Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Genesa 26:1-35

26  Kutani ku va ni ndlala etikweni, handle ka ndlala yo sungula leyi veke kona emasikwini ya Abrahama,+ lerova Isaka a ya eka Abimeleke hosi ya Vafilisita, eGerara.+  Yehovha a humelela eka yena a ku:+ “U nga rheleli aEgipta. Tshama etikweni leri ndzi nga ta ku hlawulela rona.+  Luvela etikweni+ leri, ndzi ta va na wena ndzi hambeta ndzi ku katekisa, hikuva wena ni mbewu ya wena ndzi ta mi nyika matiko+ lawa hinkwawo, naswona ndzi ta hetisisa marito yo hlambanya lawa ndzi nga ma hlambanya eka Abrahama tata+ wa wena,  ‘Ndzi ta andzisa mbewu ya wena yi fana ni tinyeleti ta matilo naswona mbewu ya wena ndzi ta yi nyika matiko+ lawa hinkwawo; kunene tinxaka hinkwato ta misava ti ta tikatekisa hi mbewu ya wena,’+  hikwalaho ka leswi Abrahama a yingiseke rito ra mina nileswi a hambeteke a hlayisa swiboho swakwe eka mina, ni swileriso swa mina, ni swiletelo swa mina, ni milawu+ ya mina.”  Hiloko Isaka a tshama eGerara.+  Kutani vanhu va ndhawu va tshamela ku n’wi vutisa hi nsati wakwe, yena a ku: “I makwerhu wa xisati.”+ Hikuva a a chava ku vula a ku, “I nsati wa mina” a a chava leswaku, hi ku vula ka yena n’wini, “vanhu va ndhawu leyi va ta ndzi dlaya hikwalaho ka Raveka,” hikuva a a koka mahlo hi ku languteka.+  Kutani loko masiku ya yena ma engeteleka kwalaho, Abimeleke, hosi ya Vafilisita a languta ehandle hi fasitere a vona Isaka a ri eku titsakiseni na Raveka nsati wakwe.+  Xikan’we-kan’we Abimeleke a vitana Isaka, a ku: “Phela, i nsati wa wena hakunene! Hikokwalaho ka yini u te, ‘I makwerhu wa xisati’?” Hiloko Isaka a ku: “Ndzi swi vule hi ku chava leswaku ndzi nga tshuka ndzi fa hikwalaho ka yena.”+ 10  Kambe Abimeleke a ya emahlweni a ku: “I yini leswi u hi endleke swona?+ Kunene a ku sele katsongo un’wana wa vanhu lava a etlela ni nsati wa wena, a wu ta va u tise nandzu ehenhla ka hina!”+ 11  Kutani Abimeleke a lerisa vanhu hinkwavo, a ku: “Munhu un’wana ni un’wana la nga ta khumba wanuna loyi ni nsati wakwe u ta dlayiwa!” 12  Endzhaku ka sweswo Isaka a sungula ku byala etikweni+ rero, hi lembe rero u tshovele mpimo lowu tlulaka ka dzana leswi a swi byaleke,+ hikuva Yehovha a a n’wi katekisa.+ 13  Hikwalaho wanuna loyi a va lonkulu, naswona a humelela swinene kukondza a va lonkulu ngopfu.+ 14  A va ni mintlhambi ya tinyimpfu ni mintlhambi ya tihomu ni malandza+ yo tala lerova Vafilisita va n’wi fela mona.+ 15  Loko ku ri swihlovo hinkwaswo leswi malandza ya tata wakwe ma swi celeke emasikwini ya Abrahama tata+ wakwe, Vafilisita va swi sivile, kutani va swi tata hi misava.+ 16  Eku heteleleni Abimeleke a ku eka Isaka: “Suka etikweni ra ka hina, hikuva u tiye ngopfu ku hi tlula.”