Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 46:1-24

46  “Yehovha, Hosi leyi Lawulaka u te, ‘Loko ku ri nyangwa ya xivava xa le mpfungwe leyi languteke evuxeni,+ yi fanele yi tshama yi pfalekile+ masiku ya tsevu ya ntirho,+ hi siku ra savata yi fanele yi pfuriwa, naswona hi siku ra ku thwasa ka n’weti yi fanele yi pfuriwa.+  Ndhuna yi ta nghena hi ndlela ya le rikupakupeni ra nyangwa,+ ku suka ehandle, yi yima ekusuhi ni rimba ra nyangwa;+ vaprista va ta nyikela gandzelo ra yona ro hisiwa leri heleleke ni switlhavelo swa yona swa xinakulobye, yi ta nkhinsama evunghenweni bya nyangwa,+ yi ta tlhela yi huma, kambe nyangwa a yi fanelanga yi pfariwa kukondza ku va madyambu.  Vanhu va tiko va fanele va nkhinsama evunghenweni bya nyangwa yoleyo hi tisavata ni hi ku thwasa ka n’weti, emahlweni ka Yehovha.+  “‘Gandzelo ro hisiwa leri heleleke leri ndhuna yi faneleke yi ri nyikela eka Yehovha hi siku ra savata ri fanele ri va swinyimpfana swa xinuna swa tsevu, leswi hanyeke kahle ni khuna leri hanyeke kahle;+  egandzelweni ra mavele, ku ta va mpimo wa efa eka khuna rin’we,+ eka swinyimpfana swa xinuna ku ta va gandzelo ra mavele hilaha yi kotaka ku nyikela hakona,+ loko ku ri mafurha, mpimo wa hini eka mpimo wa efa.+  Hi siku ra ku thwasa ka n’weti+ ku fanele ku va ni xinkuzana, rhole ra ntlhambi wa tihomu, ni swinyimpfana swa tsevu swa xinuna ni khuna; swi fanele swi va leswi hanyeke kahle.+  Yi ta nyikela mpimo wa efa wa xinkunzana ni mpimo wa efa wa khuna, swi va gandzelo ra mavele, ni leswi yi kotaka ku swi nyikela eka swinyimpfana swa xinuna; loko ku ri mafurha, mpimo wa hini eka mpimo wa efa.+  “‘Loko ndhuna yi nghena,+ yi fanele yi nghena hi ndlela ya le rikupakupeni ra nyangwa, yi fanele yi huma hi ndlela ya rona.+  Loko vanhu va tiko va ta emahlweni ka Yehovha hi minkarhi leyi vekiweke ya ntsako,+ loyi a nghenaka hi ndlela ya nyangwa ya le n’walungwini+ a ta nkhinsama, u ta huma hi ndlela ya nyangwa ya le dzongeni;+ loyi a nghenaka hi ndlela ya nyangwa ya le dzongeni u ta huma hi ndlela ya nyangwa ya le n’walungwini. Ku nga tshuki ku va ni munhu loyi a nga ta huma hi ndlela ya nyangwa leyi a ngheneke ha yona, hikuva u fanele a huma a kongoma emahlweni. 10  Loko ku ri ndhuna leyi nga exikarhi ka vona, loko va nghena, yona yi fanele yi nghena; loko va huma, yi fanele yi huma.+ 11  Eminkhubyeni ni le minkarhini leyi vekiweke ya ku tsaka,+ gandzelo ra mavele ri fanele ri va mpimo wa efa eka xinkuzana ni mpimo wa efa eka khuna, ni leswi a kotaka ku swi nyikela eka swinyimpfana swa xinuna; loko ku ri mafurha, mpimo wa hini wa mpimo wa efa.+ 12  “‘Loko ndhuna yo tshuka yi nyikela gandzelo ro hisiwa+ leri heleleke ri va gandzelo ra ku tirhandzela, kumbe switlhavelo swa xinakulobye swi va gandzelo ra ku tirhandzela eka Yehovha, yi fanele yi pfuleriwa ni nyangwa leyi languteke evuxeni,+ yi ta nyikela gandzelo ra yona ro hisiwa leri heleleke ni switlhavelo swa yona swa xinakulobye, hilaha yi endlaka hakona hi siku ra savata.