Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 32:1-32

32  Hi lembe ra vu-12, hi n’hweti ya vu-12, esikwini ro sungula ra n’hweti, rito ra Yehovha ri fika eka mina, ri ku:  “N’wana wa munhu, yimba risimu ra xirilo malunghana na Faro hosi ya Egipta, u vula eka yena u ku, ‘U miyetiwile kukota xinghalana xa ntshiva xa matiko.+ “‘U fane ni xivandzana xa le matini emalwandle,+ u hambeta u hlambela emilambyeni ya wena, u tshamela ku pfindlusa mati hi milenge ya wena, u thyakisa milambu ya vona.’  “Yehovha, Hosi leyi Lawulaka u te, ‘Ndzi ta andlala rikoka+ ra mina ehenhla ka wena hi ku tirhisa nhlengeletano ya vanhu vo tala, kunene va ta ku nghenisa erikokeni ra mina.+  Ndzi ta ku tshika etikweni. Ndzi ta ku cukumeta+ ehenhla ka vuandlalo bya nhova. Swivumbiwa hinkwaswo swa matilo ndzi ta swi tshamisa eka wena, swivandzana swa misava+ hinkwayo ndzi ta swi xurhisa ha wena.  Ndzi ta veka nyama ya wena ehenhla ka tintshava, ndzi tata minkova hi thyaka ra wena.+  Kutani tiko ndzi ta ri nwisa leswi swi humaka eka wena, engatini ya wena,+ ehenhla ka tintshava; swinambyana swi ta tala ha wena.’  “‘Loko u timeka, ndzi ta pfala matilo kutani ndzi endla tinyeleti ti va munyama. Loko ku ri dyambu, ndzi ta ri funengeta hi mapapa, n’weti wona wu nga ka wu nga humesi ku vonakala ka wona.+  Timboni hinkwato ta ku vonakala ematilweni—ndzi ta ti endla munyama hikwalaho ka wena, ndzi ta endla tiko ra wena ri va ni munyama,’ ku vula Yehovha, Hosi leyi Lawulaka.  “‘Ndzi ta hlundzukisa mbilu ya vanhu vo tala loko ndzi humesa makhumbi ematikweni ma ya eka matiko lawa u nga ma tivangiki.+ 10  Kunene ndzi ta endla leswaku vanhu vo tala va ku chava,+ tihosi ta vona ti ta rhurhumela hikwalaho ka ku chava wena, loko ndzi hatimisa banga ra mina eswikandzeni swa tona,+ ti ta rhurhumela nkarhi hinkwawo, yin’wana ni yin’wana hi moya-xiviri wa yona, esikwini leri u nga ta wa ha rona.’+ 11  “Hikuva Yehovha, Hosi leyi Lawulaka u te, ‘Banga ra hosi ya Babilona ri ta ta ehenhla ka wena.+ 12  Ndzi ta endla ntshungu wa wena wu wisiwa hi mabanga ya lava va nga ni matimba, vaxanisi va matiko, hinkwavo ka vona;+ entiyisweni va ta susa ku tinyungubyisa ka Egipta, ntshungu wakwe hinkwawo wu ta lovisiwa.+ 13  Ndzi ta lovisa swifuwo swa yena hinkwaswo leswi nga ekusuhi ni mati yo tala,+ kutani nenge wa munhu wa la misaveni wu nga ka wu nga ha ma pfindlusi,+ hambi ku ri masondzo ya swifuwo a ma nge he ma pfindlusi.’ 14  “‘Enkarhini wolowo ndzi ta endla mati ya kona ma tenga, milambu ya kona ndzi ta yi khulukisa kukota mafurha,’ ku vula Yehovha, Hosi leyi Lawulaka. 15  “‘Loko ndzi endla tiko ra Egipta ri va rhumbi naswona tiko ri va rhumbi eka leswi swi ri taleleke,+ loko ndzi dlaya vaaki hinkwavo va rona, va ta tiva leswaku hi mina Yehovha.+ 16  “‘Leri i risimu ra xirilo, kunene vanhu va ta ri yimba. Hambi ku ri vanhwanyana va matiko va ta ri yimba; va ta ri yimba+ ehenhla ka Egipta ni le henhla ka ntshungu wa kona hinkwawo,’ ku vula Yehovha, Hosi leyi Lawulaka.” 17  Swi tlhela swi endleka hi lembe ra vu-12, esikwini ra vu-15 ra n’hweti, rito ra Yehovha ri fika eka mina, ri ku: 18  “N’wana wa munhu, rilela ntshungu wa Egipta, u wu rhelerisa,+ wona ni vanhwanyana va matiko lamakulu, etikweni leri nga ehansi,+ swin’we ni lava va rhelelaka emugodini.