Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 28:1-26

28  Rito ra Yehovha ri ya emahlweni ri fika eka mina, ri ku:  “N’wana wa munhu, byela murhangeri wa Tiri, u ku, ‘Yehovha, Hosi leyi Lawulaka u te: “‘“Hikwalaho ka leswi mbilu ya wena yi titlakuseke,+ nileswi u tshamelaka ku vula u ku, ‘Mina ndzi xikwembu.+ Ndzi tshame exitshan’weni xa xikwembu,+ exikarhi ka lwandle leri pfulekeke,’+ kasi u munhu wa la misaveni,+ ku nga ri xikwembu,+ u tshamela ku endla mbilu ya wena yi fana ni mbilu ya xikwembu—  waswivo, wena u tlharihe ku tlula Daniyele.+ Ku hava swihundla leswi swi ku tsandzeke.+  U tiendlele rifuwo hi vutlhari bya wena ni hi ku twisisa ka wena, naswona u hambeta u kuma nsuku ni silivhere eswitlatini swa wena.+  U andzise rifuwo ra wena, hi vutlhari bya wena byo tala,+ hi nhundzu ya wena leyi xavisiwaka,+ kutani mbilu ya wena yi sungula ku titlakusa+ hikwalaho ka rifuwo ra wena.”’+  “‘Hikokwalaho Yehovha, Hosi leyi Lawulaka u te: “Hikwalaho ka leswi u endlaka mbilu ya wena yi fana ni mbilu ya xikwembu,+  hikokwalaho ndzi ku tisela vafambi,+ lava va xanisaka matiko,+ kunene va ta hlomula mabanga ya vona va lwa ni ku saseka ka vutlhari bya wena, va nyamisa ku vangama ka wena lokukulu.+  Va ta ku nghenisa emugodini,+ u ta fa rifu ra loyi a dlayiweke exikarhi ka lwandle leri pfulekeke.+  Xana u ta vula hakunene u ku, ‘Hi mina xikwembu,’ emahlweni ka loyi a ku dlayaka,+ kasi u munhu ntsena wa la misaveni, ku nga ri xikwembu,+ evokweni ra lava va ku nyamisaka?”’ 10  “‘U ta fa rifu ra lava va nga yimbangiki, hi voko ra vafambi,+ hikuva mina ndzi vurile,’ ku vula Yehovha, Hosi leyi Lawulaka.” 11  Rito ra Yehovha ri ya emahlweni ri fika eka mina, ri ku: 12  “N’wana wa munhu, yimba risimu ra xirilo malunghana ni hosi ya Tiri,+ u ku eka yona, ‘Yehovha, Hosi leyi Lawulaka u te: “‘“Wena u lemela ntila, lowu teleke vutlhari+ ni lowu sasekeke hilaha ku hetisekeke.+ 13  A wu ri kona aEdeni, entangeni wa Xikwembu.+ Ribye rin’wana ni rin’wana ra risima a ri ku funengetile, rhubi, topazi ni yaspere; krisolita, onikisi+ ni jeyida; safiri, tukoyisi+ ni emeralda; vutshila bya mavekelo ya wena ni mahlangana-nhlolo lawa a ma ri eka wena, a swi ri swa nsuku. Swi endliwe swi lungheka esikwini leri u tumbuluxiweke ha rona. 14  U kerubu leri totiweke, leri funengetaka, naswona u vekiwe hi mina. A wu ri entshaveni yo kwetsima ya Xikwembu.+ A wu famba-famba exikarhi ka maribye lama pfurhaka. 15  A wu pfumala xihoxo etindleleni ta wena, ku sukela esikwini leri u tumbuluxiweke+ ha rona ku fika loko ku kumiwa ku pfumala ku lulama eka wena.+ 16  “‘“Hikwalaho ka nhundzu ya wena yo tala yo xavisa,+ va tate madzolonga eka wena, kutani u sungula ku dyoha.+ Ndzi ku susa entshaveni ya Xikwembu kukota loyi a nyamisiweke, ndzi ta ku lovisa,+ Wena kerubu leri ri funengetaka, exikarhi ka maribye lama pfurhaka. 17  “‘“Mbilu ya wena yi titlakusile hikwalaho ka ku saseka ka wena.+ U onhe vutlhari bya wena hikwalaho ka ku vangama ka wena lokukulu.+ Ndzi ta ku cumetela emisaveni.+ Ndzi ta ku veka emahlweni ka tihosi, leswaku ti languta eka wena.+ 18  “‘“Hikwalaho ka swihoxo swa wena swo tala,+ hikwalaho ka ku pfumala vululami eka nhundzu ya wena leyi xavisiwaka,+ u nyamise vukwetsimelo bya wena. Ndzi ta pfuxa ndzilo exikarhi ka wena. Hi wona lowu wu nga ta ku lovisa.+ Ndzi ta ku endla u va nkuma ehenhla ka misava ematihlweni ya hinkwavo lava va ku vonaka.+ 19  Loko ku ri hinkwavo lava va ku tivaka exikarhi ka vanhu, kunene va ta ku languta hi ku hlamala.+ U ta va nchumu lowu chavisaka hi xitshuketa, a wu nge he vi kona hilaha ku nga riki na makumu.”’”+ 20  Rito ra Yehovha ri ya emahlweni ri fika eka mina, ri ku: 21  “N’wana wa munhu, yisa xikandza xa wena eSidoni,+ u profeta ku lwisana na yena. 22  U fanele u ku, ‘Yehovha, Hosi leyi Lawulaka u te: “Waswivo, ndzi lwa na wena,+ Wena Sidoni, kunene ndzi ta vangamisiwa exikarhi ka wena;+ vanhu va ta tiva leswaku hi mina Yehovha loko ndzi n’wi avanyisa,+ ndzi hlawulekisiwa eka yena.+ 23  Ndzi ta rhumela ntungu eka yena ni ngati eswitarateni swakwe.+ Loyi a dlayiweke u ta wela exikarhi ka yena hi banga leri lwaka na yena matlhelo hinkwawo;+ vanhu va ta tiva leswaku hi mina Yehovha.+ 24  Endlwini ya Israyele ku nga ka ku nga ha vi na xo tlhava lexi nga ni khombo+ kumbe mutwa lowu vavaka eka hinkwavo lava va va rhendzeleke, lava va va hlekulaka; vanhu va ta tiva leswaku hi mina Yehovha, Hosi leyi Lawulaka.”’ 25  “‘Yehovha, Hosi leyi Lawulaka u te: “Loko ndzi hlengeleta yindlu ya Israyele evanhwini lava a va hangalasiwe eka vona,+ ndzi ta hlawulekisiwa exikarhi ka vona ematihlweni ya matiko.+ Kunene va ta tshama emisaveni+ ya vona leyi ndzi yi nyikeke nandza wa mina, Yakobe.+ 26  Va ta tshama eka yona va sirhelelekile,+ va aka tindlu,+ va rima ni masimu ya vhinya,+ kutani va ta tshama va sirhelelekile+ loko ndzi avanyisa hinkwavo lava va va hlekulaka ematlhelweni hinkwayo ya vona;+ va ta tiva leswaku hi mina Yehovha Xikwembu xa vona.”’”

Tinhlamuselo ta le hansi