Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Genesa 39:1-23

39  Loko ku ri Yosefa, u rhelerisiwe aEgipta,+ kutani Potifaro,+ mutirhi wa le hubyeni ya Faro, murhangeri wa varindzi wa Muegipta, a n’wi xava evokweni ra Vaiximayele+ lava nga n’wi rhelerisela kwalaho.  Kambe Yehovha a va na Yosefa, lerova a va munhu+ la humelelaka naswona a va wa le henhla endlwini ya n’wini wakwe wa Muegipta.  N’wini wa yena a swi vona leswaku Yehovha a a ri na yena nileswaku hinkwaswo leswi a a swi endla, Yehovha a a swi humelerisa evokweni ra yena.  Yosefa a hambeta a kuma ku tsakeriwa ematihlweni ya n’wini wakwe naswona a hamba a n’wi tirhela, lerova a n’wi veka a lawula yindlu+ ya yena, ni hinkwaswo leswi a swi ri swa yena a swi nyiketa evokweni rakwe.  Ku sukela loko a vekiwile ku lawula yindlu ya yena ni ku langutela hinkwaswo leswi a swi ri swa yena, Yehovha a hambeta a katekisa yindlu ya Muegipta hikwalaho ka Yosefa, naswona mikateko ya Yehovha yi va eka hinkwaswo leswi a a ri na swona endlwini ni le masin’wini.+  Hinkwaswo leswi a swi ri swa yena a hetelela hi ku swi siya evokweni+ ra Yosefa; a a nga swi tivi leswi a a ri na swona handle ka xinkwa lexi a a xi dya. Ku tlula kwalaho, Yosefa a kula a ri ni xivumbeko xo saseka naswona a languteka a sasekile.  Endzhaku ka swilo leswi nsati wa n’wini wa yena a tlakusela mahlo+ eka Yosefa a ku: “Etlela na mina.”+  Kambe a a tshamela ku ala,+ a byela nsati wa n’wini wa yena a ku: “N’wini wanga a nga swi tivi leswi ndzi nga na swona endlwini, naswona hinkwaswo leswi a nga na swona u swi veke evokweni+ ra mina.  A nga kona lonkulu ku ndzi tlula endlwini leyi, naswona a nga ndzi alelanga nchumu handle ka wena ntsena, hikuva u nsati+ wa yena. Kutani ndzi nga byi endlisa ku yini vubihi lebyi lebyikulu ndzi dyohela Xikwembu+ hakunene?” 10  Kutani loko a vulavule na Yosefa siku ni siku leswaku a etlela na yena, a tshama na yena,+ a nga n’wi yingisanga. 11  Kambe esikwini leri ku fana ni masiku man’wana, a nghena endlwini yakwe ku ya endla ntirho wakwe, naswona a ku nga ri na munhu wa vanhu va yindlu loyi a a ri endlwini.+ 12  Kutani nsati wa n’wini wa yena a n’wi khoma hi nguvu+ ya yena, a ku: “Etlela na mina!”+ Kambe yena a siya nguvu ya yena evokweni rakwe a baleka a humela ehandle.+ 13  Loko a vona leswaku u siye nguvu yakwe evokweni ra yena a balekela ehandle, 14  a huwelela vanhu va yindlu a ku eka vona: “Vonani! U hi tisele munhu, Muheveru, leswaku a ta hi endla xihlekiso. U tile a lava ku etlela na mina, kambe ndzi huwelela hi rito lerikulu.+ 15  Loko a ndzi twa ndzi tlakusa rito ra mina ndzi huwelela, a siya nguvu ya yena etlhelo ka mina a baleka a humela ehandle.” 16  Endzhaku ka sweswo a hlayisa nguvu ya Yosefa etlhelo kakwe ku fikela loko n’wini wakwe a vuya endlwini+ yakwe. 17  Kutani a vulavula na yena hi marito lawa, a ku: “Nandza wa Muheveru loyi u hi tiseleke yena u tile a ta ndzi endla xihlekiso. 18  Kambe kuteloko ndzi tlakusa rito ndzi huwelela, a siya nguvu ya yena etlhelo ka mina a baleka a humela ehandle.”+ 19  Vuyelo byi ve leswaku loko n’wini wakwe a twa marito ya nsati wakwe lawa a n’wi byeleke wona a ku: “Nandza wa wena u ndzi endle leswi ni leswi,” hiloko a hlundzuka ngopfu.+ 20  Kutani n’wini wa Yosefa a n’wi teka a n’wi nyiketa endlwini ya khotso, endhawini leyi vakhotsiwa va hosi a va pfaleriwa eka yona, a tshama kwalaho, endlwini+ ya khotso. 21  Hambiswiritano, Yehovha a hambeta a va na Yosefa naswona a n’wi engetela musa wa rirhandzu ni ku endla leswaku a kuma ku tsakeriwa ematihlweni ya mulanguteri lonkulu wa yindlu+ ya khotso. 22  Kutani mulanguteri lonkulu wa yindlu ya khotso a nyikela vakhotsiwa hinkwavo lava a va ri endlwini ya khotso evokweni ra Yosefa; hinkwaswo leswi a va swi endla hi yena loyi a a lerisa leswaku swi endliwa.+ 23  Mulanguteri wa yindlu ya khotso a a nga ha languteli nchumu, hikuva Yehovha a a ri na Yosefa ni leswi a a swi endla, Yehovha a a endla leswaku swi humelela.+

Tinhlamuselo ta le hansi