+ Yi ta huma, kutani ku va ni munhu loyi a pfalaka nyangwa loko yi humile.+ 13  “‘Xinyimpfana xa xinuna lexi hanyeke kahle, lexi nga elembeni ra xona ro sungula, u fanele u xi nyikela siku ni siku xi va gandzelo ro hisiwa leri heleleke eka Yehovha.+ U fanele u xi nyikela mixo wun’wana ni wun’wana. 14  U fanele u nyikela swin’we na xona, mixo wun’wana ni wun’wana, xiphemu xa vutsevu xa mpimo wa efa, swi va gandzelo ra mavele, loko ku ri mafurha, vunharhu bya mpimo wa hini byo xuva mapa lama silekeke kahle.+ Gandzelo ra mavele leri yaka eka Yehovha i nawu lowu tshamaka hilaha ku nga heriki, nkarhi hinkwawo. 15  Va fanele va humesa xinyimpfana xa xinuna ni gandzelo ra mavele ni mafurha mixo wun’wana ni wun’wana swi va gandzelo ro hisiwa leri heleleke ra nkarhi hinkwawo.’ 16  “Yehovha, Hosi leyi Lawulaka u te, ‘Loko ndhuna yo tshuka yi nyika un’wana ni un’wana wa vana va yona nyiko yi va ndzhaka, yi ta va rifuwo ra vana va yona. I rifuwo leri ri nga ndzhaka ya vona. 17  Loko yo tshuka yi nyika un’wana wa malandza ya yona nyiko, yi ta va ya yena kukondza ku fika lembe ra ntshunxeko;+ yi ta tlhelela endhuneni. Ndzhaka ya yena—malunghana ni vana va yona—hi yona leyi yi nga ta tshama yi ri ya vona. 18  Ndhuna a yi fanelanga yi teka ndzhaka ya vanhu lerova yi va sindzisa ku siya ndzhaka ya vona.+ Yi fanele yi nyika vana va yona ndzhaka eka rifuwo ra yona, leswaku un’wana ni un’wana eka vanhu va mina a nga fambi a siya rifuwo ra yena.’”+ 19  Hiloko a ndzi tisa hi ndlela yo nghena+ leyi a yi ri etlhelo ka nyangwa ku ya emakamareni yo dyela yo kwetsima, lawa a ma ri ya vaprista, lawa a ma langute en’walungwini,+ kutani waswivo, a ku ri ni ndhawu ematlhelo mambirhi ya le ndzhaku evupela-dyambu. 20  A ya emahlweni a ku eka mina: “Leyi i ndhawu leyi vaprista va nga ta swekela eka yona gandzelo ra nandzu+ ni gandzelo ra xidyoho,+ laha va nga ta bakela kona gandzelo ra mavele,+ leswaku va nga humeseli nchumu exivaveni xa le handle leswaku va hlawulekisa vanhu.”+ 21  A ya emahlweni a ndzi humesela exivaveni xa le handle, a ndzi hundzisa ekusuhi ni tinsika ta le yinhleni ta mune ta xivava, kutani waswivo, a ku ri ni xivava eka nsika leyi ya le yinhleni ya xivava, ku ri ni xivava eka nsika leyin’wana ya xivava. 22  Eka tinsika ta mune ta le yinhleni ta xivava a ku ri ni swivava leswitsongo, swisungunu swa 40 hi ku leha, swa 30 hi ku anama. Hi mune ka swona ni miako ya le yinhleni a swi ri ni mpimo lowu ringanaka. 23  A ku ri ni layini leyi a yi swi rhendzerile, yi swi rhendzele hi mune ka swona, a ku ri ni tindhawu to swekela+ eka tona leti endliweke ehansi ka tilayini leti ti yi rhendzelaka. 24  Kutani a ku eka mina: “Leti i tindlu ta lava va swekaka, laha vatirheli va Yindlu leyi va swekelaka kona xitlhavelo xa vanhu.”+

Tinhlamuselo ta le hansi