+ 17  Kutani Isaka a suka kwalaho a ya dzima nxaxa enkoveni wa Gerara+ a tshama kwalaho. 18  Isaka a tlhela a cela swihlovo swa mati leswi a swi ceriwe emasikwini ya Abrahama tata wakwe, kambe leswi Vafilisita va swi siveke endzhaku ka ku fa+ ka Abrahama; a ya mahlweni a swi thya mavito lawa tata wakwe a a swi+ thye wona. 19  Malandza ya Isaka ma cela enkoveni kutani ma kuma kwalaho xihlovo xa mati yo tenga. 20  Kutani varisi va le Gerara va holovisana ni varisi va Isaka,+ va ku: “I mati ya hina!” Hikwalaho a thya xihlovo xexo vito ra Eseki, hikuva va kanetane na yena. 21  Kutani va cela xihlovo xin’wana, va tlhela va holovisana hi xona. Hikwalaho a xi thya vito ra Sitina. 22  Endzhakunyana a suka kwalaho a ya cela xihlovo+ xin’wana, kambe a va holovanga hi xona. Hikwalaho a xi thya vito ra Rehoboti, a ku: “Hikuva sweswi Yehovha u hi nyike ndhawu+ leyikulu naswona u endle leswaku hi tswalana emisaveni.”+ 23  Kutani a suka kwalaho a tlhandlukela eBera-xeba.+ 24  Yehovha a humelela eka yena vusiku byebyo a ku: “Ndzi Xikwembu xa Abrahama tata+ wa wena. U nga chavi,+ hikuva ndzi na wena, naswona ndzi ta ku katekisa ndzi andzisa mbewu ya wena hikwalaho ka Abrahama nandza wa mina.”+ 25  Hikokwalaho a aka alitari kwalaho kutani a vitana vito ra Yehovha+ naswona a dzima ntsonga wakwe kwalaho,+ malandza ya Isaka ma cela xihlovo kwalaho. 26  Endzhaku ka nkarhi Abimeleke a ta eka yena a huma eGerara, a ri na Ahuzata munghana wakwe wa le xihundleni na Fikolo murhangeri wa vuthu+ rakwe. 27  Hiloko Isaka a ku eka vona: “Hikokwalaho ka yini mi tile eka mina, hikuva mi ndzi vengile kutani mi ndzi susa etikweni ra rikwenu?”+ 28  Vona va ku: “Handle ko kananana hi swi vonile leswaku Yehovha u na wena.+ Hikwalaho hi te, ‘Hi kombela ku va ni xihlambanyo xa ku tiboha exikarhi ka hina,+ ni le xikarhi ka hina na wena, a hi endle ntwanano na wena,+ 29  leswaku u nga endli nchumu xo biha eka hina tanihi leswi hi nga ku khumbangiki, nileswi hi nga endla leswinene hi ku ku fambisa hi ku rhula.+ Sweswi u la katekisiweke wa Yehovha.’”+ 30  Kutani a va endlela nkhuvo, va dya va tlhela va nwa.+ 31  Mixo lowu landzelaka va hatla va pfuka ka ha ri mpundzu swinene kutani va byelana+ marito yo hlambanya. Endzhaku ka sweswo Isaka a va fambisa, va famba hi ku rhula.+ 32  Hi rona siku rero malandza ya Isaka ma ta ma ta n’wi vikela malunghana ni xihlovo lexi ma xi celeke,+ ma ku eka yena: “Hi kume mati!” 33  Hikwalaho a xi thya vito ra Xiba. Hi yona mhaka leyi vito ra muti ku nga Bera-xeba+ ku fikela ni namuntlha. 34  Esawu a kula a va ni malembe ya 40 hi vukhale. Kutani a teka Yuditi n’wana wa Beri lowa Muheti xikan’we na Basemata n’wana wa Elone lowa Muheti,+ va va vasati va yena. 35  A va dyisa mbitsi emoyeni wa Isaka na Raveka.+

Tinhlamuselo ta le hansi