Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Levhitika 13:1-59

13  Yehovha a ya emahlweni a byela Muxe na Aroni a ku:  “Loko munhu o tshuka a huma swirhumbana kumbe rikhwekhwe+ kumbe ndzhosi enhlongeni ya nyama yakwe, kutani xi va vuvabyi bya nhlokonho+ enhlongeni ya nyama yakwe, u fanele a tisiwa eka Aroni lowa muprista kumbe eka un’wana wa vana vakwe lava nga vaprista.+  Kutani muprista u fanele a kambela vuvabyi lebyi nga enhlongeni ya nyama.+ Loko misisi leyi nga eka vuvabyi lebyi yi hundzuke yi va yo basa naswona vuvabyi byi languteka byi nghene enhlongeni ya nyama yakwe, i vuvabyi bya nhlokonho. Muprista u ta byi kambela kutani u ta n’wi vula la nga tengangiki.  Kambe loko ndzhosi wu ri wo basa enhlongeni ya nyama yakwe naswona wu languteka wu nga nghenanga enhlongeni, misisi yi nga hundzukanga yo basa, muprista u ta tshika+ vuvabyi masiku ya nkombo.  Muprista u fanele a tlhela a n’wi kambela hi siku ra vunkombo, kasi loko vuvabyi byi yimile, swi vula leswaku vuvabyi a byi hangalakanga ni nhlonge, muprista u ta tlhela a n’wi tshamisa a ri yexe+ masiku man’wana ya nkombo.  “Muprista u fanele a n’wi kambela ra vumbirhi hi siku ra vunkombo, loko vuvabyi byi nga ha ri byo basa naswona vuvabyi byi nga hangalakanga ni nhlonge, muprista u ta n’wi vula la tengeke. A ku ri rikhwekhwe. U fanele a hlantswa tinguvu takwe kutani a va la tengeke.  Kambe loko hakunene rikhwekhwe ri hangalake ni nhlonge endzhaku ka loko a humelele emahlweni ka muprista leswaku a ta vona loko a tengile, u fanele a humelela emahlweni ka muprista+ ra vumbirhi,  kutani muprista u ta kambela; loko rikhwekhwe ri hangalake ni nhlonge, muprista u fanele a n’wi vula la nga tengangiki. I nhlokonho.+  “Loko munhu o tshuka a va ni vuvabyi bya nhlokonho, u fanele a tisiwa eka muprista. 10  Kutani muprista u ta kambela;+ loko ku ri ni swirhumbana swo basa enhlongeni naswona swi hundzule misisi yi va yo basa ni nyama+ leyi nga riki na vuvabyi yi vonaka endzeni ka swirhumbana, 11  i nhlokonho+ leyi tshamaka yi ri kona enhlongeni ya nyama yakwe; muprista u ta n’wi vula la nga tengangiki. A nga fanelanga a n’wi tshamisa a ri yexe+ hikuva a nga tenganga. 12  Loko hakunene nhlokonho yi humelela enhlongeni kutani nhlokonho yi funengeta nhlonge hinkwayo hi vuvabyi, ku sukela enhlokweni ku ya emilengeni hinkwako laha mahlo ya muprista ma vonaka kona; 13  naswona muprista a kambela kutani waswivo, nhlokonho yi funengete nyama yakwe hinkwayo, u fanele a vula leswaku vuvabyi byi tengile. Hinkwabyo byi hundzuke byo basa. U tengile. 14  Kambe siku leri nyama leyi nga riki na vuvabyi yi nga ta humelela eka byona, u ta va a nga tenganga. 15  Muprista+ u fanele a vona nyama leyi nga riki na vuvabyi kutani u ta n’wi vula la nga tengangiki. Nyama leyi nga riki na vuvabyi a yi tenganga. I nhlokonho.+ 16  Kumbe loko nyama leyi nga riki na vuvabyi yo hundzuka yi va yo basa u fanele a ta eka muprista. 