Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Levhitika 24:1-23

24  Yehovha a ya emahlweni a byela Muxe a ku:  “Lerisa vana va Israyele leswaku va ku kumela mafurha ya mutlhwari ya rivoni,+ yo tenga, lama khuvutiweke, leswaku ma ta lumeka rivoni nkarhi hinkwawo.+  Aroni u ta ri lulamisa ehandle ka nguvu leyi sirhelelaka ya Vumbhoni entsongeni wa nhlangano, ku sukela nimadyambu ku fika nimixo emahlweni ka Yehovha nkarhi hinkwawo. I nawu wa hilaha ku nga riki na makumu eswitukulwaneni swa n’wina.  Ehenhla ka xo tlhoma rivoni+ xa nsuku wo tenga, u fanele a tlhoma timboni+ hi ku landzelelana ka tona emahlweni ka Yehovha nkarhi hinkwawo.+  “U fanele u teka mapa lama silekeke kahle kutani u baka swinkwa swa 12 leswi vumbekeke ku fana ni swingwavila. Xinkwa xin’wana ni xin’wana lexi vumbekeke ku fana ni xingwavila xi ta va ni mimpimo yimbirhi ya vukhume ya mpimo wa efa.  Kutani u fanele u swi veka emahlweni ka Yehovha+ hi mintlawa yimbirhi leyi tlhandlakaneke, tsevu eka ntlawa,+ ehenhla ka tafula leri endliweke hi nsuku wo tenga.  Kutani u fanele u chela murhi wa risuna wo tenga ehenhla ka ntlawa ha wun’we, wu ta va xinkwa xa xitsundzuxo,+ gandzelo leri endleriweke Yehovha hi ndzilo.  U ta ri lulamisa emahlweni ka Yehovha nkarhi hinkwawo+ hi ku landzelelana ka masiku ya tisavata. I ntwanano wa hilaha ku nga riki na makumu ni vana va Israyele.  Kutani ri fanele ri va ra Aroni ni vana vakwe,+ naswona va fanele va ri dyela endhawini yo kwetsima+ hikuva i nchumu wo kwetsima ngopfu eka yena lowu humaka egandzelweni leri endleriweke Yehovha hi ndzilo tanihi xileriso xa hilaha ku nga riki na makumu.” 10  Kutani n’wana wa wansati wa Muisrayele, loyi, hambiswiritano, a a ri n’wana wa wanuna+ wa Muegipta, a ya nghena exikarhi ka vana va Israyele, hiloko n’wana wa wansati wa Muisrayele ni wanuna wa Muisrayele va lwa+ enxaxeni. 11  Kutani n’wana wa wansati wa Muisrayele a rhukana Vito+ ni ku ri rhuketela.+ Hiloko va n’wi tisa eka Muxe.+ Kasi vito ra mana wakwe a ku ri Xelomiti, n’wana wa Dibri wa nyimba ya Dani. 12  Kutani va n’wi nghenisa ekhotsweni+ kukondza ku twarisiwa kahle eka vona hi ku ya hi marito ya Yehovha.+ 13  Yehovha a ya emahlweni a byela Muxe a ku: 14  “Munhu la rhuketeleke n’wi humesele ehandle ka nxaxa;+ kutani hinkwavo lava n’wi tweke va fanele va veka mavoko+ ehenhla ka nhloko yakwe, ntshungu hinkwawo wu fanele wu n’wi khandla hi maribye.+ 15  Kutani u ta byela vana va Israyele u ku, ‘Loko munhu o tshuka a rhuketela Xikwembu xakwe, u fanele a hlamula hikwalaho ka xidyoho xakwe. 16  Hikwalaho loyi a rhukanaka vito ra Yehovha u ta dlayiwa hakunene.+ Nhlengeletano hinkwayo yi ta n’wi khandla hi maribye hakunene. Muluveri swin’we ni munhu la tumbulukeke kwalaho u ta dlayiwa hikwalaho ka leswi a rhukaneke Vito.+ 17  “‘Kutani loko munhu o tshuka a ba moya-xiviri wihi ni wihi wa munhu a wu dlaya, u ta dlayiwa hakunene.+ 18  Loyi a baka moya-xiviri wa xifuwo a wu dlaya u ta wu riha, moya-xiviri hi moya-xiviri.+ 19  Loko munhu o tshuka a lamata nakulobye, kutani hilaha a endleke hakona, swi ta endliwa hakona eka yena.+ 20  Ku tshoveka hi ku tshoveka, tihlo hi tihlo, tino hi tino; muxaka lowu fanaka wa ku lamatiwa loku a nga ku vangaka eka munhu, u ta endliwa kona.+ 21  Kutani loyi a baka xiharhi+ a xi dlaya u fanele a xi riha,+ kambe loyi a baka munhu a n’wi dlaya u fanele a dlayiwa.+ 22  “‘Ku ta tirha xiboho xin’we xa vuavanyisi eka n’wina. Muluveri u ta fana ni munhu la tumbulukeke+ kwalaho, hikuva hi mina Yehovha Xikwembu+ xa n’wina.’” 23  Endzhaku ka sweswo Muxe a vulavula ni vana va Israyele kutani va n’wi humesela ehandle ka nxaxa munhu la rhuketeleke, hiloko va n’wi khandla hi maribye.+ Xisweswo vana va Israyele va endla hilaha Yehovha a leriseke Muxe hakona.

Tinhlamuselo ta le hansi