Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 27:1-36

27  Rito ra Yehovha ri ya emahlweni ri fika eka mina, ri ku:  “Loko ku ri wena, Wena n’wana wa munhu, yimba risimu ra xirilo malunghana na Tiri,+  u fanele u byela Tiri u ku, “‘Oho, wena la tshamaka evunghenweni bya lwandle,+ wansati la xavisaka, wa vanhu va swihlala swo tala,+ Yehovha, Hosi leyi Lawulaka u te: “Oho Tiri, wena u te, ‘Ndzi saseke hilaha ku hetisekeke.’+  Tindhawu ta wena ti le ndzeni swinene ka lwandle.+ Vaaki va wena va endle ku saseka ka wena ku hetiseka.+  Va ku endlele mapulanga hinkwawo hi timhandzi ta yunipa ta le Seniri.+ Va teke mukedari wa le Lebanoni+ leswaku va endla xihondzo xa ngalava eka wena.  Swikongomiso swa wena swa ngalava va swi endle hi mirhi leyikulu ngopfu ya le Baxani. Xifuva xa xikepe xa wena va xi endle hi timhondzo ta tindlopfu ni murhi wa kipresi, leswi humaka eswihlaleni swa Kitimi.+  Lapi ra wena leri andlariweke ri endliwe hi ntsembyana wa mivalavala wa le Egipta,+ ri va seyila ra wena. Tinguvu leti u ti ambaleke i ta ngoti ya wasi+ ni voya lebyi pendiweke byi va bya xivunguvungu+ leswi humaka eswihlaleni swa Elixha.+  “‘“Vaaki va Sidoni+ ni va Avhadi+ a va ri vatluti va wena. Oho Tiri, vanhu va wena lava va nga ni vuswikoti a va ri eka wena;+ a va ri vatlutisi va wena.+  Hambi ku ri vavanuna lava kuleke va Gebali+ ni vanhu va yena lava va nga ni vuswikoti a va ri eka wena, va ri valemi va minsomo ya wena.+ Swikepe hinkwaswo swa lwandle ni vatluti va swona a va ri eka wena, va bindzula ni van’wana hi swilo leswi xavisiwaka. 10  Vaperesiya+ ni Valudi+ ni vavanuna va Putu+—a va ri exikarhi ka vandla ra wena ra nyimpi, vavanuna va wena va nyimpi. A va hayeka xitlhangu ni xihuku eka wena.+ Hi vona lava va endleke leswaku u vangama. 11  Vana va Avhadi,+ vandla ra wena ra nyimpi, a va ri ehenhla ka marhangu ya wena hinkwawo, tinghwazi hi tona leti a ti ri eswihondzweni swa wena. A va hayeka switlhangu swa vona swa xirhendzevutana emarhangwini ya wena hinkwawo.+ Vona va endle leswaku u hetiseka hi ku saseka. 12  “‘“Taraxixi+ a wu bindzula na yena hi swilo swo tala swa mixaka hinkwayo, swa nkoka.+ Ku nyikeriwe hi vuhlayiselo bya wena hikwalaho ka silivhere, nsimbi, thini ni ntsopfu.+ 13  Yavhani,+ Tubala+ na Mixeke+ a va xaviselana na wena. Ku nyikeriwe hi swilo swa wena swo bindzula hikwalaho ka mimoya-xiviri ya vanhu+ ni swilo swa koporo. 14  Ku suka endlwini ya Togarima+ a ku ri ni tihanci to gadiwa, tihanci ta nyimpi ni timeyila, leti ku nyikeriweke hi vuhlayiselo bya wena hikwalaho ka tona. 15  Vana va Dedani+ a va xaviselana na wena; swihlala swo tala a wu swi tirhisela ku bindzula; timhondzo ta tindlopfu+ ni eboni, u nyikiwe swona swi va nyiko. 16  A wu bindzula na Edomu hikwalaho ka mintirho ya wena yo tala. Ku nyiketiwe vuhlayiselo bya wena hikwalaho ka tukoyisi,+ voya lebyi pendiweke byi va bya xivunguvungu ni malapi ya mivalavala ni lapi ro vevuka ni tikorala ni tirhubi. 17  “‘“Yuda ni tiko ra Israyele a va xaviselana na wena. Ku nyikeriwe+ hi swilo swa wena swo bindzula, hikwalaho ka koroni+ ya le Miniti+ ni swakudya swo hlawuleka ni vulombe+ ni mafurha ni balsama.+ 18  “‘“A wu bindzula na Damaska+ hi mintirho ya wena yo tala, hi vunyingi bya swilo swa wena hinkwaswo swa nkoka, hi vhinyo+ ya Helboni ni voya bya mpunga wo tshwukanyana. 