Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Genesa 24:1-67

24  Sweswi Abrahama a a dyuhele, a a ri ni malembe yo tala; naswona Yehovha a a katekise Abrahama hi swilo hinkwaswo.+  Hikwalaho Abrahama a ku eka nandza lonkulu vandyangu wakwe, loyi a a lawula hinkwaswo leswi a a ri na swona:+ “Ndzi kombela u veka voko ra wena ehansi ka ndzhumbi+ wa mina,  hikuva ndzi fanele ndzi ku hlambanyisa hi Yehovha,+ Xikwembu xa matilo ni Xikwembu xa misava, leswaku a wu nge n’wi tekeli n’wananga nsati eka vana va Vakanana lava ndzi tshamaka+ exikarhi ka vona,  kambe u ta ya etikweni ra rikwerhu ni le maxakeni+ ya mina, kunene u ta tekela n’wananga Isaka nsati.”  Kambe, nandza a ku eka yena: “Ku ta endleka yini loko wansati yoloye a nga swi naveli ku ta na mina etikweni leri? Xana ndzi fanele ndzi tiyiseka leswaku ndzi tlherisela n’wana wa wena etikweni leri u humeke eka rona?”+  Hiloko Abrahama a ku eka yena: “Tivonele leswaku u nga tlheriseli n’wananga kona.+  Yehovha Xikwembu xa matilo la ndzi humeseke endlwini ya tatana ni le tikweni ra maxaka+ ya mina ni loyi a vulavuleke na mina,+ la hlambanyeke eka mina, a ku, ‘Tiko+ leri ndzi ta ri nyika mbewu+ ya wena,’ u ta rhuma ntsumi leyi nga ta ku rhangela emahlweni,+ kunene u ta tekela n’wananga nsati kona.+  Loko wansati yoloye a nga swi naveli ku vuya na wena, u ta ntshunxeka eka xihlambanyo lexi u xi hlambanyeke eka mina.+ Ntsena u nga tlheriseli n’wananga etikweni rero.”  Hiloko nandza a veka voko rakwe ehansi ka ndzhumbi wa n’wini wakwe Abrahama, kutani a hlambanya eka yena malunghana ni mhaka leyi.+ 10  Hikwalaho nandza a teka tikamela ta khume eka tikamela ta n’wini wakwe, a famba a khome+ xilo xin’wana ni xin’wana lexinene xa n’wini wakwe. Kutani a suka a khoma ndlela a ya eMesopotamiya emutini wa Nakori. 11  Eku heteleleni a nkhinsamisa tikamela exihlobyeni xa mati lexi nga ehandle ka muti, hi nkarhi wa madyambu,+ hi nkarhi lowu vavasati lava kaka mati a va tolovele ku huma+ ha wona. 12  Kutani a ku: “Yehovha Xikwembu xa n’wini wanga Abrahama,+ ndzi kombela u endla swi koteka namuntlha emahlweni ka mina naswona u kombisa n’wini wanga Abrahama+ musa wa rirhandzu.+ 13  Sweswi ndzi yime enseledyaneni wa mati, naswona vana va vanhwanyana va vanhu va muti va huma ku ta ka mati.+ 14  Leswi swi faneleke ku humelela hileswaku nhwanyana loyi ndzi nga ta ku eka yena, ‘Ndzi kombela u rhula khuwana ra wena leswaku ndzi nwa mati,’ entiyisweni na yena a nga ta ku, ‘Nwana mati, ndzi ta tlhela ndzi nyika ni tikamela ta wena mati,’ hi yena loyi u nga ta n’wi nyika nandza+ wa wena, Isaka; kutani u ndzi tivisa ha swona leswaku u komba n’wini wanga rirhandzu leri tshembekeke.”