Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 3:1-27

3  A ya emahlweni a ku eka mina: “N’wana wa munhu, lexi u xi kumaka, dyana. Dyana buku leyi yi songiwaka,+ u famba u ya vulavula ni yindlu ya Israyele.”  Hiloko ndzi pfula nomu, hakatsongo-tsongo a ndzi dyisa buku leyi yi songiwaka.+  Kutani a ku eka mina: “N’wana wa munhu, u fanele u dyisa khwiri ra wena, leswaku u tata marhumbu ya wena hi buku leyi yi songiwaka leyi ndzi ku nyikaka yona.” Hiloko ndzi yi dya, enon’wini wa mina a yi nyanganya kukota vulombe.+  A ya emahlweni a ku eka mina: “N’wana wa munhu, famba u ya nghena exikarhi ka yindlu+ ya Israyele, u fanele u va byela marito ya mina.  Hikuva a wu rhumiwi eka vanhu lava nga riki na vutlharhi eririmini+ kumbe eka lava va nga ni ririmi ro tika+—endlwini ya Israyele,  ku nga ri eka vanhu vo tala lava nga riki na vutlharhi kumbe va ririmi ro tika, lava marito ya vona u nga ma twisisiki.+ Loko a ndzi ku rhume eka vona, vona a va ta ku yingisa.+  Kambe loko ku ri va yindlu ya Israyele, a va nge swi lavi ku ku yingisa, hikuva a va swi lavi ku ndzi yingisa;+ hikuva hinkwavo va yindlu ya Israyele va ome nhloko naswona va ni mbilu yo nonon’hwa.+  Waswivo! Xikandza xa wena ndzi xi nonon’hwise ku fana ni swikandza+ swa vona ni mombo wa wena ndzi wu nonon’hwise ku fana ni mimombo ya vona.+  Mombo wa wena ndzi wu endle wu fana ni dayimani, leyi nonon’hwaka ku tlula ribye ro tiya.+ U nga tshuki u va chava,+ naswona u nga chavisiwi hi swikandza swa vona,+ hikuva i yindlu leyi xandzukaka.”+ 10  A ya emahlweni a ku eka mina: “N’wana wa munhu, marito ya mina hinkwawo lawa ndzi nga ta ku byela wona, ma nghenise embilwini+ ya wena kutani u yingisa hi tindleve ta wena. 11  Yana u ya nghena exikarhi ka vanhu lava nga evukhumbini,+ exikarhi ka vana va vanhu va ka n’wina, u ta va byela u ku, ‘Yehovha, Hosi leyi Lawulaka u te,’ ku nga khathariseki leswaku va yingisa kumbe va ma tshika.”+ 12  Kutani moya wu ndzi susumeta,+ endzhaku ka mina ndzi twa mpfumawulo wa rimoyana leri nga ni matimba lamakulu:+ “Ku vangama ka Yehovha a ku dzunisiwe endhawini leyi.”+ 13  Naswona a ku ri ni mpfumawulo wa timpapa ta swivumbiwa leswi hanyaka leti a ti khumbana,+ mpfumawulo wa mavhilwa wu ri ekusuhi swinene na tona,+ ni mpfumawulo wa rimoyana leri nga ni matimba lamakulu. 14  Hiloko moya wu ndzi susumeta,+ wu ndzi teka, lerova ndzi famba hi xiviti hi vukarhi bya moya wa mina, naswona voko ra Yehovha a ri ri ni matimba ehenhla ka mina.+ 15  Kutani ndzi nghena exikarhi ka vanhu lava nga evukhumbini eTela-vhivhi, lava a va tshama+ hi le nambyeni wa Kebari,+ hiloko ndzi tshama laha a va tshama kona; ndzi tshama kona ku ringana masiku ya nkombo, ndzi chava exikarhi ka vona.+ 16  Eku heleni ka masiku ya nkombo rito ra Yehovha ri fika eka mina, ri ku: 17  “N’wana wa munhu, ndzi ku endle murindzi endlwini ya Israyele,+ enon’wini wa mina u ta twa marito kutani u ta ndzi lemukisela vona.+ 18  Loko ndzi byela lowo homboloka ndzi ku, ‘U ta fa hakunene,’+ kutani wena u nga n’wi lemukisi, u nga vulavuli leswaku u lemukisa lowo homboloka endleleni yakwe yo homboloka leswaku u n’wi londzovota a hanya,+ leswi a hombolokeke, u ta fa exihoxweni xakwe,+ kambe ngati yakwe ndzi ta yi lava evokweni ra wena.+ 19  Kambe loko wena u n’wi lemukisile lowo homboloka+ kutani a nga tlheli eku hombolokeni ka yena ni le ndleleni yakwe yo homboloka, u ta fa+ hikwalaho ka xihoxo xa yena; kambe loko ku ri wena u ta va u kutsule moya-xiviri wa wena.+ 20  Loko lowo lulama a tshika ku lulama ka yena kutani a endla leswi nga lulamangiki,+ mina ndzi ta veka xikhunguvanyiso emahlweni ka yena,+ yena u ta fa hikuva wena a wu n’wi lemukisanga. U ta fa hikwalaho ka xidyoho xakwe,+ swiendlo swakwe swo lulama leswi a swi endleke a swi nge tsundzukiwi,+ kambe ngati ya yena ndzi ta yi lava evokweni ra wena.+ 21  Kambe, loko u n’wi lemukisile lowo lulama leswaku lowo lulama a nga tshuki a dyoha,+ kutani a nga dyohi, kunene u ta hambeta a hanya hikuva u lemukisiwile,+ kutani wena u ta va u kutsule moya-xiviri wa wena.”+ 22  Kutani voko ra Yehovha ri va ehenhla ka mina kwalaho, a ya emahlweni a ndzi byela a ku: “Suka u yima, u ya erivaleni ra le nkoveni,+ ndzi ta vulavula na wena kona.” 23  Hiloko ndzi suka ndzi yima ndzi ya erivaleni ra le nkoveni, kutani waswivo, ku vangama ka Yehovha a ku ri kwalaho,+ ku fana ni ku vangama loku ndzi ku voneke enambyeni wa Kebari,+ kutani ndzi wa hi xikandza.+ 24  Hiloko moya wu nghena eka mina,+ wu ndzi yimisa hi milenge,+ yena a sungula ku ndzi byela a ku: “Tana, u pfaleriwa endzeni ka yindlu ya wena. 25  Oho n’wana wa munhu, waswivo, kunene va ta veka tintambhu ehenhla ka wena, va ku boha ha tona leswaku u nga fambi exikarhi ka vona.+ 26  Kutani ririmi ra wena ndzi ta ri namarheta ehenhla ka nomu wa wena,+ kunene u ta va mbheveve,+ u nga ka u nga vi munhu loyi a va tshinyaka,+ hikuva i yindlu leyi xandzukaka.+ 27  Kutani loko ndzi vulavula na wena ndzi ta pfula nomu wa wena, u ta va byela u ku,+ ‘Leswi swi vuriwe hi Yehovha, Hosi leyi Lawulaka.’ Loyi a twaka a a twe,+ ni loyi a tshikaka a a tshike, hikuva i yindlu leyi xandzukaka.+

Tinhlamuselo ta le hansi