Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 41:1-26

41  A ya emahlweni a ndzi tisa etempeleni, a pima tiphuphu ta le tlhelo, laha a ku ri swisungunu swa tsevu hi ku anama, lahaya a ku ri ni swisungunu swa tsevu hi ku anama, ku anama ka phuphu ya le tlhelo.  Ku anama ka vungheno a ku ri swisungunu swa khume, matlhelo ya vungheno a ma ri swisungunu swa ntlhanu laha, ma ri swisungunu swa ntlhanu lahaya. Kutani a pima ku leha ka byona, ku ri swisungunu swa 40; ku anama, ku ri swisungunu swa 20.  Hiloko a nghena endzeni, a pima phuphu ya le tlhelo ya vungheno, swisungunu swimbirhi; vungheno, swisungunu swa tsevu; ku anama ka vungheno a ku ri swisungunu swa nkombo.  A pima ku leha ka byona, swisungunu swa 20; ku anama ka byona, ku ri swisungunu swa 20,+ emahlweni ka tempele. A ku eka mina: “Leyi i Ndhawu yo Kwetsima Ngopfu.”+  A ya emahlweni a pima khumbi ra yindlu, swisungunu swa tsevu. Ku anama ka kamara ra le tlhelo a ku ri swisungunu swa mune, ematlhelo hinkwawo; a swi ri tano yindlu hinkwayo, ematlhelo hinkwawo.+  Makamara ya le tlhelo a ma ri kamara ra le tlhelo leri nga ehenhla ka kamara ra le tlhelo, swithezi swinharhu, swiyenge swa 30; a ma nghena eka khumbi ra yindlu, ku nga makamara ya le tlhelo lama rhendzeleke, leswaku ma hlanganisiwa ni khumbi, kambe a ma hlanganisiwanga ni khumbi ra yindlu.+  A ku ndlandlamuxiwa ni phaseji leyi rhendzelekaka yi ya ehenhla swinene eka makamara ya le tlhelo, hikuva phaseji ya yindlu a yi ya ehenhla swinene ka yindlu matlhelo hinkwawo.+ Hikokwalaho a ku ri ni ku ndlandlamuxiwa ka yindlu yi ya ehenhla, ku suka eka xithezi xa le hansi, munhu a a swi kota ku tlhandlukela eka xithezi xa le henhla-henhla,+ hi xithezi xa le xikarhi.  Kutani ndzi vona leswaku a ku ri ni xitupu xo tlakuka xa yindlu ematlhelo hinkwawo. Loko ku ri masungulo ya makamara ya le tlhelo, a ku ri ni rihlanga leri heleleke ra swisungunu swa tsevu leri hlanganisaka.+  Ku anama ka khumbi ra kamara ra le tlhelo, ku ya ehandle, a ku ri swisungunu swa ntlhanu. A ku ri ni ndhawu leyi yi siyiweke yi pfulekile loko ku akiwa makamara ya le tlhelo ya yindlu. 10  Exikarhi ka makamara yo dyela eka wona,+ ku anama a ku ri swisungunu swa 20 ku rhendzeleka ni yindlu hinkwayo, ematlhelo hinkwawo. 11  Vungheno bya kamara ra le tlhelo a byi ri endhawini leyi yi siyiweke yi pfulekile, vungheno byin’we a byi ri en’walungwini, vungheno byin’wana byi ri edzongeni; ku anama ka ndhawu leyi yi siyiweke yi pfulekile a ku ri swisungunu swa ntlhanu, ematlhelo hinkwawo. 12  Muako lowu a wu ri emahlweni ka ndhawu ya le tlhelo, leyi tlhelo ra yona a ri ri evupela-dyambu, a wu aname swisungunu swa 70. Khumbi ra muako a ri aname swisungunu swa ntlhanu, ri ri tano ematlhelo hinkwawo; ku leha ka rona a ku ri swisungunu swa 90. 13  Hiloko a pima yindlu, yi lehe swisungunu swa 100; kutani ndhawu ya le tlhelo ni muako ni makhumbi ya yona, swi lehe swisungunu swa 100. 14  Ku anama ka yindlu emahlweni ka yona ni ndhawu ya le tlhelo ku ya evuxeni a ku ri swisungunu swa 100. 15  Hiloko a pima ku leha ka muako emahlweni ka ndhawu ya le tlhelo leyi a yi ri endzhaku ka wona ni makupakupa ya yona eka tlhelo leri ni le ka tlhelo lerin’wana, ku va swisungunu swa 100. Ni tempele ni ndhawu ya le mpfungwe+ ni makupakupa ya xivava; 16  tinyangwa ni mafasitere lama nga ni marimba yo lala,+ makupakupa a ma swi rhendzerile hi vunharhu bya swona. Emahlweni ka nyangwa a ku fuleriwe hi ntsandza ematlhelo hinkwawo,+ ku suka ehansi ku ya emafasitereni; mafasitere a ma funengetiwile. 17  Ku ya ehenhla ka vungheno ni ku ya fika endlwini ya le mpfungwe ni le handle ni le henhla ka khumbi hinkwaro ematlhelo hinkwawo, endlwini ya le mpfungwe ni le handle, a ku ri ni mimpimo, 18  hambi ku ri makerubu+ lama vatliweke ni swifaniso swa murhi wa ncindzu,+ ku ri ni xifaniso xa murhi wa ncindzu exikarhi ka kerubu ni kerubu, kerubu a yi ri ni swikandza swimbirhi.+ 19  Xikandza xa munhu a xi langute xifaniso xa murhi wa ncindzu eka tlhelo leri, xikandza xa xinghalana xa ntshiva a xi ri ekusuhi ni xifaniso xa murhi wa ncindzu eka tlhelo lerin’wana,+ swi vatliwe endlwini hinkwayo ematlhelo hinkwawo. 20  Ku suka ehansi ku ya evunghenweni bya le henhla a ku ri ni makerubu lama vatliweke ni swifaniso swa murhi wa ncindzu, ekhumbini ra tempele. 21  Loko ku ri tempele, rimba ra kona a ri ri ni matlhelo ya mune yo ringana;+ emahlweni ka ndhawu yo kwetsima a ku ri ni nchumu lowu langutekaka ku fana ni ku languteka loku landzelaka: 22  alitari ya ntsandza a yi tlakuke swisungunu swinharhu, ku leha ka yona a ku ri swisungunu swimbirhi, a yi ri ni tinsika ta yona ta le yinhleni.+ Ku leha ka yona ni makhumbi ya yona a swi endliwe hi ntsandza. A ya emahlweni a ndzi byela a ku: “Leri i tafula leri nga emahlweni ka Yehovha.”+ 23  Tempele ni ndhawu yo kwetsima a swi ri ni tinyangwa timbirhi.+ 24  Timbanti a ti ri ta tinyangwa, hatimbirhi a ti pfulekela matlhelo hinkwawo. Nyangwa yin’we a yi ri ni timbanti timbirhi, ni leyin’wana a yi ri ni timbanti timbirhi. 25  Ehenhla ka tona, ehenhla ka tinyangwa ta tempele, a ku endliwe makerubu ni swifaniso swa murhi wa ncindzu,+ ku fana ni leswi swi endleriweke makhumbi, a ku ri ni xiangamelo xa ntsandza emahlweni ka rikupakupa ehandle. 26  A ku ri ni mafasitere ya marimba yo lala+ ni swifaniso swa murhi wa ncindzu laha ni lahanya ematlhelo ka rikupakupa ni makamara ya le tlhelo ya yindlu ni swiangamelo.

Tinhlamuselo ta le hansi