+ 15  Kuteloko a nga si heta ku vulavula,+ hiloko ku humelela Raveka, loyi a nga velekeriwa Bethuwele+ n’wana wa Milka+ nsati wa Nakori,+ makwavo wa Abrahama, naswona khuwana ra yena a ri ri ekatleni.+ 16  Nhwanyana loyi a a koka-mahlo swinene hi ku languteka,+ a ri nhwana, naswona a ku nga ri na wanuna la nga tshama a tivana na yena hi tlhelo ra rimbewu;+ kutani a rhelela enseledyaneni a fika a tata khuwana, a khupuka. 17  Xikan’we-kan’we nandza a tsutsuma a n’wi hlanganisa, kutani a ku: “Ndzi kombela u ndzi nwisanyana mati ya khuwana+ ra wena.” 18  Hiloko a ku: “Nwana hosi yanga.” A hatlisa a ehlisela khuwana rakwe evokweni rakwe a n’wi nyika a nwa.+ 19  Loko a hete ku n’wi nyika a nwa, a ku: “Ndzi ta kela ni tikamela ta wena kukondza ti heta ku nwa.”+ 20  Hikwalaho a hatlisa a chululela khuwana rakwe exitsengeleni, a tsutsuma a ya ka mati+ exihlobyeni hi ku phindha-phindha, a kela tikamela hinkwato. 21  Nkarhi lowu hinkwawo wanuna loyi a a n’wi langute hi ku hlamala, a miyerile ku vona loko Yehovha a endle riendzo rakwe ri humelela kumbe ri nga humeleli.+ 22  Kutani loko tikamela ti hete ku nwa, wanuna loyi a teka xingwavila+ xa le nhompfini xa nsuku lexi ntiko wa xona wu nga hafu ya xikele ni vusenga+ byimbirhi bya mavoko, lebyi ntiko wa byona a wu ri tixikele ta nsuku ta khume, 23  a ya emahlweni a ku: “Xana u n’wana wa mani? Ndzi kombela u ndzi byela. Xana ku ni kamara endlwini ya tata wa wena laha hi nga etlelaka kona vusiku+ lebyi?” 24  Hiloko a ku eka yena: “Ndzi n’wana wa Bethuwele+ n’wana Milka, loyi a nga n’wi tswalela Nakori.”+ 25  A ya emahlweni a ku eka yena: “Hi ni byanyi ni furu yo tala, ni ndhawu yo etlela eka yona vusiku lebyi.”+ 26  Kutani wanuna loyi a nkhinsama a tiwisela emahlweni ka Yehovha+ 27  a ku: “A ku dzunisiwe Yehovha+ Xikwembu xa n’wini wanga Abrahama, loyi a nga tshikangiki musa wakwe wa rirhandzu ni vutshembeki byakwe eka n’wini wanga. Loko ndzi ri endleleni, Yehovha u ndzi rhangele a ndzi tisa endlwini ya vamakwavo va n’wini wanga.”+ 28  Kutani nhwanyana a tsutsuma a ya byela vandyangu wa mana wakwe hi swilo leswi. 29  Raveka a a ri ni makwavo wa xinuna loyi vito rakwe a ku ri Labani.+ Kutani Labani a tsutsumela eka wanuna loyi a a ri ehandle enseledyaneni. 30  Kuteloko a vona xingwavila xa le nhompfini ni vusenga+ emavokweni ya makwavo niloko a twa marito ya Raveka makwavo, a ku: “Hi yona ndlela leyi wanuna loyi a vulavuleke na mina ha yona,” hiloko a ya eka wanuna loyi, kutani waswivo, a a yime ekusuhi ni tikamela enseledyaneni. 31  Hiloko a ku: “Tana, wena munhu la katekisiweke wa Yehovha.+ Hikwalaho ka yini u yime laha handle, kasi mina ndzi yi lunghisile yindlu ni ndhawu ya tikamela?” 32  Kutani wanuna a nghena endlwini, a ntshunxa matomu ya tikamela ni ku nyika tikamela byanyi ni furu, a n’wi nyika ni mati leswaku a hlamba milenge yakwe ni milenge ya vavanuna lava a va ri na yena.