17  Muprista u ta n’wi kambela,+ kutani loko vuvabyi byi hundzuke byo basa, muprista u ta vula leswaku vuvabyi byi tengile. Yena u tengile. 18  “Malunghana ni nyama, loko ko tshuka ku huma rhumba+ enhlongeni ya yona kutani ri hola, 19  ivi ku huma swirhumbana swo basa endhawini ya rhumba kumbe ku huma ndzhosi wo tshwukanyana, u fanele a ya humelela eka muprista. 20  Muprista u ta kambela,+ kutani loko xi languteka xi nga nghenanga enhlongeni naswona misisi ya xona yi hundzuke yo basa, muprista u ta n’wi vula la nga tengangiki. I vuvabyi bya nhlokonho. Byi huma eka rhumba. 21  Kambe loko muprista a xi kambela, kutani waswivo, a ku na misisi yo basa eka xona, naswona xi nga nghenanga enhlongeni, xi hele matimba, muprista u ta n’wi tshamisa a ri yexe+ masiku ya nkombo. 22  Loko hakunene xi hangalaka ni nhlonge, muprista u ta n’wi vula la nga tengangiki. I vuvabyi. 23  Kambe loko ndzhosi wo yima endhawini ya wona, wu nga hangalaki, i ndzhumbelo+ wa rhumba; muprista u ta n’wi vula la tengeke.+ 24  “Kumbe loko ko tshuka ku va ni ndzhosi enhlongeni ya nyama wu vangiwa hi ndzilo, kutani nyama ya le ndzeni ka xivati yi va ndzhosi wo tshwukanyana kumbe wo basa, 25  muprista u ta wu kambela; loko misisi yi hundzuke yi va yo basa endzhosini naswona wu languteka wu nghene enhlongeni, i nhlokonho. Yi humelele exivatini, kutani muprista u ta n’wi vula la nga tengangiki. I vuvabyi bya nhlokonho. 26  Kambe loko muprista a wu kambela kutani waswivo, a ku na misisi yo basa endzhosini naswona a wu nghenanga enhlongeni naswona wu hele matimba, muprista u ta n’wi tshamisa a ri yexe masiku ya nkombo. 27  Kutani muprista u ta n’wi kambela hi siku ra vunkombo. Loko hakunene xi hangalaka ni nhlonge, muprista u ta n’wi vula la nga tengangiki. I vuvabyi bya nhlokonho. 28  Kambe loko ndzhosi wo yima endhawini ya wona, wu nga hangalaki ni nhlonge naswona wu hele matimba, i swirhumbana swa xivati; kutani muprista u ta n’wi vula la tengeke hikuva i ndzhumbelo wa xivati. 29  “Malunghana ni wanuna kumbe wansati, loko ko tshuka ku humelela vuvabyi enhlokweni kumbe exilepfini xa yoloye, 30  muprista+ u ta vona vuvabyi lebyi; kutani loko byi languteka byi nghene ngopfu enhlongeni, misisi yi ri ya xitshopana naswona yi nga talanga eka byona, muprista u ta vula leswaku munhu yoloye a nga tenganga. I ku tsuvuka ka misisi+ hi ndlela leyi nga tolovelekangiki. I nhlokonho ya nhloko kumbe ya xilepfu. 31  Kambe loko muprista o tshuka a vona vuvabyi bya ku tsuvuka ka misisi hi ndlela leyi nga tolovelekangiki, kutani waswivo, byi languteka byi nga nghenanga enhlongeni naswona ku nga ri na misisi ya ntima eka byona, muprista u ta byi tshika+ masiku ya nkombo+ vuvabyi bya ku tsuvuka ka misisi hi ndlela leyi nga tolovelekangiki. 