Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Levhitika 20:1-27

20  Yehovha a ya emahlweni a byela Muxe a ku:  “U ta byela vana va Israyele u ku, ‘Munhu un’wana ni un’wana wa vana va Israyele ni muluveri un’wana ni un’wana la luvelaka eIsrayele, la nyiketaka vana vakwe vo karhi eka Moleke,+ u fanele a dlayiwa hakunene. Vanhu va tiko va fanele va n’wi khandla hi maribye a fa.  Loko ku ri mina, xikandza xa mina xi ta lwa ni munhu yoloye, ndzi ta n’wi dlaya eka varikwavo,+ hikuva u nyikete vana vakwe van’wana eka Moleke hi xikongomelo xa ku nyamisa ndhawu+ ya mina yo kwetsima ni ku nyamisa vito+ ra mina ro kwetsima.  Loko vanhu va tiko vo tshuka va fihla mahlo ya vona hi vomu eka munhu yoloye loko a nyiketa vana vakwe vo karhi eka Moleke a nga n’wi dlayi,+  kunene loko ku ri mina, xikandza xa mina xi ta lwa ni munhu yoloye ni ndyangu+ wakwe, hakunene ndzi ta n’wi dlaya eka varikwavo ni hinkwavo lava endleke rimbewu leri nga amukelekiki swin’we na yena, hi ku endla rimbewu+ leri nga amukelekiki na Moleke.  “‘Loko ku ri moya-xiviri lowu hundzukelaka evangomeni+ ni le ka vavhumbhi lavakulu va swiendlakalo+ leswaku wu endla rimbewu leri nga amukelekiki na vona, hakunene xikandza xa mina xi ta lwa ni moya-xiviri wolowo kutani ndzi wu dlaya eka varikwavo.+  “‘Mi fanele mi tihlawulekisa mi tikombisa mi ri lava kwetsimaka,+ hikuva mina ndzi Yehovha Xikwembu xa n’wina.  Mi fanele mi hlayisa milawu ya mina mi yi endla.+ Hi mina Yehovha la mi hlawulekisaka.+  “‘Loko ko tshuka ku va ni munhu la rhukanaka tata wakwe ni mana+ wakwe, u fanele a dlayiwa hakunene.+ Hikuva u rhuketele tata wakwe ni mana wakwe. Ngati yakwe yi le henhla kakwe.+ 10  “‘Kutani munhu la oswaka ni nsati wa wanuna un’wana hi loyi a oswaka ni nsati wa munhu-kulobye.+ Va fanele va dlayiwa hakunene, muoswi wa xinuna swin’we ni muoswi wa xisati.+ 11  Wanuna la etlelaka ni nsati wa tata wakwe u funungule vuhava bya tata+ wakwe. Havambirhi va fanele va dlayiwa hakunene. Ngati ya vona yi le henhla ka vona. 12  Kutani loko munhu a etlela ni nhlomi yakwe, havambirhi va fanele va dlayiwa hakunene.+ Va onhe leswi nga swa ntumbuluko. Ngati ya vona yi le henhla ka vona.+ 13  “‘Kutani loko munhu a etlela ni waxinuna ku fana niloko a etlela ni wansati, havambirhi va endle nchumu lowu nyenyetsaka.+ Va fanele va dlayiwa hakunene. Ngati ya vona yi le henhla ka vona. 14  “‘Kutani loko munhu a teka wansati ni mana wa yena, i ku tikhoma ko biha.+ Va fanele va hisa yena swin’we na vona endzilweni+ ku endlela leswaku ku tikhoma ko biha+ ku nga hambeti exikarhi ka n’wina. 15  “‘Kutani loko munhu a humesela mbewu ya vununa eka xiharhi,+ u fanele a dlayiwa hakunene, naswona mi fanele mi dlaya xiharhi xexo. 16  Kutani loko wansati a tshinela eka xiharhi leswaku a tivana+ na xona, u fanele u dlaya wansati ni xiharhi. Va fanele va dlayiwa hakunene. Ngati ya vona yi le henhla ka vona. 17  “‘Kutani loko munhu a teka makwavo wa xisati, n’wana wa nhwanyana wa tata wakwe kumbe n’wana wa nhwanyana wa mana wakwe, a vona vuhava bya yena na yena a vona vuhava byakwe, i tingana.+ Hikwalaho va fanele va dlayiwa ematihlweni ya vana va vanhu varikwavo. Hikuva u funungule vuhava bya makwavo wa xisati. U fanele a hlamula hikwalaho ka xihoxo xakwe. 18  “‘Kutani loko munhu a etlela ni wansati la nga ni switlhandla ivi a funungula vuhava byakwe, u humesele xihlovo xa yena erivaleni, na yena u funungule xihlovo xa ngati ya yena.+ Hikwalaho havambirhi va fanele va dlayiwa eka varikwavo. 19  “‘U nga tshuki u funungula vuhava bya makwavo+ wa xisati wa mana wa wena ni bya makwavo+ wa xisati wa tata wa wena, hikuva i maxaka ya yena lawa u ma humeseke erivaleni.+ Va fanele va hlamula hikwalaho ka xihoxo xa vona. 20  Munhu la etlelaka ni nsati wa makwavo wa tata wa yena u funungule vuhava bya makwavo+ wa tata wa yena. Va fanele va hlamula hikwalaho ka xidyoho xa vona. Va fanele va fa va nga ri na n’wana.+ 21  Kutani loko munhu a teka nsati wa makwavo, i nchumu lowu nyenyetsaka.+ I vuhava bya makwavo lebyi a byi fununguleke. A va fanelanga va va ni n’wana. 22  “‘N’wina mi fanele mi hlayisa milawu+ ya mina hinkwayo ni swiboho swa mina swa vuavanyisi+ hinkwaswo mi swi endla, leswaku tiko leri ndzi mi tisaka eka rona mi ya tshama eka rona ri nga mi hlanti.+ 23  Mi nga tshuki mi famba emilawini ya matiko lawa ndzi ma susaka emahlweni ka n’wina,+ hikuva ma endle swilo leswi hinkwaswo kutani ndza ma nyenya.+ 24  Hikwalaho ndzi te eka n’wina:+ “N’wina, mi ta teka misava ya vona, loko ku ri mina ndzi ta mi nyika yona leswaku yi va ya n’wina, tiko leri khulukaka ntswamba ni vulombe.+ Hi mina Yehovha Xikwembu xa n’wina loyi a mi hlawuleke evanhwini.”+ 25  Kutani mi fanele ku hambanisa exikarhi ka xiharhi lexi tengeke ni lexi nga tengangiki ni le xikarhi ka nyenyana leyi nga tengangiki ni leyi tengeke;+ mi nga tshuki mi endla mimoya-xiviri ya n’wina yi va leyi nyenyetsaka+ hi xiharhi ni hi nyenyana ni hi xin’wana ni xin’wana lexi fambaka ehenhla ka misava, leswi ndzi mi hlawuleleke swona hi ku swi vula leswi nga tengangiki. 26  Mi fanele mi tikombisa mi kwetsima eka mina,+ hikuva mina Yehovha ndza kwetsima;+ ndzi ya emahlweni ndzi mi hlawula evanhwini leswaku mi va va mina.+ 27  “‘Kutani loko ku ri wanuna kumbe wansati loyi a kumekaka a ri ni moya wa swikwembu kumbe moya wa ku vhumbha,+ va fanele va dlayiwa hakunene.+ Va fanele va va khandla hi maribye va fa. Ngati ya vona yi le henhla ka vona.’”+

Tinhlamuselo ta le hansi