Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 7:1-27

7  Rito ra Yehovha ri ya emahlweni ri fika eka mina, ri ku:  “Loko ku ri wena, Wena n’wana wa munhu, Yehovha, Hosi leyi Lawulaka u byele misava ya Israyele, a ku, ‘Makumu, makumu, ma fikile eka tinhla ta mune ta tiko.+  Sweswi makumu ma ku fikerile,+ kutani ndzi fanele ndzi ku hlundzukela, naswona ndzi ta ku avanyisa hi ku ya hi tindlela ta wena,+ ndzi ku tisela swilo swa wena hinkwaswo leswi nyenyetsaka.  Tihlo ra mina a ri nge vi na nsovo eka wena,+ naswona a ndzi nge ku tsetseleli, hikuva tindlela ta wena ndzi ta ti tisa ehenhla ka wena, naswona swilo swa wena leswi nyenyetsaka swi ta va ehenhla ka wena;+ kutani n’wina mi ta tiva leswaku hi mina Yehovha.’+  “Yehovha, Hosi leyi Lawulaka u te, ‘Khombo, khombo leri nga tolovelekangiki, waswivo, ra ta.+  Makumu ma fanele ma fika.+ Makumu ma fanele ma fika; ma fanele ma ku xalamukisa. Waswivo! Ma ta.+  Harhi yo saseka yi fanele yi fika eka wena, Wena la akeke etikweni, nkarhi wu fanele wu fika, siku ri le kusuhi.+ Ku ni ku pfilunganyeka, ku nga ri ku huwelela ka le tintshaveni.  “‘Hi ku hatlisa ndzi ta chulula vukarhi bya mina ehenhla ka wena,+ naswona ndzi ta hetisisa ku hlundzuka ka mina ehenhla ka wena,+ ndzi ta ku avanyisa hi ku ya hi tindlela+ ta wena naswona ndzi tisa swilo hinkwaswo swa wena leswi nyenyetsaka ehenhla ka wena.  Tihlo ra mina ri nga ka ri nga vi na nsovo+ naswona a ndzi nge tsetseleli.+ Ndzi ta swi tisa eka wena hi ku ya hi tindlela ta wena, naswona swilo swa wena leswi nyenyetsaka swi ta va exikarhi ka wena;+ n’wina mi ta tiva leswaku hi mina Yehovha loyi a mi baka.+ 10  “‘Waswivo! Siku! Waswivo! Ra ta.+ Harhi yo saseka yi humile.+ Nhonga yi hlukile.+ Ku tikukumuxa ku hlukile.+ 11  Madzolonga ma tlakuke ma va nhonga ya vuhomboloki.+ A swi humi eka vona, hambi ku ri eka rifuwo ra vona; a swi humi eka vona hi xiviri, naswona a va titlakusi. 12  Nkarhi wu fanele wu ta, siku ri fanele ri fika. Loko ku ri muxavi, a nga tshuki a tsaka;+ loko ku ri muxavisi, a nga tshuki a rila, hikuva ku ni vukarhi lebyikulu ehenhla ka ntshungu wa kona hinkwawo. 13  Hikuva muxavisi a nge tlheleli eka leswi xavisiweke, loko vutomi bya vona bya ha ri exikarhi ka lava va hanyaka; hikuva xivono i xa ntshungu wa kona hinkwawo. A nga kona la nga ta vuya, a nga kona ni un’we la nga ta va ni vutomi byakwe hikwalaho ka xihoxo xa yena. 14  “‘Va yimbe mhalamhala+ naswona un’wana ni un’wana u lunghiseleriwile, kambe a ku na munhu loyi a yaka enyimpini, hikuva vukarhi bya mina byi le henhla ka ntshungu wa kona hinkwawo.+ 15  Banga+ ri le handle, kambe ntungu ni ndlala swi le ndzeni.+ Un’wana ni un’wana loyi a nga enhoveni, u ta dlayiwa hi banga, hinkwavo lava nga emutini, ndlala ni ntungu swi ta va lovisa.+ 16  Kunene lava balekaka va ta baleka+ naswona etintshaveni va ta kotisa matuva ya le minkoveni,+ lama rilaka hinkwawo hi xiviti, un’wana ni un’wana exihoxweni xakwe. 17  Mavoko hinkwawo, ma tshamela ku lelemela;+ kasi matsolo hinkwawo, ma tshamela ku dzururuka mati.+ 18  Va tikhame hi nguvu yo khwaxa,+ va funengetiwe hi ku rhurhumela;+ swikandza hinkwaswo swi ni tingana+ ni tinhloko hinkwato ta vona ti ni mpandla.+ 19  “‘Silivhere ya vona va ta yi lahlela eswitarateni, naswona nsuku wa vona wu ta va nchumu lowu nyenyetsaka. Hambi ku ri silivhere ya vona kumbe nsuku wa vona a swi nge swi koti ku va kutsula esikwini ra ku hlundzuka ka Yehovha.+ Mimoya-xiviri ya vona a va nge yi enerisi, marhumbu ya vona a va nge ma tati, hikuva yi hundzuke xikhunguvanyiso lexi vangaka xihoxo.+ 20  Kutani ku khavisa ka xin’wetsin’wetsi xa munhu—munhu u ku teke ku ri xivangelo xa ku tinyungubyisa; swifaniso swa vona leswi nyenyetsaka,+ swilo swa vona leswi nyangatsaka,+ va swi endle ha xona. Hi yona mhaka leyi ndzi nga ta xi endla nchumu lowu nyenyetsaka eka vona.+ 21  Kutani ndzi ta xi nyiketa evokweni ra vafambi xi va lexi phangiweke ni le ka lavo homboloka emisaveni xi va lexi phangiweke,+ kunene va ta xi nyamisa. 22  “‘Kutani ndzi ta susa xikandza xa mina eka vona,+ entiyisweni va ta nyamisa ndhawu ya mina leyi tumbeleke, swigevenga swi ta ta eka yona, swi yi nyamisa.+ 23  “‘Endla nketana,+ hikuva tiko ri tele vuavanyisi lebyi nga ni ngati+ naswona muti wu tele madzolonga.+ 24  Kutani lavo biha ngopfu exikarhi ka matiko ndzi ta va tisa,+ kunene va ta teka tindlu ta vona,+ ndzi ta herisa ku tinyungubyisa ka lava nga ni matimba,+ vukwetsimelo bya vona byi ta nyamisiwa.+ 25  Ku ta va ni ku vaviseka, kunene va ta lava ku rhula kambe a ku nge vi kona.+ 26  Ku ta va ni maxangu ehenhla ka maxangu,+ ku ta va ni xiviko ehenhla ka xiviko, entiyisweni vanhu va ta lava xivono eka muprofeta,+ nawu wu ta hela eka muprista ni xitsundzuxo eka vavanuna lava kuleke.+ 27  Hosi yi ta rila;+ ni ndhuna yi ta ambala ku onheteriwa,+ kutani mavoko ya vanhu va tiko ma ta karhateka. Ndzi ta va endlela hi ku ya hi ndlela ya vona,+ naswona ndzi ta va avanyisa hi ku ya hi ku avanyisa ka vona;+ kutani va ta tiva leswaku hi mina Yehovha.’”+

Tinhlamuselo ta le hansi