Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Genesa 41:1-57

41  Eku heleni ka malembe mambirhi Faro a lorha+ a yime ekusuhi ni nambu wa Nayili.  Kutani ku tlhandluka tihomu ta nkombo enambyeni wa Nayili leti langutekaka ti sasekile naswona ti nonile, ti dya exikarhi ka byanyi+ bya nambu wa Nayili.  Tihomu tin’wana ta nkombo ti tlhandluka endzhaku ka tona ti huma enambyeni wa Nayili, ti bihile naswona ti ondzile,+ kutani ti yima etlhelo ka tihomu leti nga eribuweni ra nambu wa Nayili.  Tihomu leti a ti bihile naswona ti ondzile, ti dya tihomu ta nkombo leti a ti sasekile naswona ti nonile.+ Hiloko Faro a pfuka.+  Kambe a tlhela a etlela a lorha ra vumbirhi. Kutani ku humelela min’oko ya nkombo erihlangeni rin’we, yi veke kahle naswona yi ri yinene.+  Ku tlhela ku humelela min’oko ya nkombo, yi larile naswona yi vavuriwe hi mheho+ ya le vuxeni, yi kula endzhaku ka yona.+  Kutani min’oko ya nkombo yo lala yi mita min’oko ya nkombo yo nona leyi vekeke tindzoho+ to tala. Hiloko Faro a pfuka kutani a kuma leswaku a ku ri norho.  Nimixo moya wa yena a wu karhatekile.+ Kutani a rhumela rito leswaku ku vitaniwa vaprista hinkwavo va Egipta+ lava endlaka masalamusi ni tintlhari+ ta kona hinkwato, Faro a va rungulela milorho ya yena.+ Kambe a ku nga ri na loyi a nga yi hlamuselaka eka Faro.  Kutani murhangeri wa vacheri va vhinyo a vulavula na Faro+ a ku: “Namuntlha+ ndzi boxa swidyoho swa mina. 10  Faro a a hlundzukele malandza+ ya yena. Kutani a ndzi nghenisa ekhotsweni ra yindlu ya murhangeri wa varindzi,+ mina ni murhangeri wa vabaki. 11  Endzhaku ka sweswo hi lorhe norho hi vusiku byin’we, mina na yena. Ha un’we wa hina u lorhe norho lowu nga ni nhlamuselo+ ya wona. 12  Kwalaho a hi ri ni jaha ra Muheveru,+ nandza wa murhangeri wa varindzi.+ Loko hi n’wi rungulele milorho,+ u hi hlamusele yona. U hlamusele ha un’we wa hina hi ku ya hi norho wakwe. 13  Kutani swi endleka hilaha a hlamuseleke hakona. Mina a ndzi tlherisela exikhundlheni+ xa mina, kambe yena a n’wi hayeka.”+ 14  Kutani Faro a rhumela rito leswaku ku ya vitaniwa Yosefa+ a huma ekhotsweni leri nga khele+ a tisiwa eka yena hi ku hatlisa. Hikwalaho a byevula+ naswona a cinca mikhancu+ ya yena, a ya nghena eka Faro. 15  Kutani Faro a ku eka Yosefa: “Ndzi lorhe norho kambe ku hava la nga wu hlamuselaka. Ndzi twe ku vuriwa leswaku wena wa swi kota ku yingisa norho u tlhela u wu hlamusela.”+ 16  Yosefa a hlamula Faro a ku: “A ku fanelanga ku langutiwa mina! Xikwembu xi ta tivisa Faro+ leswinene.” 17  Faro a ya emahlweni a vulavula na Yosefa a ku: “Enorhweni wa mina a ndzi yime eribuweni ra nambu wa Nayili. 18  Kutani ku tlhandluka tihomu ta nkombo enambyeni wa Nayili ti nonile naswona ti ri ni xivumbeko xo saseka, ti sungula ku dya byanyi+ exikarhi ka Nayili. 19  Kutani ku tlhandluka tihomu tin’wana ta nkombo endzhaku ka tona, ti tsanile naswona xivumbeko xa tona xi bihe ngopfu, ti ondzile.+ A ndzi si tshama ndzi vona tihomu to fana na tona hi ku biha etikweni hinkwaro ra Egipta. 