Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Levhitika 2:1-16

2  “‘Kutani loko moya-xiviri wo karhi wo tshuka wu nyikela gandzelo, ri ri gandzelo ra mavele+ eka Yehovha, gandzelo ra wona ri fanele ri va mapa+ lama silekeke kahle; naswona wu ta chela mafurha ehenhla ka rona, wu veka ni murhi wa risuna ehenhla ka rona.  Wu fanele wu ri tisa eka vana va Aroni, lava va nga vaprista, kutani mupritsa u ta nusa voko leri teleke ra mapa ya rona lama silekeke kahle ni mafurha ya rona swin’we ni murhi wa rona wa risuna hinkwawo; u ta swi mbulukisa swi va xitsundzuxo+ xa swona ealitarini, swi va gandzelo leri endliwaka hi ndzilo ri va nun’hwelo lowu phyuphyisaka eka Yehovha.  Kutani leswi seleke swa gandzelo ra mavele i swa Aroni ni vana+ vakwe, i nchumu wo kwetsima+ ngopfu lowu humaka emagandzelweni ya Yehovha lama endliweke hi ndzilo.  “‘Loko wo tshuka u nyikela gandzelo, ri ri gandzelo ra mavele leri bakiweke exitikweni, ri fanele ri va mapa lama silekeke kahle, swinkwa swo-ke-comela leswi vumbekeke ku fana ni swingwavila,+ leswi tsakamisiweke hi mafurha kumbe swiphampha leswo-ke-comela+ leswi totiweke mafurha.+  “‘Kutani loko gandzelo ra wena ku ri gandzelo ra mavele leri oxiweke ensimbini yo oxa,+ ri fanele ri va ra mapa lama silekeke kahle lama tsakamisiweke hi mafurha, ri nga cheriwanga comela.  Ri fanele ri phemeleriwa ri va swiphemu-phemu, naswona u ta chela mafurha ehenhla ka rona.+ I gandzelo ra mavele.  “‘Loko gandzelo ra wena ku ri gandzelo ra mavele leri humaka egalazeni leri nga ni mafurha, ri fanele ri endliwa hi mapa lama silekeke kahle lama nga ni mafurha.  Eka Yehovha u fanele u tisa gandzelo ra mavele leri endliweke hi leswi; ri fanele ri nyiketiwa muprista, yena u ta ri tshineta ekusuhi ni alitari.  Kutani muprista u fanele a tlakusa rin’wana ra gandzelo leri ra mavele ri va xitsundzuxo+ xa rona naswona u fanele a ri mbulukisa ealitarini ri va gandzelo leri endliweke hi ndzilo, ri va nun’hwelo lowu phyuphyisaka eka Yehovha.+ 10  Kutani leswi seleke swa gandzelo ra mavele i swa Aroni ni vana vakwe, i nchumu wo kwetsima ngopfu wa magandzelo ya Yehovha lama endliweke hi ndzilo.+ 11  “‘Mi nga tshuki mi nyikela gandzelo ra mavele leri endliweke hi nchumu lowu cheriweke comela+ eka Yehovha, hikuva a mi fanelanga mi mbulukisa mbila leyi vileke ni vulombe swi va gandzelo ra Yehovha leri endliweke hi ndzilo. 12  “‘Mi ta swi nyikela eka Yehovha kukota gandzelo ra swirhangana,+ kutani swi nga tshuki swi tisiwa ehenhla ka alitari leswaku swi va nun’hwelo lowu phyuphyisaka. 13  “‘Gandzelo rin’wana ni rin’wana ra wena ra mavele u ta ri lunga hi munyu;+ u nga tshuki u pfumelela leswaku munyu wa ntwanano+ wa Xikwembu xa wena wu pfumaleka egandzelweni ra wena ra mavele. U ta nyikela munyu swin’we ni gandzelo rin’wana ni rin’wana ra wena. 14  “‘Loko wo tshuka u nyikela eka Yehovha gandzelo ra mavele ra mihandzu leyi wupfaka ku sungula, u fanele u nyikela min’oko ya rihlaza leyi oxiweke hi ndzilo, leswi kandziweke swa mavele lamantshwa, swi va gandzelo ra mavele ra mihandzu ya wena leyi wupfaka ku sungula.+ 15  U fanele u chela mafurha ehenhla ka swona, u chela ni murhi wa risuna ehenhla ka swona. I gandzelo ra mavele.+ 16  Kutani muprista u fanele a mbulukisa xitsundzuxo+ xa swona, hileswaku swin’wana swa leswi kandziweke swa swona ni mafurha swin’we ni murhi wa swona hinkwawo wa risuna, swi va gandzelo ra Yehovha leri endliweke hi ndzilo.

Tinhlamuselo ta le hansi