+ 33  Kutani ku vekiwa swakudya emahlweni ka yena, kambe a ku: “A ndzi nge dyi ndzi nga si vulavula timhaka ta mina.” Hikwalaho yena a ku: “Vulavula!”+ 34  A ya emahlweni a ku: “Ndzi nandza+ wa Abrahama. 35  Yehovha u katekise n’wini wanga swinene hikuva u hambeta a n’wi endla lonkulu naswona u n’wi nyika tinyimpfu ni tihomu ni silivhere ni nsuku ni malandza ya xinuna ni ya xisati ni tikamela ni timbhongolo.+ 36  Ku tlula kwalaho, Sara nsati wa n’wini wanga u tswalele n’wini wanga n’wana se a dyuhele;+ kutani u ta n’wi nyika hinkwaswo leswi a nga na swona.+ 37  Hikwalaho n’wini wanga u ndzi hlambanyisile a ku, ‘U nga tshuki u tekela n’wananga nsati eka vana va Vakanana etikweni leri ndzi tshamaka+ eka rona. 38  E-e, kambe u ta ya endlwini ya tatana ni le ndyangwini+ wa ka hina, hi kona laha u nga ta tekela n’wananga+ nsati kona.’ 39  Kambe ndzi ku eka n’wini wanga, ‘Ku ta endleka yini loko wansati yoloye a nga lavi ku vuya na mina?’+ 40  Yena a ku eka mina, ‘Yehovha, loyi ndzi fambeke+ emahlweni ka yena u ta rhuma ntsumi+ yakwe yi famba na wena, kunene yi ta endla leswaku u humelela endleleni+ ya wena; kutani u fanele ku tekela n’wananga nsati endyangwini wa ka hina ni le ndlwini ya tatana.+ 41  Loko u fika endyangwini wa ka hina, hi nkarhi wolowo u ta ntshunxiwa exibohweni xa xihlambanyo xa mina, loko va nga ku nyiki yena, u ta ntshunxeka exibohweni xa xihlambanyo+ xa mina.’ 42  “Loko ndzi fika enseledyaneni namuntlha, ndzi te, ‘Yehovha Xikwembu xa n’wini wanga Abrahama, loko kunene u endla leswaku ndlela ya mina leyi ndzi yi fambaka+ yi humelela, 43  sweswi ndzi yime enseledyaneni wa mati. Leswi swi faneleke ku humelela hileswaku nhwanyana+ la nga ta huma ku ta ka mati, loyi ndzi nga ta ku eka yena: “Ndzi kombela ku nwa matinyana ekhuwaneni ra wena,” 44  ni loyi kunene a nga ta ndzi byela a ku: “Nwanani mati, ndzi ta tlhela ndzi kela ni tikamela ta wena mati,” hi yena wansati loyi Yehovha a n’wi nyikaka n’wana wa n’wini wanga.’+ 45  “Ndzi nga si heta ku vulavula+ embilwini ya mina,+ waswivo, Raveka a huma a ri ni khuwana rakwe ekatleni; a rhelela enseledyaneni a ta ka mati.+ Kutani ndzi ku eka yena, ‘Ndzi kombela+ u ndzi nyika ndzi nwa.’ 46  Hikwalaho a hatlisa a rhula khuwana rakwe, a ku, ‘Nwana,+ naswona ndzi ta tlhela ndzi nwisa ni tikamela ta wena.’ Kutani ndzi nwa, naswona a nwisa ni tikamela. 47  Endzhaku ka sweswo ndzi n’wi vutisa ndzi ku, ‘Wena u n’wana wa mani?’+ yena a ku, ‘Ndzi n’wana wa Bethuwele n’wana wa Nakori, loyi Milka a nga n’wi tswalela yena.’ Hikwalaho ndzi n’wi vehela xingwavila enhompfini yakwe ni vusenga emavokweni.+ 48  Kutani ndzi nkhinsama ndzi tiwisela emahlweni ka Yehovha, ndzi dzunisa Yehovha Xikwembu xa n’wini wanga Abrahama,+ loyi a nga ndzi rhangela hi ndlela+ ya ntiyiso leswaku n’wana wa n’wini wanga ndzi ta n’wi tekela n’wana wa makwavo. 