Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Genesa 30:1-43

30  Loko Rahele a vona leswaku a nga n’wi tswalelanga Yakobe vana, Rahele a va ni vukwele eka makwavo wa xisati, a ku eka Yakobe:+ “Ndzi nyike vana, loko swi nga ri tano ndzi ta va wansati+ loyi a feke.”  Hiloko Yakobe a hlundzukela Rahele swinene, a ku:+ “Xana ndzi le matshan’weni ya Xikwembu lexi ku tsoneke mbhandzu wa khwiri?”+  Kutani yena a ku: “Hi loyi Biliha+ hlonga ra mina ra xisati. Tivana na yena leswaku a ta velekela ematsolweni ya mina, leswaku na mina ndzi ta kuma vana eka yena.”+    Hiloko a n’wi nyika Biliha nandza wakwe wa xisati a va nsati wakwe, kutani Yakobe a tivana na yena.+  Biliha a tika kutani hi ku famba ka nkarhi a tswalela Yakobe n’wana.+  Kutani Rahele a ku: “Xikwembu xi ve muavanyisi+ wa mina naswona xi yingise rito ra mina, xi ndzi nyika n’wana.” Hi yona mhaka leyi a nga n’wi thya vito ra Dani.+  Biliha nandza wa Rahele a tika nakambe, hi ku famba ka nkarhi a tswalela Yakobe n’wana wa vumbirhi.  Kutani Rahele a ku: “Ndzi lwe nyimpi yo nonon’hwa ni makwerhu. Ndzi tlhele ndzi hlula!” Kutani a n’wi thya vito ra Neftali.+  Loko Leya a vona leswaku a nga ha veleki, a teka Zilpa nandza wakwe wa xisati a n’wi nyika Yakobe a va nsati wakwe.+ 10  Hi ku famba ka nkarhi Zilpa nandza wa Leya a tswalela Yakobe n’wana. 11  Kutani Leya a ku: “I nkateko lowukulu!” Kutani a n’wi thya vito ra Gadi.+ 12  Endzhaku ka sweswo, Zilpa nandza wa Leya a tswalela Yakobe n’wana wa vumbirhi. 13  Kutani Leya a ku: “Ndzi tsakile hakunene! Hikuva kunene vaxisati va ta ndzi vula loyi a tsakeke.”+ Kutani a n’wi thya vito ra Axere.+ 14  Hiloko Ruveni+ a rhendzeleka hi nkarhi wa ku tshovela+ koroni, kutani a kuma timandrake emasin’wini. A ti tisa eka Leya mana wakwe. Rahele a ku eka Leya: “Ndzi kombela u ndzi nyika tin’wana ta timandrake+ ta n’wana wa wena.” 15  Hiloko a ku eka yena: “Xana i mhaka yitsongo leswi u nga ndzi tekela nuna+ wa mina, kasi sweswi u ndzi tekela ni timandrake ta n’wana wa mina?” Kutani Rahele a ku: “Hikwalaho ka sweswo u ta etlela na wena vusiku bya namuntlha leswaku ndzi kuma timandrake ta n’wana wa wena.” 16  Loko Yakobe a vuya hi le masin’wini nimadyambu,+ Leya a huma a ya n’wi hlanganisa kutani a ku: “U ta etlela na mina, hikuva ndzi ku thole hi ku kongoma hi timandrake ta n’wana wa mina.” Hikwalaho a etlela na yena vusiku+ byebyo. 17  Xikwembu xi twa xi tlhela xi hlamula Leya, kutani a tika naswona hi ku famba ka nkarhi a tswalela Yakobe n’wana+ wa vuntlhanu. 18  Kutani Leya a ku: “Xikwembu xi ndzi nyike hakelo ya ku thola ka mina, hikuva ndzi teke nuna wa mina ndzi n’wi nyika nandza wa mina wa xisati.” Kutani a n’wi thya vito ra Isakara.+ 19  Leya a tlhela a tika nakambe, hi ku famba ka nkarhi a tswalela Yakobe+ n’wana wa vutsevu. 20  Kutani Leya a ku: “Xikwembu xi ndzi averile, ina, xi ndzi avele xiavelo lexinene. Eku heteleleni nuna wa mina u ta ndzi tsakela,+ hikuva ndzi n’wi tswalele vana va tsevu.”+ Kutani a n’wi thya vito ra Zebuloni.+ 21  Endzhaku ka sweswo a tswala n’wana wa nhwanyana kutani a n’wi thya vito ra Dina.+ 22  Eku heteleleni Xikwembu xi tsundzuka Rahele, Xikwembu xi n’wi twa xi tlhela xi n’wi hlamula hi ku pfula mbeleko+ wa yena. 23  A tika a veleka n’wana. Kutani a ku: “Xikwembu xi suse ndzhukano+ wa mina!” 24  Kutani a n’wi thya vito ra Yosefa,+ a ku: “Yehovha u ndzi nyika n’wana un’wana.” 25  Endzhaku ka loko Rahele a veleke Yosefa, hi ku hatlisa Yakobe a ku eka Labani: “Ndzi fambise leswaku ndzi ya endhawini ya ka hina ni le tikweni+ ra ka hina. 26  Ndzi nyike vasati va mina ni vana va mina lava ndzi va tirheleke leswaku ndzi famba; hikuva wena hi wexe u tiva ntirho lowu ndzi ku endleleke wona.”