Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Genesa 8:1-22

8  Endzhaku ka sweswo Xikwembu xi tsundzuka+ Nowa ni xivandzana xin’wana ni xin’wana ni xifuwo xin’wana ni xin’wana lexi a xi ri na yena engalaveni,+ Xikwembu xi endla leswaku mheho yi hunga ehenhla ka misava, kutani mati ma sungula ku hunguteka.+  Swihlovo swa xidziva+ xa mati ni tinyangwa+ ta ndhambi ya matilo swi pfariwa, hiloko maboboma ya mpfula ma siveriwa.  Mati ma sungula ku vohla emisaveni, ma vohla hakatsongo-tsongo; naswona loko ku hele masiku ya 150, mati a ma hungutekile.+  Hi n’hweti ya vunkombo, hi siku ra vu-17 ra n’hweti, ngalava+ yi yima ehenhla ka tintshava ta Ararati.+  Mati ma ya emahlweni ma hunguteka hakatsongo-tsongo kukondza ku va n’hweti ya vukhume. Hi n’hweti ya vukhume, hi siku ro sungula ra n’hweti, tinhlohlori ta tintshava ti humelela.+  Kuteloko ku hele masiku ya 40, Nowa a pfula fasitere+ ra ngalava leri a a ri endlile.  Endzhaku ka sweswo a rhumela wukuwuku+ ehandle, kutani ri hahela ehandle, ri famba ri tlhela ri vuya, ku fikela loko mati ma phya emisaveni.  Endzhakunyana a rhumela tuva+ ku ya vona loko mati ma hungutekile ehenhla ka vuandlalo bya misava.  Tuva a ri kumanga ndhawu yo kandziya hi ricondzo ra rona leswaku ri wisa eka yona, kutani ri tlhelela ka yena engalaveni hikuva mati a ma ha ri ehenhla ka vuandlalo bya misava+ hinkwayo. Hiloko a humesa voko a ri teka a ri nghenisa laha a a ri kona endzeni ka ngalava. 10  Kutani a rindza masiku man’wana ya nkombo, a tlhela a rhumela tuva nakambe ehandle ka ngalava. 11  Endzhakunyana tuva ri ta eka yena hi nkarhi wa madyambu, kutani waswivo, enon’wini wa rona a ku ri ni tluka+ ra mutlhwari leri a ra ha ku khiwa, hikwalaho Nowa a swi tiva leswaku mati ma hungutekile ehenhla ka misava.+ 12  A ya emahlweni a rindza masiku man’wana ya nkombo. Kutani a rhumela tuva, kambe a ra ha tlhelelanga+ eka yena. 13  Kutani hi lembe+ ra vu-601, hi n’hweti yo sungula, hi siku ro sungula ra n’hweti, mati ma phya ehenhla ka misava; Nowa a susa lwangu ra ngalava a languta, kutani vuandlalo bya misava a byi omile.+ 14  Hi n’hweti ya vumbirhi, hi siku ra vu-27 ra n’hweti, misava a yi omile.+ 15  Kutani Xikwembu xi vulavula na Nowa xi ku: 16  “Huma engalaveni, wena ni nsati wa wena ni vana va wena ni vasati va vana va wena lava u nga na vona.+ 17  Xivumbiwa xin’wana ni xin’wana lexi hanyaka lexi u nga na xona xa muxaka wun’wana ni wun’wana wa nyama,+ xa swivumbiwa leswi hahaka+ ni swiharhi+ leswi famba-fambaka ehenhla ka misava,+ huma na swona, hikuva swi fanele ku tata misava, swi tswalana swi andza emisaveni.”+ 18  Hiloko Nowa a huma, ni vana+ vakwe ni nsati wakwe ni vasati va vana vakwe, na vona va huma na yena. 19  Xivumbiwa xin’wana ni xin’wana lexi hanyaka, xiharhi xin’wana ni xin’wana lexi famba-fambaka, ni xivumbiwa xin’wana ni xin’wana lexi hahaka, hinkwaswo leswi famba-fambaka ehenhla ka misava, swi huma engalaveni+ hi ku ya hi mindyangu ya swona. 20  Kutani Nowa a akela Yehovha alitari+ naswona a teka swin’wana swa swiharhi+ eka leswi baseke ni le ka swivumbiwa leswi hahaka+ leswi baseke, a humesa gandzelo ro hisiwa ealitarini.+ 21  Yehovha a nun’hwetela nun’hwelo+ lowunene, kutani Yehovha a ku embilwini+ yakwe: “A ndzi nge he tlheli ndzi rhukana misava+ hikwalaho ka munhu, hikuva mboyamelo+ wa mbilu ya munhu wu bihile ku sukela evuntshweni+ byakwe; naswona a ndzi nge he tlheli ndzi twisa xilo xin’wana ni xin’wana lexi hanyaka ku vava hilaha ndzi endleke+ hakona. 22  Hi masiku hinkwawo ya misava, ku byariwa ka timbewu ni ku tshovela, ku titimela ni ku hisa, ximumu ni xixika, nhlikanhi ni vusiku, a swi nge pfumaleki.”+

Tinhlamuselo ta le hansi