32  Kutani muprista u fanele a kambela vuvabyi hi siku ra vunkombo; loko ku tsuvuka ka misisi hi ndlela leyi nga tolovelekangiki ku nga hangalakanga naswona ku nga humanga misisi ya xitshopana naswona ku tsuvuka ka misisi+ hi ndlela leyi nga tolovelekangiki ku nga nghenanga enhlongeni, 33  u ta n’wi byevula, kambe misisi leyi tsuvukeke hi ndlela leyi nga tolovelekangiki a nge yi byevuli;+ muprista u fanele a tshika misisi leyi tsuvukeke hi ndlela leyi nga tolovelekangiki masiku man’wana ya nkombo. 34  “Kutani muprista u ta kambela ku tsuvuka ka misisi hi ndlela leyi nga tolovelekangiki hi siku ra vunkombo; loko ku tsuvuka ka misisi hi ndlela leyi nga tolovelekangiki ku nga hangalakanga ni nhlonge, naswona ku languteka ku nga nghenanga enhlongeni, muprista u ta n’wi vula la tengeke,+ u ta hlantswa tinguvu takwe kutani a va la tengeke. 35  Kambe loko hakunene ku tsuvuka ka misisi hi ndlela leyi nga tolovelekangiki ku hangalaka ni nhlonge endzhaku ka ku tiyisekisiwa ka ku tenga kakwe, 36  muprista+ u ta n’wi kambela; loko ku tsuvuka ka misisi hi ndlela leyi nga tolovelekangiki ku hangalake ni nhlonge, muprista a nga fanelanga a kambisisa misisi ya xitshopana; a nga tenganga. 37  Kambe loko ku tsuvuka ka misisi hi ndlela leyi nga tolovelekangiki ku vonaka ku nga ha ri kona, naswona misisi ya ntima yi mirile eka byona, ku tsuvuka ka misisi hi ndlela leyi nga tolovelekangiki ku horile. U tengile, muprista u ta n’wi vula la tengeke.+ 38  “Malunghana ni wanuna kumbe wansati, loko xivati+ xo tshuka xi humelela enhlongeni ya nyama ya vona, swivati swo basa, 39  muprista+ u ta swi kambela; loko swivati swa nhlonge ya nyama ya vona swi kwalarile, i swirhumbana leswi nga riki na vuvabyi. Swi humile enhlongeni. U tengile. 40  “Malunghana ni wanuna, loko nhloko ya yena yo tshuka yi huma mpandla,+ i mpandla. U tengile. 41  Loko nhloko ya yena yo huma mpandla emahlweni, i mpandla ya le mahlweni ka nhloko. U tengile. 42  Kambe loko vuvabyi lebyi tshwukulukeke byo tshuka byi humelela empandleni ya le xikarhi ka nhloko kumbe ya le mahlweni ka nhloko, i nhlokonho leyi humelelaka empandleni ya le xikarhi ka nhloko yakwe kumbe ya le mahlweni ka nhloko yakwe. 43  Kutani muprista+ u fanele a n’wi kambela; loko ku hume swirhumbana swa vuvabyi lebyi tshwukulukeke empandleni ya le xikarhi kumbe ya le mahlweni ka nhloko swi languteka swi fana ni nhlokonho enhlongeni ya nyama, 44  u vabya hi nhlokonho. A nga tenganga. Muprista u ta n’wi vula la nga tengangiki. Vuvabyi byakwe byi le nhlokweni yakwe. 45  Loko ku ri loyi a nga ni vuvabyi bya nhlokonho, tinguvu takwe ti ta handzuriwa+ naswona nhloko yakwe yi nga kamiwi,+ u fanele a funengeta malepfu+ ya le henhla ka nomu kutani a huwelela a ku, ‘A ndzi tenganga, a ndzi tenganga!’+ 46  U ta va la nga tengangiki masiku hinkwawo lawa vuvabyi byi nga ta va eka yena. A nga tenganga. U fanele a tshama a ri swakwe. U ta tshama ehandle ka nxaxa.