Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Hosiya 10:1-15

10  “Israyele i murhi wa vhinya+ lowu kuleke. U tshamela ku humesa mihandzu yakwe.+ U andzise tialitari ta yena+ hi ku ya hi mihandzu ya yena yo tala. Va yimisa tiphuphu letinene,+ hi ku ya hi vunene bya tiko.  Mbilu ya vona yi ni vukanganyisi;+ sweswi va ta kumiwa va ri ni nandzu. “Ku ni loyi a nga ta tshova tialitari ta vona; u ta teka tiphuphu ta vona.+  Hikuva sweswi va ta ku, ‘A hi na hosi,+ hikuva Yehovha a hi n’wi chavanga. Loko ku ri hosi, yi ta hi endlela yini?’  “Va vula marito, va endla swihlambanyo swa mavunwa,+ va endla ntwanano;+ vuavanyisi byi hluke kukota ximilana lexi nga ni chefu emigerhweni ya le nhoveni.+  Vaaki va Samariya va ta chavisiwa hi xifaniso xa hava xa rhole xa Beta-avheni;+ hikuva vanhu va xona va ta xi rilela, swin’we ni vaprista va xona va xikwembu ximbe lava a va hamba va xi tsakela, hikwalaho ka ku vangama ka xona, hikuva xi ta va xi ye evukhumbini.+  Ku ni loyi a nga ta xi tisa eAsiriya xi va nyiko eka hosi leyikulu.+ Efrayimi u ta va ni tingana,+ kutani Israyele u ta khomiwa hi tingana hi kungu ra xona.+  Kunene Samariya ni hosi ya yena va ta miyetiwa,+ ku fana ni xirhabyana lexi khatlukeke lexi nga le henhla ka mati.  Xidyoho xa Israyele+ xi ta lovisiwa, ku fana ni tindhawu leti tlakukeke ta Beta-avheni.+ Mitwa ni swigatlu+ swi ta va ehenhla ka tialitari+ ta vona. Entiyisweni vanhu va ta byela tintshava va ku, ‘Hi funengeteni,’ kutani eka switsunga va ku, ‘Hi weleni!’+  “Wena Israyele, u dyohile+ ku sukela emasikwini ya Gibiya.+ Va yime kona va nga fambi. Nyimpi yo lwa ni vana lava nga lulamangiki a yi va kumanga eGibiya.+ 10  Loko ndzi swi navela ndzi ta va laya.+ Kunene vanhu va ta hlengeletana ku lwa na vona loko va boheleriwa eswihoxweni swa vona swimbirhi.+ 11  “Efrayimi a a ri thokazi leri leteriweke leri a ri rhandza ku hula;+ loko ku ri mina, ndzi hundze enhan’wini ya yena leyi langutekaka. Ndzi khandziyise munhu eka Efrayimi.+ Yuda wa rima;+ Yakobe u n’wi fayela mabuwu.+ 12  Tibyaleleni mbewu hi ku lulama;+ tshovelani hi ku fambisana ni musa wa rirhandzu.+ Tirimeleni misava leyi rimekaka,+ loko ku ri ni nkarhi wo lavisisa Yehovha kukondza a fika,+ a mi letela hi ku lulama.+ 13  “N’wina mi rime vuhomboloki.+ Mi tshovele leswi nga lulamangiki.+ Mi dye mihandzu ya vuxisi,+ hikuva mi tshembe ndlela ya n’wina,+ eka vunyingi bya vanhu va n’wina lava nga ni matimba.+ 14  Exikarhi ka vanhu va wena ku pfuke hasahasa,+ miti ya wena leyi tiyisiweke yi ta phangiwa hinkwayo,+ ku fana ni ku phangiwa ka yindlu ya Arabela hi Xalimani, esikwini ra nyimpi loko manana a fayeteriwa etlhelo ka vana va yena.+ 15  Oho Bethele, munhu u ta mi endla hi ndlela leyi, hikwalaho ka vubihi bya n’wina lebyikulu ngopfu.+ Loko vurhonga byi tlhandluka, kunene hosi ya Israyele yi ta miyetiwa.”+

Tinhlamuselo ta le hansi