Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 37:1-28

37  Voko ra Yehovha a ri ri ehenhla ka mina,+ lerova a ndzi humesa hi moya wa Yehovha,+ a ndzi tshamisa erivaleni, a ri tele marhambu.+  Hiloko a ndzi hundzisa ekusuhi na wona ematlhelweni hinkwawo, kutani waswivo, a ma tele ngopfu evuandlalweni bya rivala, waswivo, a ma ome ngopfu.+  A ndzi byela a ku: “N’wana wa munhu, xana marhambu lawa ma nga tlhela ma hanya?” Hiloko ndzi ku: “Yehovha, Hosi leyi Lawulaka, wena u swi tiva kahle.”+  A ya emahlweni a ku eka mina: “Profeta ehenhla ka marhambu lawa, u ku eka wona, ‘Oho n’wina marhambu lama omeke, yingisani rito ra Yehovha:  “‘Yehovha, Hosi leyi Lawulaka u byele marhambu lawa a ku: “Maswivo, ndzi mi tisela ku hefemula, mi fanele mi tlhela mi hanya.+  Ndzi ta nghenisa misiha eka n’wina, ndzi mi endla mi va ni nyama, ndzi ta mi nameka nhlonge, ndzi nghenisa ku hefemula eka n’wina, kutani mi fanele mi tlhela mi hanya;+ mi ta swi tiva leswaku hi mina Yehovha.”’”+  Kutani ndzi profeta hilaha ndzi lerisiweke hakona.+ Hiloko ku twakala mpfumawulo loko ndzi heta ku profeta, a ku ri ni ku ketlaketla, marhambu ma tshinelelana, rhambu ri ya eka rhambu ra rona.  Kutani waswivo, ndzi vona misiha ehenhla ka wona, nyama yi humelela, nhlonge yi namekiwa ehenhla ka wona. Loko ku ri ku hefemula, a ku nga ri kona eka wona.  A ya emahlweni a ku eka mina: “Profeta eka mheho. Profeta, Wena n’wana wa munhu, u byela mheho u ku, ‘Yehovha, Hosi leyi Lawulaka u te: “Tana, Wena mheho, u huma ematlhelo ya mune ya mheho, u hunga ehenhla ka vanhu lava va dlayiweke,+ leswaku va tlhela va hanya.”’”+ 10  Kutani ndzi profeta hilaha a ndzi leriseke hakona, ku hefemula ku ta eka wona, ma sungula ku hanya, ma yima hi milenge,+ ma ri vandla lerikulu ngopfu swinene ra nyimpi. 11  A ya emahlweni a ku eka mina: “N’wana wa munhu, loko ku ri marhambu lawa, i yindlu hinkwayo ya Israyele.+ Vona va ri, ‘Marhambu ya hina ma omile, ntshembo wa hina wu herile.+ Hi lovisiwile.’ 12  Hikokwalaho profeta, u ma byela u ku, ‘Yehovha, Hosi leyi Lawulaka u te: “Maswivo, ndzi pfula swilahlo swa n’wina,+ ndzi ta mi humesa eswilahlweni swa n’wina, N’wina vanhu va mina, ndzi mi tisa emisaveni ya Israyele.+ 13  Mi ta tiva leswaku hi mina Yehovha loko ndzi pfula swilahlo swa n’wina niloko ndzi mi humesa eswilahlweni swa n’wina, N’wina vanhu vanga.”’+ 14  ‘Ndzi ta nghenisa moya wa mina eka n’wina, mi ta tlhela mi hanya,+ ndzi ta mi tshamisa emisaveni ya n’wina; mi ta tiva leswaku mina, Yehovha, ndzi vurile, ndzi ta swi endla,’ ku vula Yehovha.”+ 15  Rito ra Yehovha ri ya emahlweni ri fika eka mina, ri ku: 16  “Loko ku ri wena, Wena n’wana wa munhu, teka nkhavi,+ u tsala ehenhla ka wona, u ku, ‘Eka Yuda ni le ka vana va Israyele lava a tirhisanaka na vona.’+ U teka nkhavi wun’wana, u tsala ehenhla ka wona, u ku, ‘Eka Yosefa, nkhavi wa Efrayimi,+ yindlu hinkwayo ya Israyele, lava a tirhisanaka na vona.’+ 17  Yi tshinelelanise yi va nkhavi wun’we eka wena, yi ta va wun’we evokweni ra wena.+ 18  Loko vana va vanhu varikwenu va sungula ku vula va ku, ‘Xana u nga hi byela leswaku swilo leswi swi vula yini eka wena?’+ 19  va byele u ku, ‘Yehovha, Hosi leyi Lawulaka u te: “Maswivo, ndzi teka nkhavi wa Yosefa, lowu wu nga evokweni ra Efrayimi, ni tinyimba ta Israyele, lava a tirhisanaka na vona, ndzi ta va veka eka wona, ku nga nkhavi wa Yuda, ndzi ta va endla nkhavi wun’we,+ va ta va nchumu wun’we evokweni ra mina.”’ 20  Minkhavi leyi u tsalaka ehenhla ka yona yi ta va evokweni ra wena ematihlweni ya vona.+ 21  “Va byele u ku, ‘Yehovha, Hosi leyi Lawulaka u te: “Maswivo, ndzi teka vana va Israyele exikarhi ka matiko lawa va yeke eka wona, ndzi ta va hlengeleta ematlhelweni hinkwawo, ndzi va tisa emisaveni ya vona.+ 22  Ndzi ta va endla tiko rin’we etikweni leri,+ etintshaveni ta Israyele, hinkwavo va ta va ni hosi yin’we,+ va nga ka va nga ha vi matiko mambirhi, naswona a va nge he hambanisiwi va va mimfumo yimbirhi.+ 23  Va nga ka va nga ha tinyamisi hi swifaniso swa hava leswi hombolokeke ni hi swilo swa vona leswi nyangatsaka ni hi ku tlula nawu ka vona hinkwako;+ kunene ndzi ta va ponisa etindhawini ta vona hinkwato to tshama eka tona leti va dyoheleke eka tona, ndzi ta va endla va tenga,+ va ta va vanhu va mina, mina ndzi ta va Xikwembu xa vona.+ 24  “‘“Nandza wa mina Davhida u ta va hosi ya vona,+ hinkwavo va ta va ni murisi un’we;+ va ta famba eka swiboho swa mina swa vuavanyisi,+ va ta hlayisa milawu ya mina,+ kunene va ta swi hetisisa.+ 25  Va ta tshama etikweni leri ndzi ri nyikeke nandza wa mina, Yakobe, leri vatata wa n’wina va tshameke eka rona,+ va ta tshama eka rona,+ vona ni vana va vona ni vana va vana va vona hilaha ku nga riki na makumu,+ Davhida nandza wa mina u ta va ndhuna ya vona hilaha ku nga riki na makumu.+ 26  “‘“Ndzi ta endla ntwanano wa ku rhula swin’we na vona;+ va ta va ni ntwanano lowu tshamaka hilaha ku nga heriki.+ Ndzi ta va veka, ndzi va andzisa,+ ndzi veka vukwetsimelo bya mina exikarhi ka vona hilaha ku nga riki na makumu.+ 27  Tabernakela ya mina yi ta va ehenhla ka vona,+ kunene ndzi ta va Xikwembu xa vona, vona va ta va vanhu va mina.+ 28  Matiko ma ta tiva leswaku mina, Yehovha,+ ndzi hlawulekisa Israyele loko vukwetsimelo bya mina byi va exikarhi ka vona hilaha ku nga riki na makumu.”’”+

Tinhlamuselo ta le hansi