49  Loko hakunene u kombisa musa wa rirhandzu ni vutshembeki eka n’wini wanga,+ ndzi byele sweswi; kambe, loko swi nga ri tano, ndzi byele leswaku ndzi ta hundzulukela evokweni ra xinene kumbe eka ra ximatsi.”+ 50  Kutani Labani na Bethuwele va hlamula va ku: “Nchumu lowu wu huma+ eka Yehovha. A hi nge swi koti ku vulavula swo biha kumbe leswinene eka wena.+ 51  Hi loyi Raveka emahlweni ka wena. N’wi teke u famba, a a ve nsati wa n’wana wa n’wini wa wena, hilaha Yehovha a vuleke+ hakona.” 52  Kuteloko nandza wa Abrahama a twa marito ya vona, xikan’we-kan’we a tiwisela emisaveni emahlweni ka Yehovha.+ 53  Kutani nandza loyi a humesa swilo swa silivhere ni swilo swa nsuku ni tinguvu a nyika Raveka; a nyika makwavo ni mana+ wakwe swilo swo hlawuleka. 54  Endzhaku ka sweswo, yena ni vavanuna lava a va ri na yena va dya ni ku nwa, kutani va etlela kona vusiku byebyo, va pfuka nimixo. Kutani a ku: “Ndzi tshikeni ndzi ya eka n’wini wanga.”+ 55  Hiloko makwavo ni mana wakwe va ku: “Nhwanyana a a tshame na hina kwalomu ka masiku ya khume. Endzhaku ka sweswo a nga famba.” 56  Kambe a ku eka vona: “Mi nga ndzi khomeleli, hikuva Yehovha u endle leswaku ndlela+ ya mina yi humelela. Ndzi tshikeni, leswaku ndzi ta ya eka n’wini wanga.”+ 57  Kutani va ku: “A hi vitaneni nhwanyana hi twa nomu+ wakwe.” 58  Va vitana Raveka, va ku eka yena: “Xana u ta famba ni wanuna loyi?” Yena a ku: “Ndzi tiyimiserile ku famba.”+ 59  Hiloko va fambisa Raveka makwavo wa vona+ ni muhlayisi+ wakwe ni nandza wa Abrahama ni vanhu vakwe. 60  Kutani va katekisa Raveka va ku eka yena: “Mawaku wena makwerhu, onge u nga va magidi ma andzisiwe ka 10 000, mbewu ya wena a yi hluke enyangweni ya lava va yi vengaka.”+ 61  Endzhaku ka sweswo Raveka ni vatirhi+ vakwe va xisati va tlakuka va ya gada tikamela,+ va landzela wanuna loyi; kutani nandza a teka Raveka a khoma ndlela. 62  Kutani Isaka a ta hi ndlela leyi yaka eBera-lahayi-royi,+ hikuva a a tshama etikweni ra Negebu.+ 63  Isaka a a humile a famba-famba leswaku a ta anakanyisisa+ a ri enhoveni hi nkarhi wa madyambu. Loko a tlakusa mahlo a languta, waswivo, a ku ta tikamela! 64  Loko Raveka a tlakusa mahlo a vona Isaka, a xika ekameleni. 65  Kutani a ku eka nandza: “I mani munhu luya a fambaka enhoveni a taka ku ta hi hlanganisa?” nandza a ku: “I n’wini wanga.” Kutani a teka lapi ra nhloko a tifunengeta.+ 66  Nandza a rungulela Isaka hinkwaswo leswi a swi endleke. 67  Endzhaku ka sweswo Isaka a n’wi tisa entsongeni wa Sara mana+ wakwe. Hiloko a teka Raveka a va nsati+ wakwe; kutani a n’wi rhandza,+ Isaka a kuma nchavelelo endzhaku ko lahlekeriwa hi mana+ wakwe.

Tinhlamuselo ta le hansi