+ 27  Kutani Labani a ku eka yena: “Loko sweswi ndzi kume ku tsakeriwa ematihlweni ya wena,—ndzi hlahluvile, ndzi kuma leswaku Yehovha wa ndzi katekisa hikwalaho ka wena.”+ 28  Kutani a engeta a ku: “Ndzi byele hakelo ya wena ndzi ta ku nyika yona.”+ 29  Kutani a ku eka yena: “Wena u fanele ku tiva ndlela leyi ndzi ku tirheleke ha yona ni ndlela leyi swi fambeke ha yona hi ntlhambi wa wena loko wu ri na mina;+ 30  entiyisweni a wu ri wutsongo loko ndzi nga si fika, kutani wu engeteleke wu va wunyingi, hikuva Yehovha u ku katekisile ku sukela ndzi fikile.+ Xana va yindlu+ ya mina ndzi ta va endlela rini swo karhi?” 31  Kutani a ku: “Xana ndzi ta ku nyika yini?” Yakobe a ya emahlweni a ku: “U nga ndzi nyiki nchumu!+  Loko wo ndzi endlela leswi, ndzi ta ya emahlweni ni ku risa ntlhambi+ wa wena. Ndzi ta hambeta ndzi wu rindza.+ 32  Ndzi ta hundza exikarhi ka ntlhambi wa wena hinkwawo namuntlha. U vekela etlhelo nyimpfu yin’wana ni yin’wana ya muvala ni ya mavalavala, ni nyimpfu yin’wana ni yin’wana ya muvala wa buraweni exikarhi ka makhuna lamatsongo ni timbuti hinkwato ta matswele ta muvala ni ta mavalavala. Yoleyo yi ta va hakelo+ ya mina. 33  Ku endla ka mina leswinene ku ta ndzi hlamulela esikwini rihi ni rihi leri taka loko u ta languta hakelo+ ya mina; yin’wana ni yin’wana leyi u nga ta yi kuma yi nga ri na muvala ni mavalavala eka timbuti ni ya buraweni exikarhi ka makhuna lamatsongo yi ta va yi yiviwile loko yi ri na mina.”+ 34  Hiloko Labani a ku: “Waswivo, sweswo swi lulamile! A swi endleke hi ku ya hi rito+ ra wena.” 35  Kutani hi siku rero a vekela etlhelo swiphongo swa mikhwalalati ni swa muvala ni timbuti hinkwato ta mavalavala ni ta muvala, yin’wana ni yin’wana leyi a yi ri ni ko basa ni yin’wana ni yin’wana leyi a yi ri ya buraweni exikarhi ka makhuna lamatsongo, kambe a ti nyiketa emavokweni ya vana vakwe. 36  Endzhaku ka sweswo a veka mpfhuka wa riendzo ra masiku manharhu exikarhi ka yena na Yakobe, Yakobe a a risa ntlhambi lowu seleke wa Labani. 37  Kutani Yakobe a teka tinhonga leta ha tsakamaka ta nsihani+ ni ta murhi wa almondi+ ni ta murhi wa puleyini+ leswaku a ta ti tirhisa, a ti vandla minkhwati yo basa hi ku vandla swivati swo basa leswi a swi ri ehenhla ka tinhonga.+   38  A hetelela hi ku veka tinhonga leti a ti vandleke emahlweni ka ntlhambi, eswitsengeleni+ endzeni ka mati lawa a ma nwiwa hi mintlhambi, leswaku ti ta navelana emahlweni ka tinhonga loko ti ta nwa mati. 39  Hikwalaho mintlhambi a yi navelana emahlweni ka tinhonga, kutani mintlhambi a yi tswala vana va mikhwalalati ni mavalavala ni va muvala.+ 40  Yakobe a hambanisa makhuna lamatsongo kutani a hundzuluxela swikandza swa mintlhambi eka leti ti nga ni mikhwalalati ni hinkwato ta buraweni leti nga entlhambini wa Labani. A veka ntlhambi wakwe wu ri woxe, a nga wu vekanga ni mintlhambi ya Labani. 41  Minkarhi hinkwayo loko mintlhambi leyi tiyeke+ yi navelana, Yakobe a a veka tinhonga eswitsengeleni+ emahlweni ka mintlhambi, leswaku yi navelana hikwalaho ka tinhonga leti. 42  Kambe a a nga ti veki kwalaho loko mintlhambi yi tikomba yi nga ri na matimba. Kutani minkarhi hinkwayo leti nga riki na matimba a ti ri ta Labani, kambe leti tiyeke ti ri ta Yakobe.+ 43  Munhu loyi a andza swinene, kutani a va ni mintlhambi leyikulu ni malandza ya xisati ni ya xinuna ni tikamela ni timbhongolo.+

Tinhlamuselo ta le hansi