Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 33:1-33

33  Rito ra Yehovha ri ya emahlweni ri fika eka mina, ri ku:  “N’wana wa munhu, byela vana va vanhu varikwenu,+ u ku eka vona, “‘Loko ndzo tshuka ndzi tisa banga+ ehenhla ka tiko ni vanhu va tiko, hinkwavo ka vona, va teka munhu va n’wi veka a va murindzi wa vona,+  kutani a vona banga ri ta ehenhla ka tiko, a yimba nanga, a lemukisa vanhu,+  loyi a swi twaka, a twa mpfumawulo wa nanga kambe a nga ku amukeli ku lemukisiwa,+ kutani banga ri ta, ri n’wi dlaya, ngati yakwe yi ta va enhlokweni ya yena.+  U wu twile mpfumawulo wa nanga, kambe a nga ku amukelanga ku lemukisiwa. Ngati yakwe yi ta va ehenhla ka yena n’wini. Loko a a lo amukela ku lemukisiwa, moya-xiviri wakwe a wu ta va wu ponile.+  “‘Loko ku ri murindzi, loko o vona banga ri ta kutani a nga yi yimbi nanga,+ vanhu va nga lemukisiwi nikatsongo, banga ri ta, ri dlaya moya-xiviri exikarhi ka vona, wu ta susiwa hikwalaho ka xihoxo xa wona,+ kambe ngati ya wona ndzi ta yi lava evokweni ra murindzi.’+  “Loko ku ri wena, Wena n’wana wa munhu, ndzi ku endle murindzi endlwini ya Israyele,+ u fanele u twa rito leri humaka enon’wini wa mina, u ndzi lemukisela vona.+  Loko ndzi byela lowo homboloka ndzi ku, ‘Wena lowo homboloka, u ta fa hakunene,’+ kambe u nga vulavuli u lemukisa lowo homboloka endleleni yakwe,+ lowo homboloka u ta fa exihoxweni xakwe,+ kambe ngati yakwe ndzi ta yi lava evokweni ra wena.  Kambe, loko wena u lemukisa lowo homboloka endleleni yakwe leswaku a tlhela eka yona, kambe a nga tlheli endleleni yakwe, u ta fa exihoxweni xakwe,+ kasi wena entiyisweni u ta kutsula moya-xiviri wa wena.+ 10  “Loko ku ri wena, Wena n’wana wa munhu, byela yindlu ya Israyele, u ku, ‘Hikwalaho mi vurile mi ku: “Hikwalaho ka leswi ku tlula nawu ka hina ni swidyoho swa hina swi nga le henhla ka hina, nileswi hi bolaka eka swona,+ xana hi nga ya emahlweni hi hanya hi ndlela yihi?”’+ 11  Va byele u ku, ‘“Loko ntsena ndza ha hanya,” ku vula Yehovha, Hosi leyi Lawulaka, “ku fa ka lowo homboloka a ndzi ku tsakeli,+ kambe ndzi tsakela leswaku lowo homboloka a tlhela+ endleleni yakwe, a ya emahlweni a hanya.+ Tlhelani, tlhelani etindleleni ta n’wina to biha,+ ha yini mi fanele ku fa, N’wina yindlu ya Israyele?”’+ 12  “Loko ku ri wena, Wena n’wana wa munhu, byela vana va vanhu varikwenu u ku, ‘Ku lulama ka lowo lulama a ku nge n’wi kutsuli esikwini ra ku hlasela kakwe.+ Kambe loko ku ri vuhomboloki bya lowo homboloka, byi nga ka byi nga n’wi khunguvanyisi esikwini leri a tlhelaka ha rona eka vuhomboloki byakwe.+ Hambi ku ri loyi a nga ni ku lulama a nga ka a nga swi koti ku ya emahlweni a hanya ha kona esikwini leri a dyohaka ha rona.+ 13  Loko ndzi byela lowo lulama, ndzi ku: “Kunene u ta ya emahlweni u hanya,” kutani yena a tshemba ku lulama ka yena, a endla ku pfumala vululami,+ swiendlo swakwe hinkwaswo swo lulama a swi nge tsundzukiwi, kambe ku kala vululami loku a ku endleke—u ta fela kona.+ 14  “‘Loko ndzi byela lowo homboloka ndzi ku: “Kunene u ta fa,”+ kutani a tlhela exidyohweni xakwe,+ a kombisa vululami ni ku tshembeka,+ 15  lowo homboloka a vuyisa nchumu lowu wu nga xitiyisekiso xa nandzu,+ a tlherisela swilo leswi tekiweke hi vukanganyisi,+ a famba hi milawu ya vutomi a nga endli hi ku kala vululami,+ kunene u ta hambeta a hanya.+ A nga ka a nga fi. 16  Swidyoho leswi a swi endleke swi nga ka swi nga ha tsundzukiwi eka yena.