vana va Israyele eka Yehovha+ Xikwembu xa vona. 17  Nakambe, u ta famba emahlweni ka yena hi moya ni matimba ya Eliya,+ leswaku a vuyisela timbilu+ ta vatatana eka vana ni lava nga yingisiki eka vutlhari lebyi pfunaka bya lava lulameke, leswaku a lunghiselela Yehovha+ vanhu lava lunghekeke.”+ 18  Kutani Zakariya a byela ntsumi a ku: “Xana ndzi nga tiyiseka njhani hi leswi? Hikuva ndzi dyuharile+ naswona nsati wa mina u kurile swinene hi malembe.” 19  Ntsumi yi n’wi angula yi ku: “Hi mina Gabriyele,+ loyi a yimaka emahlweni ka Xikwembu, naswona ndzi rhumiwe leswaku ndzi vulavula+ na wena ni ku ku byela mahungu lamanene ya swilo leswi. 20  Kambe waswivo, u ta miyela+ u nga swi koti ku vulavula ku fikela siku leri swilo leswi swi nga ta endleka ha rona, hikuva a wu ma kholwanga marito ya mina, lama nga ta hetiseka hi nkarhi wa kona lowu vekiweke.” 21  Hi nkarhi wolowo vanhu a va ha rindzele Zakariya,+ naswona va sungule ku hlamala hi ku hlwela ka yena evukwetsimelweni. 22  Kambe loko a huma a a nga swi koti ku vulavula na vona, va xiya leswaku wa ha ku vona singita+ evukwetsimelweni; kutani a ya emahlweni a va kowetela, kambe a tshama a ri mbheveve. 23  Loko masiku ya ntirho wa yena wa le rivaleni ma herile,+ u mukile. 24  Kambe endzhaku ka masiku lawa Elizabeta nsati wa yena a tika;+ kutani a tshama a ri swakwe ku ringana tin’hweti ta ntlhanu, a ku: 25  “Yehovha u ndzi endla hi ndlela leyi emasikwini lawa, loko a ndzi nyike nyingiso wa yena leswaku a susa ndzhukano wa mina exikarhi ka vanhu.”+ 26  En’hwetini ya yena ya vutsevu ntsumi Gabriyele+ yi rhumiwe emutini wa Galeliya lowu vuriwaka Nazareta yi huma eka Xikwembu, 27  yi ya eka nhwana loyi a a tshembisane ku tekana ni wanuna loyi a vuriwaka Yosefa wa yindlu ya Davhida; vito ra nhwana+ yoloye a ku ri Mariya.+ 28  Loko yi fika emahlweni ka yena, yi ku: “Xewani,+ wena loyi a tsakeriweke swinene, Yehovha+ u na wena.”+ 29  Kambe a a karhateke swinene hi rito leri kutani a sungula ku tivutisa leswaku loku ku nga va ku ri ku xeweta ka muxaka muni. 30  Kutani ntsumi yi ku eka yena: “U nga chavi, Mariya, hikuva Xikwembu xi ku tsakerile;+ 31  kutani waswivo, u ta tika embelekweni wa wena, u ta veleka n’wana+ wa jaha, vito ra yena u ta n’wi thya Yesu.+ 32  Yena u ta va lonkulu+ naswona u ta vuriwa N’wana wa La nge Henhla-henhla;+ Yehovha Xikwembu u ta n’wi nyika xiluvelo+ xa Davhida tata+ wakwe, 33  naswona u ta va hosi ehenhla ka yindlu ya Yakobe hi masiku, mfumo wakwe a wu nge vi na makumu.”+ 34  Kambe Mariya a ku eka ntsumi: “Xana leswi swi ta endlekisa ku yini, tanihi leswi ndzi nga tiviki+ wanuna hi tlhelo ra rimbewu?” 35  Ntsumi yi n’wi hlamula yi ku: “Moya+ lowo kwetsima wu ta ta ehenhla ka wena, naswona matimba ya La nge Henhla-henhla ma ta ku funengeta. Hikwalaho ka sweswo lexi nga ta velekiwa na xona xi ta vuriwa lexo kwetsima,+ N’wana+ wa Xikwembu. 36  Kutani waswivo, Elizabeta xaka ra wena na yena u tike n’wana wa jaha emalembeni ya yena ya vudyuhari, yena loyi a vuriwaka wansati wa mhika,+ naswona leyi i n’hweti ya yena ya vutsevu; 37  hikuva ku hava lexi tivisiwaka hi Xikwembu lexi nga ta ka xi nga endleki.”+ 38  Kutani Mariya a ku: “Waswivo! Hlonga ra xisati+ ra Yehovha! Onge swi nga endleka eka mina hi ku ya hi leswi u swi tiviseke.” Kutani ntsumi yi suka eka yena. 39  Xisweswo Mariya a pfuka emasikwini wolawo a ya etikweni ra tintshava hi ku hatlisa, emutini wa Yuda, 40  kutani a nghena ekaya ra Zakariya a xeweta Elizabeta. 41  Loko Elizabeta a twa Mariya a xeweta, ricece leri nga embelekweni wakwe ri tshuka-tshuka; kutani Elizabeta a tala hi moya lowo kwetsima, 42  a huwelela hi ku huwelela lokukulu a ku: “U katekile exikarhi ka vavasati, naswona mbhandzu wa khwiri ra wena wu katekile!+ 43  Xisweswo, xana swi endlekise ku yini leswaku lunghelo leri ri va ra mina, leswaku mana wa Hosi+ ya mina a ta eka mina? 44  Waswivo, loko mpfumawulo wa ku xeweta ka wena wu fika etindleveni ta mina, ricece leri nga embelekweni wa mina ri tshuka-tshuke hi ku tsaka+ lokukulu. 