+ 47  “Malunghana ni nguvu, loko vuvabyi bya nhlokonho byo tshuka byi humelela eka yona, ku nga ha va eka nguvu ya voya kumbe eka nguvu ya ntsembyana, 48  kumbe engotini+ leyi huleriwaka yi ya ehansi kumbe engotini leyi huleriwaka yi hingakanya ya ntsembyana ni ya voya kumbe edzobyeni kumbe eka nchumu wihi ni wihi lowu endliweke hi dzovo,+ 49  kutani vuvabyi bya rihlaza ra xitshopana kumbe byo tshwuka byi humelela engubyeni kumbe edzobyeni kumbe engotini leyi huleriwaka yi ya ehansi kumbe engotini leyi huleriwaka yi hingakanya kumbe eka xilo xin’wana ni xin’wana xa dzovo, i vuvabyi bya nhlokonho, byi fanele byi kombiwa muprista. 50  Muprista+ u ta kambela vuvabyi lebyi, kutani u ta tshika+ vuvabyi masiku ya nkombo. 51  Loko a ta va a kambele vuvabyi lebyi hi siku ra vunkombo leswaku vuvabyi byebyo byi hangalakile ni nguvu kumbe ni ngoti leyi huleriwaka yi ya ehansi kumbe ni ngoti+ leyi huleriwaka yi hingakanya kumbe ni dzovo leri endleriweke ku tirhisiwa kun’wana ni kun’wana, vuvabyi byebyo i nhlokonho+ leyi dlayaka. A byi tenganga. 52  U ta hisa nguvu kumbe ngoti leyi huleriwaka yi ya ehansi kumbe ngoti leyi huleriwaka yi hingakanya, leswi nga evoyeni kumbe entsembyaneni+ kumbe eka xilo xin’wana ni xin’wana xa dzovo lexi vuvabyi byi nga ta humelela eka xona, hikuva i nhlokonho leyi dlayaka.+ Xi fanele xi hisiwa endzilweni. 53  “Kambe loko muprista a kambela, kutani waswivo, vuvabyi byi nga hangalakanga ni nguvu kumbe ni ngoti leyi huleriwaka yi ya ehansi kumbe ni ngoti leyi huleriwaka yi hingakanya kumbe ni xilo xin’wana ni xin’wana xa dzovo,+ 54  muprista u ta tlhela a lerisa leswaku ku hlantswiwa lexi nga ni vuvabyi, naswona u ta xi tshika masiku man’wana ya nkombo. 55  Kutani muprista u ta kambela vuvabyi endzhaku ka ku va xi hlantswiwile, loko vuvabyi byi nga hundzulanga ku languteka ka byona kambe vuvabyi byi nga hangalakanga, a xi tenganga. U fanele u xi hisa endzilweni. I xivati xa le hansi exitiveni xa tiharani leti nga tshama erivaleni endzeni ka xona kumbe ehandle ka xona. 56  “Kambe loko muprista a kamberile, kutani waswivo, vuvabyi byi hele matimba endzhaku ka loko byi hlantswiwile, u ta byi handzula engubyeni kumbe edzobyeni kumbe engotini leyi huleriwaka yi ya ehansi kumbe engotini leyi huleriwaka yi hingakanya. 57  Hambiswiritano, loko bya ha humelela engubyeni kumbe engotini leyi huleriwaka yi ya ehansi kumbe engotini+ leyi huleriwaka yi hingakanya kumbe eka xilo xin’wana ni xin’wana xa dzovo, swi vula leswaku bya hangalaka. Xilo xihi ni xihi lexi vuvabyi byi nga eka xona u fanele u xi hisa+ endzilweni. 58  Malunghana ni nguvu kumbe ngoti leyi huleriwaka yi ya ehansi kumbe ngoti leyi huleriwaka yi hingakanya kumbe xilo xin’wana ni xin’wana xa dzovo lexi u nga ta xi hlantswa, loko vuvabyi byi nyamalarile eka swona, swi ta hlantswiwa ra vumbirhi; kutani swi ta va swi tengile. 59  “Lowu i nawu wa vuvabyi bya nhlokonho engubyeni ya voya kumbe ya ntsembyana+ kumbe engotini leyi huleriwaka yi ya ehansi kumbe engotini leyi huleriwaka yi hingakanya kumbe eka xilo xin’wana ni xin’wana xa dzovo, leswaku xi ta vuriwa lexi tengeke kumbe xi vuriwa lexi nga tengangiki.”

Tinhlamuselo ta le hansi