+ 19  “‘Xana u fana na mani hi ku saseka?+ Rhelela, kutani u ta vekiwa swin’we ni lava va nga yimbangiki!’+ 20  “‘Va ta wela exikarhi ka lava va dlayiweke hi banga.+ U nyiketiwe ebangeni. N’wi kokeni a suka swin’we ni ntshungu wakwe hinkwawo. 21  “‘Vavanuna lava va rhangelaka va ta vulavula ni vapfuni va yena exikarhi ka Sheol.+ Kunene va ta rhelela;+ va ta etlela kukota lava va nga yimbangiki, lava va dlayiweke hi banga. 22  Hi kona laha Asiriya ni nhlengeletano yakwe hinkwayo va nga kona.+ Swilahlo swakwe swi n’wi rhendzerile. Hinkwavo va dlayiwile, lava va wisiwaka hi banga.+ 23  Hikuva swilahlo swa yena swi vekiwe eswiphen’wini swa le ndzeni-ndzeni swa mugodi,+ nhlengeletano ya yena yi rhendzele sirha rakwe, hinkwavo va dlayiwile, va wisiwe hi banga, hikuva va chavise tiko ra lava va hanyaka. 24  “‘Ku na Elami+ ni ntshungu wakwe hinkwawo lowu rhendzeleke sirha rakwe, hinkwavo lava va dlayiweke, lava va wisiwaka hi banga, lava va rheleleke va nga yimbanga etikweni ra le hansi, lava va vangeleke ku chava etikweni ra lava va hanyaka; va ta byarha ku tsongahatiwa ka vona swin’we ni lava va rhelelaka emugodini.+ 25  Exikarhi ka lava va dlayiweke va n’wi andlalele sangu+ exikarhi ka ntshungu wakwe hinkwawo. Swilahlo swa yena swi ri rhendzerile. Hinkwavo a va yimbanga, va dlayiwe hi banga,+ hikuva ku endliwe leswaku va chaviwa etikweni ra lava hanyaka; va ta byarha ku tsongahatiwa ka vona swin’we ni lava va rhelelaka emugodini. U vekiwe exikarhi ka lava va dlayiweke. 26  “‘Hi kona laha Mixeke+ na Tubala+ swin’we ni ntshungu wakwe hinkwawo va nga kona. Swilahlo swakwe swi n’wi rhendzerile. Hinkwavo a va yimbanga, va tlhaviwe hi banga, hikuva va endle leswaku va chaviwa etikweni ra lava va hanyaka. 27  Xana va nga ka va nga etleli ni lava va nga ni matimba,+ va wela eka lava va nga yimbangiki, lava va rheleleke eSheol ni matlhari ya vona ya nyimpi? Va ta veka mabanga ya vona ehansi ka tinhloko ta vona, swihoxo swa vona swi ta va ehenhla ka marhambu ya vona,+ hikuva lava va nga ni matimba a va tisa ku chava etikweni ra lava va hanyaka.+ 28  Loko ku ri wena, u ta tshoviwa exikarhi ka lava va nga yimbangiki, u ta etlela ni lava va dlayiweke hi banga. 29  “‘Hi kona laha ku nga na Edomu,+ tihosi ta yena ni tindhuna ta yena hinkwato, lava va vekiweke swin’we ni lava va dlayiweke hi banga,+ hambileswi a va ri ni matimba; vona va ta etlela ni lava va nga yimbangiki+ ni lava va rhelelaka emugodini. 30  “‘Hi kona laha ku nga ni tinghanakana ta le n’walungwini, hinkwato ka tona, ni Vasidoni hinkwavo,+ lava va rheleleke swin’we ni lava va dlayiweke, ekhombyeni ra vona hikwalaho ka matimba ya vona, va khomiwe hi tingana. Va ta etlela va nga yimbanga swin’we ni lava va dlayiweke hi banga, va ta byarha ku tsongahatiwa ka vona ni lava va rhelelaka emugodini.+ 31  “‘Lava hi vona lava Faro a nga ta va vona, kunene u ta chaveleleka hikwalaho ka ntshungu wakwe hinkwawo.+ Faro swin’we ni vandla rakwe hinkwaro ra nyimpi va ta va vanhu lava dlayiweke hi banga,’ ku vula Yehovha, Hosi leyi Lawulaka. 32  “‘Hikuva u endle leswaku a chaviwa etikweni ra lava va hanyaka,+ u ta vekiwa exikarhi ka lava va nga yimbangiki, swin’we ni lava va dlayiweke hi banga, Faro ni ntshungu wakwe hinkwawo,’ ku vula Yehovha, Hosi leyi Lawulaka.”

Tinhlamuselo ta le hansi