+ U kombise vululami ni ku tshembeka. Kunene u ta hambeta a hanya.’+ 17  “Vana va vanhu va ka n’wina va te, ‘Ndlela ya Yehovha a yi lulamisiwanga kahle,’+ kambe, ndlela ya vona hi yona leyi nga lulamisiwangiki kahle. 18  “Loko wo lulama a tshika ku lulama ka yena kutani a endla leswi nga lulamangiki, u fanele a fela swona.+ 19  Kutani loko lowo homboloka a tshika ku homboloka ka yena, a kombisa vululami ni ku tshembeka, u ta hambeta a hanya+ hikwalaho ka swona. 20  “N’wina mi te, ‘Ndlela ya Yehovha a yi lulamisiwanga kahle.’+ Ndzi ta avanyisa un’wana ni un’wana wa n’wina hi ku ya hi tindlela ta yena,+ N’wina yindlu ya Israyele.” 21  Hi ku famba ka nkarhi hi lembe ra vu-12, hi n’hweti ya vukhume, esikwini ra vuntlhanu ra n’hweti leyi a hi ri evukhumbini, ku fike munhu la balekeke eYerusalema+ eka mina, a ku: “Muti wu hlaseriwile!”+ 22  Kutani voko ra Yehovha a ri ri ehenhla ka mina nimadyambu ku nga si ta loyi a balekeke,+ hiloko Yena a pfula nomu wa mina yoloye a nga si ta eka mina nimixo, kutani nomu wa mina wu pfuleka, ndzi kota ku vulavula.+ 23  Rito ra Yehovha ri fika eka mina, ri ku: 24  “N’wana wa munhu, vaaki va tindhawu leti ti onhakeke+ va vulavula malunghana ni misava ya Israyele, va ku, ‘Abrahama a a ri un’we ntsena kambe u teke tiko.+ Hina hi tele; hi nyikiwe tiko ri va ra hina.’+ 25  “Hikokwalaho va byele u ku, ‘Yehovha, Hosi leyi Lawulaka u te: “Mi tshamela ku dya ni ngati,+ mi tshamela ku tlakusela mahlo ya n’wina eka swifaniso swa hava leswi hombolokeke,+ mi tshamela ku chulula ngati.+ Kutani, xana mi fanele mi teka tiko?+ 26  Mi titshege hi banga ra n’wina.+ Mi endle nchumu lowu nyenyetsaka,+ naswona un’wana ni un’wana wa n’wina u nyamise nsati wa nakulobye.+ Kutani, xana mi fanele mi teka tiko?”’+ 27  “U fanele u va byela u ku, ‘Yehovha, Hosi leyi Lawulaka u te: “Loko ntsena ndza ha hanya, kunene lava va nga etindhawini leti onhakeke va ta wisiwa hi banga;+ loyi a nga ehenhla ka vuandlalo bya nhova, kunene ndzi ta n’wi nyiketa a va swakudya swa swivandzana;+ lava va nga etindhawini leti tiyeke ni le mabakweni+ va ta dlayiwa hi ntungu. 28  Tiko ndzi ta ri endla ri va rhumbi,+ ri onheteriwa, ku tinyungubyisa hi ntamu wa rona ku ta hela+ ni tintshava ta Israyele ti ta endliwa rhumbi,+ ku nga ri na munhu la hundzaka kona. 29  Va ta tiva leswaku hi mina Yehovha loko ndzi endla tiko ri va rhumbi,+ ri onheteriwa, hikwalaho ka swilo hinkwaswo swo nyenyetsa leswi va swi endleke.”’+ 30  “Loko ku ri wena, Wena n’wana wa munhu, vana va vanhu varikwenu va vulavula ha wena emakhumbini ni le tinyangweni ta tindlu,+ naswona munhu u vulavule ni un’wana, un’wana ni un’wana a vulavula ni makwavo, va ku, ‘Hi kombela mi ta, mi ta twa rito leri ri humaka eka Yehovha.’+ 31  Va ta nghena eka wena, ku fana ni ku nghena ka vanhu, va tshama emahlweni ka wena va ri vanhu va mina;+ kunene va ta twa marito ya wena kambe leswi a va nge swi endli,+ hikuva hi nomu wa vona va phofula ku navela ko biha naswona mbilu ya vona yi landzelela+ mpindzulo wa vona wo biha. 32  Kutani waswivo, eka vona u kotisa risimu leri khutazaka rirhandzu, ku fana ni loyi a nga ni rito ro saseka, loyi a xi chayaka kahle xitende.+ Kunene va ta twa marito ya wena, kambe a va kona lava va ma endlaka.+ 33  Kutani loko swi hetiseka—waswivo, swi fanele swi hetiseka+—va fanele va swi tiva leswaku muprofeta a a ri kona exikarhi ka vona.”+

Tinhlamuselo ta le hansi