Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Levhitika 16:1-34

16  Yehovha a ya emahlweni a byela Muxe endzhaku ka rifu ra vana vambirhi va Aroni hikwalaho ka ku tshinela emahlweni ka Yehovha kutani va fa.+  Yehovha a ya emahlweni a ku eka Muxe: “Byela Aroni makwenu leswaku a nga fanelanga a nghena minkarhi hinkwayo endhawini yo kwetsima,+ endzeni ka nguvu leyi sirhelelaka+ emahlweni ka xifunengeto lexi nga ehenhla ka Areka, leswaku a nga fi;+ hikuva ndzi ta humelela epapeni+ ehenhla ka xifunengeto.+  “Aroni u fanele a ta ni leswi landzelaka endhawini yo kwetsima:+ a ta ni nkunzi leyitsongo ya gandzelo ra xidyoho+ ni khuna ra gandzelo ro hisiwa.+  U fanele a ambala nguvu yo leha+ yo kwetsima ya ntsembyana naswona swirhangiso+ swa ntsembyana swi fanele swi va enyameni yakwe, u fanele a tikhama hi nceka wa ntsembyana,+ a titsondzela hi xifunengeto xa nhloko+ xa ntsembyana. I tinguvu to kwetsima.+ Kutani u fanele a hlamba nyama yakwe hi mati+ ivi a swi ambala.  “Kutani entshungwini wa vana va Israyele+ u fanele a teka swiphongo swimbirhi leswitsongo swi va swa gandzelo ra xidyoho+ ni khuna rin’we ri va ra gandzelo ro hisiwa.+  “Aroni u fanele a nyikela nkunzi ya gandzelo ra xidyoho lexi nga xakwe,+ naswona u fanele a kombela leswaku a rivaleriwa,+ yena+ ni va yindlu yakwe.+  “U fanele a teka swiphongo swimbirhi a swi yimisa emahlweni ka Yehovha enyangweni ya ntsonga wa nhlangano.  Aroni u fanele a hoxa vuhlolotwana+ eka swiphongo swimbirhi, vuhlolotwana byin’wana byi va bya Yehovha kasi vuhlolotwana lebyin’wana byi va bya Azazele.+  Kutani Aroni u fanele a nyikela xiphongo lexi vuhlolotwana+ byi nga xi ba leswaku xi va xa Yehovha, u fanele a xi endla gandzelo ra xidyoho.+ 10  Kambe xiphongo lexi vuhlolotwana byi nga xi ba leswaku xi va xa Azazele xi fanele xi yimisiwa emahlweni ka Yehovha xa ha hanya, xi kombeleriwa ku rivaleriwa leswaku xi rhumeriwa+ emananga xi va xa Azazele.+ 11  “Aroni u fanele a nyikela nkunzi ya gandzelo ra xidyoho lexi nga xakwe, a tikombelela ku rivaleriwa, yena ni yindlu yakwe; kutani u fanele a tlhava nkunzi ya gandzelo ra xidyoho lexi nga xa yena.+ 12  “U fanele a teka xo tamela ndzilo+ ealitarini+ leyi nga emahlweni ka Yehovha xi tele hi makala lama pfurhaka ndzilo ni mavoko+ yakwe hamambirhi ma tele hi xinun’hweriso lexinene xa murhi wa risuna,+ u fanele a swi tisa endzeni ka nguvu leyi sirhelelaka.+ 13  U fanele a chela ni murhi wa risuna ehenhla ka ndzilo emahlweni ka Yehovha,+ kutani papa ra murhi wa risuna ri fanele ri funengeta xifunengeto+ xa Areka leyi nga ehenhla ka Vumbhoni+ leswaku a nga fi. 14  “Kutani u fanele a teka ngati+ yin’wana ya nkunzi a yi xuva hi ritiho emahlweni ka xifunengeto etlhelo ra le vuxeni, naswona u ta xuva+ ngati yin’wana hi ritiho ka nkombo emahlweni ka xifunengeto.+ 15  “Kutani u fanele a tlhava xiphongo xa gandzelo ra xidyoho lexi nga xa vanhu,+ u fanele a tisa ngati ya xona endzeni ka nguvu leyi sirhelelaka,+ hi ngati+ ya xona u fanele a endla hilaha ku fanaka ni nkunzi; u fanele a yi xuva etlhelo ka xifunengeto ni le mahlweni ka xifunengeto. 16  “U fanele a kombela leswaku ndhawu yo kwetsima yi rivaleriwa malunghana ni ku nyama+ ka vana va Israyele ni ku tlula nawu ka vona ni swidyoho+ hinkwaswo swa vona; hi yona ndlela leyi a faneleke a endla ha yona eka ntsonga wa nhlangano, lowu tshamaka na vona exikarhi ka ku nyama ka vona. 17  “A ku na munhu un’wana la faneleke a va entsongeni wa nhlangano loko yena a nghena a ya kombela ku rivaleriwa endhawini yo kwetsima kukondza a huma; u fanele a tikombelela ku rivaleriwa+ yena ni yindlu yakwe ni nhlengeletano hinkwayo ya Israyele.