19  Vhedana na Yavhani va le Uzala—va nyiketile hikwalaho ka vuhlayiselo bya wena. Nsimbi leyi furiweke, khasiya ni rihlanga+—swi ve swilo swa wena swo bindzula ha swona. 20  Dedani+ a a ku xavisela tinguvu ta swilo leswi lukiweke swa ku gada. 21  Vaarabiya+ ni tindhuna hinkwato ta Kedari+ a va ri vabindzuri lava ku tirhelaka. Hi swinyimpfana swa matsune, makhuna ni swiphongo+—a va ku bindzulela ha swona. 22  Vaxavisi va le Xeba+ ni va le Rama+ a va xaviselana na wena; ku nyiketiwe vuhlayiselo bya wena hikwalaho ka leswinene ngopfu swa mixaka hinkwayo ya swinun’hweriso ni hikwalaho ka maribye ya risima ni ya mixaka hinkwayo ni nsuku.+ 23  Harani+ na Kane na Edeni,+ vaxavisi va le Xeba,+ Axuru+ na Kilimada a va xaviselana na wena. 24  A va xaviselana na wena tinguvu ta ku xonga, tinguvu ta wasi ni tinguvu ta mivalavala ni swiandlalo swa mivala yimbirhi, mapindza lama photiweke, lama endliweke ma tiya, entsindza wa wena wa bindzu. 25  “‘“Swikepe swa Taraxixi+ a swi ri tigolonyi ta wena ta swilo swa wena swo bindzula ha swona, lerova u tala, u vangama swinene exikarhi ka lwandle leri pfulekeke.+ 26  “‘“Lava va ku tlutisaka va ku tise ematini yo tala.+ Mheho ya le vuxeni yi ku tshovile exikarhi ka lwandle leri pfulekeke.+ 27  Swilo swa wena swa nkoka ni vuhlayiselo bya wena,+ swilo swa wena swo cincisana ha swona, vatluti va wena ni vatlutisi va wena,+ lava va lemaka minsomo+ ya wena ni lava va cincisaka hi swixavisiwa+ swa wena ni vavanuna va wena hinkwavo va nyimpi,+ lava va nga eka wena, eka nhlengeletano ya wena hinkwayo, lava va nga exikarhi ka wena,—va ta wa exikarhi ka lwandle leri pfulekeke esikwini leri u nga ta wa ha rona.+ 28  “‘“Tiko leri pfulekeke ri ta ninginika+ loko ku twakala mpfumawulo wa xirilo xa vatlutisi va wena. 29  Hinkwavo lava va tamelaka xikongomisi xa ngalava, vatluti, vatlutisi hinkwavo va lwandle, kunene va ta xika eswikepeni swa vona; va ta yima ehenhla ka misava.+ 30  Kunene va ta twarisa rito ra vona, va rila hi xiviti eka wena.+ Va ta tichela ritshuri etinhlokweni ta vona.+ Va ta vumbuluka enkumeni.+ 31  Va ta boheka ku tsemeta mpandla hikwalaho ka wena,+ va tikhama hi nguvu yo khwaxa,+ va ku rilela hi moya-xiviri lowu nga ni mbitsi,+ hi ku kalakala lokukulu. 32  Kunene, eku rileni ka vona va ta yimba risimu ra xirilo eka wena, va ku bela nkosi,+ “‘“‘I mani loyi a fanaka na Tiri,+ la fanaka ni loyi a miyetiweke exikarhi ka lwandle?+ 33  Loko vuhlayiselo+ bya wena byi huma elwandle leri pfulekeke,+ u enerise vanhu vo tala.+ U fuwise tihosi+ ta misava hi swilo swa wena swo tala swa nkoka ni swilo swa wena swo cincisa ha swona. 34  Kutani u tshovekile elwandle leri pfulekeke, evuentweni bya mati.+ Loko ku ri swilo swo bindzula ha swona ni nhlengeletano ya wena hinkwayo,+ swi wele endzeni ka wena. 35  Vaaki hinkwavo va le swihlaleni+—kunene va ta ku languta hi ku hlamala, tihosi ta vona ti ta rhurhumela hi ku chava.+ Swikandza swi ta khwanyana.+ 36  Loko ku ri vabindzuri lava nga exikarhi ka vanhu, kunene va ta ku bela noti.+ Hi xitshuketa, u ta hundzuka nchumu lowu chavisaka, a wu nge he vi kona hilaha ku nga riki na makumu.’”’”+

Tinhlamuselo ta le hansi