20  Tihomu to ondza, to biha ti dya tihomu+ ta nkombo leto sungula to nona. 21  Kutani leto nona ti nghena emakhwirini ya leto ondza, kambe a swi nga vonaki leswaku ti nghene emakhwirini ya tona, hikuva ku languteka ka tona a ka ha bihe ku fana ni le ku sunguleni.+ Hiloko ndzi pfuka. 22  “Endzhaku ka sweswo ndzi vona enorhweni wa mina ku ri ni min’oko ya nkombo yi humelela erihlangeni rin’we, yi veke kahle naswona yi ri yinene.+ 23  Kutani a ku ri ni min’oko ya nkombo leyi khwanyaneke, yi larile, yi vavuriwe hi mheho+ ya le vuxeni yi mila endzhaku ka yona. 24  Hiloko min’oko yo lala yi mita min’oko leyinene ya nkombo leyi nga ni tindzoho.+ Kutani ndzi byela vaprista+ lava endlaka masalamusi malunghana na yona, kambe a nga kona ni un’we la ndzi hlamuseleke.”+ 25  Kutani Yosefa a ku eka Faro: “Norho wa Faro i wun’we. Leswi Xikwembu xa ntiyiso xi swi endlaka xi swi byele Faro.+ 26  Tihomu letinene ta nkombo i malembe ya nkombo. Hilaha ku fanaka min’oko leyinene ya nkombo leyi nga ni tindzoho i malembe ya nkombo. Norho i wun’we. 27  Tihomu ta nkombo leto ondza, ni leto biha leti humeleleke endzhaku ka tona i malembe ya nkombo; ni min’oko ya nkombo leyi nga riki na nchumu, leyi vavuriweke hi mheho+ ya le vuxeni, ku ta va malembe ya nkombo ya ndlala.+ 28  Hi wona nchumu lowu ndzi wu byeleke Faro: Leswi Xikwembu xa ntiyiso xi swi endlaka xi endle leswaku Faro a swi vona.+ 29  “Ku ta malembe ya nkombo ya ndzalo leyikulu etikweni hinkwaro ra Egipta. 30  Kambe endzhaku ka wona ku ta humelela malembe ya nkombo ya ndlala, kunene ndzalo hinkwayo etikweni ra Egipta yi ta rivariwa kutani ndlala yi ta hlasela tiko.+ 31  Ndzalo leyi nga tshama yi va kona etikweni a yi nge he tiviwi hikwalaho ka ndlala leyi nga ta va kona endzhaku ka sweswo, hikuva entiyisweni yi ta va leyikulu ngopfu. 32  Leswi norho wu phindhiweke kambirhi eka Faro swi vula leswaku nchumu lowu wu simekiwe hilaha ku tiyeke hi Xikwembu+ xa ntiyiso, naswona Xikwembu xa ntiyiso xi ta swi endla hi ku hatlisa.+ 33  “Kutani sweswi Faro a a lave munhu la fanelekaka wo tlhariha a n’wi veka ehenhla ka tiko ra Egipta.+ 34  Faro a a teke goza a hlawula valanguteri ehenhla ka tiko,+ naswona u fanele ku teka xiphemu xin’we eka swiphemu swa ntlhanu swa tiko ra Egipta hi nkarhi wa ndzalo+ wa malembe ya nkombo. 35  A va hlengelete swakudya hinkwaswo swa malembe lamanene lama taka, naswona a va hlengelete tindzoho evokweni ra Faro ti va swakudya emitini,+ va fanele va swi hlayisa. 36  Swakudya sweswo swi ta va mphakelo wa tiko emalembeni ya nkombo ya ndlala lama nga ta va kona etikweni ra Egipta,+ leswaku tiko ri nga herisiwi hi ndlala.”+ 37  Nchumu lowu wu ve wunene ematihlweni ya Faro ni malandza+ ya yena hinkwawo. 38  Kutani Faro a ku eka malandza yakwe: “Xana a nga kumiwa munhu un’wana la fanaka ni loyi, loyi a nga ni moya wa Xikwembu?”+ 39  Endzhaku ka sweswo Faro a ku eka Yosefa: “Leswi Xikwembu xi ku vangeleke leswaku u tiva swilo leswi hinkwaswo,+ a ku na un’wana la fanelekaka ni la tlhariheke ku fana na wena.+ 40  Wena u ta va ehenhla ka yindlu+ ya mina, naswona vanhu va mina hinkwavo va ta ku yingisa hi ku helela.