+ 18  “U fanele a huma ealitarini+ leyi nga emahlweni ka Yehovha, kutani a yi kombelela ku rivaleriwa, u fanele a teka ngati yin’wana ya nkunzi ni ngati yin’wana ya xiphongo a yi tota etimhondzweni ta alitari matlhelo hinkwawo.+ 19  U fanele a n’wan’wasela+ eka yona ngati yin’wana hi ritiho ka nkombo, a yi tengisa naswona a yi hlawulekisa eku nyameni ka vana va Israyele. 20  “Loko a hete ku kombela ku rivaleriwa+ ka ndhawu yo kwetsima ni ntsonga wa nhlangano ni alitari, u fanele a tlhela a nyikela mbuti leyi hanyaka.+ 21  Aroni u fanele a tlhandleka movoko+ hamambirhi enhlokweni ya mbuti leyi hanyaka kutani a vula+ ehenhla ka yona swihoxo+ hinkwaswo swa vana va Israyele ni ku tlula nawu ka vona hinkwako ni swidyoho+ swa vona hinkwaswo, u fanele a swi veka enhlokweni ya mbuti,+ a yi fambisa yi ya emananga+ hi voko ra munhu la lunghekeke.+ 22  Mbuti yi fanele yi rhwala swihoxo+ swa vona hinkwaswo yi ya na swona etikweni leri nga kwandzasi,+ u fanele a fambisa mbuti yi ya emananga.+ 23  “Kutani Aroni u fanele a nghena entsongeni wa nhlangano a hluvula tinguvu ta ntsembyana leti a a tiambarile loko a nghena endhawini yo kwetsima, u fanele a ti veka ehansi kwalaho.+ 24  U fanele a hlamba nyama yakwe hi mati+ endhawini yo kwetsima+ ivi a ambala tinguvu+ takwe, a huma a ta endla gandzelo rakwe ro hisiwa+ ni gandzelo ro hisiwa+ ra vanhu naswona a kombela ku rivaleriwa ka yena ni vanhu.+ 25  U ta mbulukisa mafurha ya gandzelo ra xidyoho ealitarini.+ 26  “Loko ku ri loyi+ a nga fambisa xiphongo xi ya eka Azazele+ u fanele a hlantswa tinguvu takwe, u fanele a hlamba nyama yakwe hi mati+ kutani endzhaku ka sweswo a nga nghena enxaxeni. 27  “Hambiswiritano, u ta lerisa leswaku nkunzi ya gandzelo ra xidyoho ni xiphongo xa gandzelo ra xidyoho leswi ngati ya swona yi nga tisiwa leswaku ku ta komberiwa ku rivaleriwa hi yona endhawini yo kwetsima yi humeseriwa ehandle ka nxaxa; kutani va fanele va hisa madzovo ya swona ni nyama ya swona ni vulongo bya swona endzilweni.+ 28  Kutani loyi a swi hiseke u fanele a hlantswa tinguvu takwe, u fanele a hlamba nyama yakwe hi mati, endzhaku ka sweswo hi kona a nga nghenaka enxaxeni. 29  “Swi fanele swi va nawu wa hilaha ku nga riki na makumu eka n’wina:+ Hi n’hweti ya vunkombo esikwini ra vukhume ra n’hweti+ mi fanele mi xanisa mimoya-xiviri+ ya n’wina, a mi fanelanga mi endla ntirho+ wihi ni wihi, hambi ku ri munhu la tumbulukeke kwalaho kumbe muluveri la luveleke exikarhi ka n’wina. 30  Hikuva esikwini leri mi ta kombeleriwa ku rivaleriwa+ leswaku mi vuriwa lava tengeke. Mi ta tengisiwa eswidyohweni swa n’wina hinkwaswo emahlweni ka Yehovha.+ 31  I savata+ ya ku wisa hilaha ku heleleke eka n’wina, mi fanele mi xanisa mimoya-xiviri ya n’wina. I nawu wa hilaha ku nga riki na makumu. 32  “Kutani muprista la nga ta totiwa,+ loyi voko rakwe ri nga ta tatiwa hi matimba leswaku a va muprista,+ a va mutlhandlami+ wa tata wakwe u fanele a kombela ku rivaleriwa naswona a ambala tinguvu ta ntsembyana.+ I tinguvu to kwetsima.+ 33  U fanele a byi kombelela ku rivaleriwa vukwetsimelo byo kwetsima+ ni ntsonga+ wa nhlangano ni alitari,+ u ta swi kombelela ku rivaleriwa; ni vaprista ni vanhu hinkwavo va nhlengeletano u ta va kombelela ku rivaleriwa.+ 34  Lowu wu fanele wu va nawu wa hilaha ku nga riki na makumu eka n’wina,+ leswaku vana va Israyele va kombeleriwa ku rivaleriwa swidyoho hinkwaswo swa vona kan’we hi lembe.”+ Hiloko a endla hilaha Yehovha a leriseke Muxe hakona.

Tinhlamuselo ta le hansi