45  Nakambe loyi a kholweke wa tsaka, hikuva swilo leswi vuriweke eka yena hi Yehovha+ swi ta endliwa+ hilaha ku heleleke.” 46  Kutani Mariya a ku: “Moya-xiviri wa mina wu twa-risa Yehovha,+ 47  naswona moya wa mina a wu nge tshiki ku tsakisisa+ hikwalaho ka Xikwembu Muponisi+ wa mina; 48  hikuva xi langute xiyimo xa le hansi xa hlonga ra xona ra xisati.+ Hikuva, waswivo, ku sukela sweswi switukulwana hinkwaswo swi ta ndzi vula loyi a tsakeke;+ 49  hikuva Lowa matimba u ndzi endlele swiendlo leswikulu, naswona vito+ ra yena ra kwetsima; 50  kutani eka switukulwana swa switukulwana tintswalo ta yena ti le ka lava va n’wi chavaka.+ 51  U endle hi matimba hi voko+ ra yena, u va hangalasele ekule lava titlakusaka emakungwini ya timbilu+ ta vona. 52  U wise vavanuna va matimba+ eswiluvelweni naswona u tlakuse lava titsongahataka;+ 53  lava nga ni ndlala u va xurhise va eneriseka hi swilo leswinene+ naswona lava a va ri ni rifuwo+ u va tlherise va nga ri na nchumu. 54  U pfune Israyele nandza+ wa yena, leswaku a tsundzuka tintswalo,+ 55  hilaha a nga byela vatata wa hina hakona, Abrahama ni mbewu ya yena, hilaha ku nga heriki.”+ 56  Kutani Mariya u tshame na yena ku ringana kwalomu ka tin’hweti tinharhu, ivi a vuyela ekaya ra yena. 57  Hiloko ku fika nkarhi wa leswaku Elizabeta a veleka, kutani a veleka n’wana wa jaha. 58  Loko vaakelani ni maxaka ya yena va twa leswaku Yehovha u twarise tintswalo+ takwe eka yena, va tsaka+ swin’we na yena. 59  Kutani hi siku ra vunhungu va ta leswaku va ta yimbisa n’wana lontsongo,+ naswona a va ta n’wi thya vito ra tata wa yena, Zakariya. 60  Kambe mana wa yena a hlamula a ku: “A swi nge vi tano nikatsongo, kambe u ta vuriwa Yohane.” 61  Kutani va ku eka yena: “A ku na munhu exikarhi ka maxaka ya wena loyi a vitaniwaka hi vito leri.” 62  Kutani va ya vutisa tata wa yena hi ku tirhisa swikoweto leswaku a a lava a vuriwa mani. 63  A kombela xiphepherhele a tsala leswi: “Vito ra yena i Yohane.”+ Kutani hinkwavo va hlamala. 64  Hi ku hatlisa nomu wa yena wu pfuleka+ ni ririmi ra yena ri ntshunxeka, a sungula ku vulavula, a dzunisa Xikwembu. 65  Ku chava ku va wela hinkwavo lava tshamaka ekusuhi na vona; ku sungula ku vulavuriwa hi swilo leswi hinkwaswo etikweni hinkwaro ra tintshava ra Yudiya, 66  kutani hinkwavo lava swi tweke va swi hlayisa etimbilwini+ ta vona, va ku: “Kahle-kahle, xana n’wana loyi lontsongo u ta va yini?” Hikuva voko+ ra Yehovha a ri ri na yena hakunene. 67  Kutani Zakariya tata wa yena a a tale moya lowo kwetsima,+ naswona u profetile+ a ku: 68  “A ku dzunisiwe Yehovha Xikwembu xa Israyele,+ hikuva u hundzuluxele nyingiso wa yena eka vanhu+ va yena naswona u va kutsurile.+ 69  U pfuxe rimhondzo+ ra ku hi ponisa endlwini ya Davhida nandza wa yena, 70  tanihi leswi yena, hi nomu wa vaprofeta va yena vo kwetsima va khale,+ a vulavuleke 71  hi ku ponisiwa eka valala va hina ni le vokweni ra hinkwavo lava hi vengaka;+ 72  leswaku a endla tintswalo malunghana ni vatata wa hina ni ku tsundzuka ntwanano wa yena wo kwetsima,+ 73  ku nga xihlambanyo lexi a xi tiyiseke eka Abrahama tata+ wa hina, 74  leswaku, endzhaku ka loko hi ponisiwile emavokweni ya valala,+ a hi nyika lunghelo ro n’wi endlela ntirho wo kwetsima hi nga chavi+ 75  hi vutshembeki ni ku lulama emahlweni ka yena emasikwini+ ya hina hinkwawo. 76  Kambe loko ku ri wena, n’wana lontsongo, u ta vuriwa muprofeta wa La nge Henhla-henhla, hikuva u ta rhanga emahlweni ka Yehovha, u lunghisa+ tindlela ta yena, 77  leswaku a tivisa vanhu va yena ta ku ponisiwa hi ku rivaleriwa swidyoho+ swa vona, 78  hikwalaho ka ntsetselelo lowukulu wa Xikwembu xa hina. Hi ntsetselelo lowu vurhonga+ byi ta hi endzela byi huma ehenhla,+ 79  byi ta nyika ku vonakala eka lava tshamaka emunyameni ni le ndzhutini+ wa rifu, byi ta kongomisa milenge ya hina hilaha ku humelelaka endleleni ya ku rhula.” 80  N’wana lontsongo a ya emahlweni a kula+ a tlhela a tiya emoyeni, naswona a a tshama emakwandzasini ku fikela siku ra ku tikombisa ka yena erivaleni eka Israyele.

Tinhlamuselo ta le hansi