+ Ntsena ndzi ta va lonkulu eka wena+ exiluvelweni.” 41  Faro a engeta a ku eka Yosefa: “Ndzi ku veka ehenhla ka tiko hinkwaro ra Egipta.”+ 42  Hiloko Faro a susa xingwavila xa mfungho+ evokweni rakwe a xi vehela evokweni ra Yosefa, a n’wi ambexa tinguvu ta ntsembyana wo vevuka, a n’wi vehela ni sindza ra nsuku enhan’wini+ ya yena. 43  Ku tlula kwalaho, a n’wi khandziyisa ekalichini ya vumbirhi yo xiximeka leyi a a ri na yona+ leswaku va ta huwelela emahlweni ka yena va ku, “Avhureki!” hikwalaho va n’wi veka a lawula tiko hinkwaro ra Egipta. 44  Ku tlula kwalaho Faro a ku eka Yosefa: “Hi mina Faro, kambe handle ka mpfumelelo wa wena a ku na munhu ni un’we la nga ta tlakusa voko ra yena kumbe nenge wa yena etikweni hinkwaro ra Egipta.”+ 45  Endzhaku ka sweswo Faro a thya Yosefa vito ra Zafenati-paneya naswona a n’wi nyika Asenati,+ n’wana wa Potifera muprista wa le Oni,+ a va nsati wa yena. Yosefa a huma a famba etikweni ra Egipta.+ 46  Yosefa a a ri ni malembe ya 30 hi vukhale+ loko a yima emahlweni ka Faro hosi ya Egipta. Kutani Yosefa a huma emahlweni ka Faro a rhendzeleka hinkwako etikweni ra Egipta. 47  Emalembeni ya nkombo ya ndzalo tiko ri humesa swo tala.+ 48  Kutani a hambeta a hlengeleta hinkwaswo swakudya swa malembe ya nkombo leswi veke kona etikweni ra Egipta kutani a swi veka emitini.+ Swakudya swa nsimu leyi a yi rhendzele muti a a swi veka exikarhi ka wona.+ 49  Yosefa a hambeta a hlengeleta mavele yo tala ngopfu,+ a ma tele kukota sava ra lwandle ku fikela loko eku heteleleni va tshika ku ma hlaya, hikuva a ma nga ha hlayeki.+ 50  Malembe ya ndlala ma nga si fika, Yosefa a velekeriwa vana+ vambirhi lava Asenati n’wana wa Potifera muprista wa le Oni a nga n’wi tswalela vona. 51  Yosefa a thya lowa mativula vito ra Manase,+ hikuva, hi ku vula ka yena, “Xikwembu xi endle leswaku ndzi rivala ku karhateka ka mina hinkwako ni yindlu hinkwayo ya tatana.”+ 52  Lowa vumbirhi a n’wi thya vito ra Efrayimi,+ hikuva, hi ku vula ka yena, “Xikwembu xi ndzi andzisile etikweni ra vusiwana+ bya mina.” 53  Kutani malembe ya nkombo ya ndzalo lama nga va kona etikweni ra Egipta ma hela+ hakatsongo-tsongo, 54  hiloko malembe ya nkombo ya ndlala ma sungula ku va kona hilaha Yosefa a vuleke+ hakona. Kutani ku va ni ndlala etikweni hinkwaro, kambe xinkwa+ a xi kumeka etikweni hinkwaro ra Egipta. 55  Eku heteleleni tiko hinkwaro ra Egipta ri hlaseriwa hi ndlala swinene kutani vanhu va sungula ku rilela Faro va lava xinkwa.+ Kutani Faro a ku eka Vaegipta hinkwavo: “Yanani eka Yosefa. Xin’wana ni xin’wana lexi a nga ta mi byela xona, xi endleni.”+ 56  Ndlala yi va kona ehenhla ka vuandlalo hinkwabyo bya misava.+ Kutani Yosefa a sungula ku pfula switlati hinkwaswo swa mavele leswi a swi ri exikarhi ka vona a xavisela Vaegipta,+ tanihi leswi ndlala a yi ri yikulu etikweni ra Egipta. 57  Ku tlula kwalaho, vanhu va misava hinkwayo va ta aEgipta va ta xava eka Yosefa hikuva ndlala a yi ri yikulu emisaveni+ hinkwayo.

Tinhlamuselo ta le hansi