Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 47:1-23

47  Hakatsongo-tsongo a ndzi tlherisela evunghenweni bya Yindlu leyi,+ kutani waswivo, a ku ri ni mati+ lawa a ma huma ehansi ka nyangwa ya Yindlu leyi etlhelo ra le vuxeni,+ hikuva tlhelo ra le mahlweni ka Yindlu leyi a ri ri evuxeni. Mati a ma rhelela ma huma ehansi, ku suka etlhelweni ra xinene ra Yindlu leyi, edzongeni wa alitari.  Hakatsongo-tsongo a ndzi tisa hi ndlela ya nyangwa ya le n’walungwini,+ a ndzi rhendzelekisa hi ndlela ya le handle enyangweni ya le handle leyi languteke evuxeni,+ kutani waswivo, mati+ a ma pfelela ma huma etlhelweni ra xinene.  Loko munhu loyi a ya etlhelweni ra le vuxeni a khome ngoti ya ku pima,+ u pime swisungunu swa 1 000, a ndzi tsemakanyisa ematini, mati a ma fika emahlakaleni ya milenge.  A ya emahlweni a pima swisungunu swa 1 000 kutani a ndzi tsemakanyisa ematini, mati a ma fika ematsolweni. A ya emahlweni a pima swisungunu swa 1 000 kutani a ndzi tsemakanyisa—mati a ma fika emasengeni.  A ya emahlweni a pima swisungunu swa 1 000. A ku ri ni xinambyana lexi a ndzi nga swi koti ku xi tsemakanya, hikuva mati a ma tlakukile, a swi koteka ku hlambela ematini lawa, xinambyana lexi a xi nga tsemakanyeki.  Hiloko a ku eka mina: “Xana u swi vonile leswi, Wena n’wana wa munhu?” Kutani a ndzi fambisa, a ndzi tlherisela eribuweni ra xinambyana.  Loko ndzi vuya, waswivo, eribuweni ra xinambyana a ku ri ni mirhi yo tala swinene, eka tlhelo leri ni le ka tlhelo lerin’wana.+  A ya emahlweni a ku eka mi-na: “Mati lawa ma ya exifundzheni xa le vuxeni, ma ta rhelela eArabha.+ Ma ta ya fika elwandle.+ Ma tisiwa elwandle,+ mati ya rona ma hanyisiwa.  Moya-xiviri wun’wana ni wun’wana lowu hanyaka wa swivumbiwa leswi fambaka swi tele,+ endhawini yin’wana ni yin’wana leyi xinambyana lexikulu xi fambaka eka yona, wu ta hanya. Ku ta va ni tinhlampfi to tala swinene, hikuva mati lawa ma ta fika kona hakunene, mati ya le lwandle ma ta hanyisiwa,+ xin’wana ni xin’wana xi ta hanya laha xinambyana xi fikaka kona. 10  “Entiyisweni vaphasi va tinhlampfi va ta yima etlhelo ka xona ku suka aEni-gedi+ ku ya fika aEni-gilayimu. Ku ta va ni ndhawu yo omisa tinkoka. Tinhlampfi ti ta va kona hi mixaka ya tona, kukota tinhlampfi ta Lwandle Lerikulu,+ to tala swinene. 11  “Ku ni tindhawu ta kona leti ti nga nhlangasi ni tindhawu ta kona leti ti nga ndzhope, ti nga ka ti nga hanyisiwi.+ Kunene ti ta hundzuka munyu.+ 12  “Etlhelo ka xinambyana ku ta va ni mirhi ya mixaka hinkwayo leyi dyiwaka,+ ekusuhi ni ribuwa ra xona eka tlhelo leri ni le ka tlhelo lerin’wana. Matluka ya yona a ma nge vuni,+ ni mihandzu ya yona a yi nge heli.+ Etin’hwetini ta yona yi ta tswala mihandzu leyintshwa, hikuva mati ya yona—ma huma evukwetsimelweni.+ Mihandzu ya yona yi ta dyiwa ni matluka ya yona ma va yo hanyisa.”+ 13  Yehovha, Hosi leyi Lawulaka u te: “Leyi i ndhawu leyi mi nga ta tiavela yona yi va ndzhaka, yi va tiko ra tinyimba ta 12 ta Israyele, Yosefa a va ni swiphemu swimbirhi swa ndhawu.+ 14  Yi ta va ndzhaka ya n’wina, un’wana ni un’wana a fana ni makwavo, tiko leri ndzi tlakuseke voko ra mina ndzi hlambanya+ leswaku ndzi ta ri nyika vatata wa n’wina;+ tiko leri ri ta va ndzhaka ya n’wina hi vuhlolotwana.+ 15  “Lowu i ndzilakana wa tiko etlhelo ra le n’walungwini, ku suka eLwandle Lerikulu hi ndlela ya le Hetiloni,+ hi ndlela yo ta eSedada,+ 16  Hamati,+ Berota,+ Sibrayimi, exikarhi ka ndzilakana wa Damaska+ ni ndzilakana wa Hamati; Hasere-hatikoni, leyi yi nga ekusuhi ni ndzilakana wa Hawurana.+ 17  Ndzilakana lowu sukaka elwandle wu fanele wu va Hasara-enana,+ ndzilakana wa Damaska na n’walungu—etlhelo ra le n’walungwini, ni ndzilakana wa Hamati.+ Leri i tlhelo ra le n’walungwini. 18  “Tlhelo ra le vuxeni ri sukela exikarhi ka Hawurana+ na Damaska+ ni le xikarhi ka Giliyadi+ ni tiko ra Israyele; mi fanele mi pima Yordani,+ ku suka endzilakaneni ku ya elwandle ra le vuxeni. Leri i tlhelo ra le vuxeni. 19  “Tlhelo ra le dzongeni ri le dzongeni, ku suka eTamari+ ku ya ematini ya Meribati-kadexi,+ nkova+ lowu yaka eLwandle Lerikulu. Leri i tlhelo ra le dzongeni, ku ya eNegebu. 20  “Tlhelo ra le vupela-dyambu i Lwandle Lerikulu, ku suka endzilakaneni ku kongoma endleleni yo nghena eHamati.+ Leri i tlhelo ra le vupela-dyambu.” 21  “Mi ta tiavela tiko leri, hi tinyimba ta 12 ta Israyele. 22  Mi fanele mi tiavela rona ri va ndzhaka ya n’wina+ swin’we ni valuveri lava luveleke exikarhi ka n’wina,+ lava va velekeke vana exikarhi ka n’wina. Eka n’wina va ta fana ni munhu loyi a tumbulukeke exikarhi ka vana va Israyele. Va ta wela eka vuhlolotwana bya ndzhaka exikarhi ka tinyimba ta Israyele swin’we na n’wina.+ 23  Nyimba leyi muluveri a nga ta luvela eka yona, mi fanele mi n’wi nyika ndzhaka ya yena eka yona,” ku vula Yehovha, Hosi leyi Lawulaka.

Tinhlamuselo ta le hansi