Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Ezekiyele 17:1-24

17  Rito ra Yehovha ri ya emahlweni ri fika eka mina, ri ku:  “N’wana wa munhu, vula mawetana,+ vula marito ya vutlhari eka yindlu ya Israyele.+  U fanele u ku, ‘Yehovha, Hosi leyi Lawulaka u te: “Gama lerikulu,+ leri nga ni timpapa letikulu,+ leri nga ni timpiko to leha, leri nga ni tinsiva to tala, ta mavalavala, ri te eLebanoni+ ri kha maninginingi ya murhi+ wa mukedari.+  Ri khe xihluke xa le henhla swinene, ri xi tisa etikweni ra Kanana;+ ri xi veka emutini wa vaxavisi.  Ku tlula kwalaho, ri teka mbewu yin’wana ya tiko+ ri yi veka ensin’wini ya mbewu. Ri yi veka kukota munengenedzi ematini yo tala,+ ri yi veka kukota murhi wa munengenedzi.  Kutani yi sungula ku kula, hakatsongo-tsongo yi va murhi wa vhinya lowukulu lowu nga lehangiki,+ lowu switluka swa wona swi rhandzaka ku khotsekela endzeni; timitsu ta wona, ti va ehansi ka wona hakatsongo-tsongo. Eku heteleleni wu va murhi wa vhinya, wu humesa swihluke, wu humesa ni marhavi.+  “‘“Kutani ku va ni gama rin’wana lerikulu,+ leri nga ni timpapa letikulu, ri ri ni timpiko letikulu,+ kutani waswivo, murhi lowu wa vhinya wu yisa timitsu ta wona eka rona wu ri ni ndlala.+ Wu yisa switluka swa wona eka rona leswaku ri wu cheleta, ekule ni mintanga leyi a wu byariwe eka yona.+  A wu simuriwile wu simekiwa ensin’wini leyinene,+ ekusuhi ni mati yo tala, leswaku wu humesa marhavi ni ku tswala mihandzu, wu va murhi lowukulu wa vhinya.”’  “Vula u ku, ‘Yehovha, Hosi leyi Lawulaka u te: “Xana wu ta humelela?+ Xana munhu un’wana a nge tsuvuli timitsu+ ta wona, a endla mihandzu ya kona yi va ni mahakatimba? Xana swihluke swa wona leswi swa ha ku khiwaka a swi fanelanga swi oma?+ Swi ta oma. A wu nge tlakusiwi hi timitsu ta wona hi voko lerikulu kumbe hi vanhu lavanyingi. 10  Kutani waswivo, hambi leswi wu simuriweke wu tlhela wu simekiwa, xana wu ta humelela? Xana a wu nge omi hi ku helela, loko mheho ya le vuxeni yi wu khumba?+ Wu ta oma+ emintangeni leyi wu hlukeleke eka yona.”’” 11  Rito ra Yehovha ri ya emahlweni ri fika eka mina, ri ku: 12  “Ndzi kombela u byela yindlu leyi yi xandzukaka,+ u ku, ‘Xana a mi swi tivi leswaku swilo leswi swi vula yini?’ Vula u ku, ‘Maswivo! Hosi ya Babilona yi fike eYerusalema, yi teka hosi+ ya kona ni tihosana ta kona, yi ti tisa eka yona eBabilona.+ 13  Ku tlula kwalaho, yi teke mbewu yin’wana ya vuhosi,+ yi endla ntwanano na yona,+ yi yi endlisa xihlambanyo; yi susa ni vavanuna lava rhangelaka tiko,+ 14  leswaku mfumo wu va exiyin’weni xa le hansi,+ wu nga swi koti ku titlakusa, leswaku wu yima hi ku hlayisa ntwanano wa yona.+ 15  Kambe eku heteleleni yi n’wi xandzukerile+ hi ku rhumela varhumiwa va yona aEgipta, leswaku yi n’wi nyika tihanci+ ni vanhu lavanyingi. Xana yi ta humelela? Xana yi ta baleka, yona leyi yi endlaka swilo leswi, leyi yi tluleke ntwanano? Xana yi ta baleka hakunene?’+ 16  “‘“Loko ntsena ndza ha hanya,”+ ku vula Yehovha, Hosi leyi Lawulaka, “exikhundleni xa hosi leyi yi n’wi vekeke a va hosi loyi a xi languteleke ehansi xihlambanyo xa yona,+ a tlula ntwanano wa yona, u ta fa na yena exikarhi ka Babilona.+ 17  Hi vuthu lerikulu ra nyimpi ni hi nhlengeletano ya vunyingi lebyikulu, Faro a nge endli leswaku a humelela enyimpini,+ hi ku yimisa rirhangu ro anama ni hi ku aka rirhangu ro sirhelela, leswaku ku lovisiwa mimoya-xiviri yo tala.+ 18  U xi langutele ehansi xihlambanyo+ hi ku tlula ntwanano, kutani waswivo, u nyikele voko rakwe,+ a endla swilo leswi hinkwaswo. A nge baleki.”’+ 19  “‘Hikokwalaho Yehovha, Hosi leyi Lawulaka u te: “Loko ntsena ndza ha hanya, hakunene xihlambanyo xa mina lexi a xi languteleke ehansi+ ni ntwanano wa mina lowu a wu tluleke—ndzi ta swi tisa enhlokweni yakwe. 20  Ndzi ta n’wi funengeta hi rikoka ra mina, kunene u ta khomiwa hi rikoka ra mina ro hlota;+ ndzi ta n’wi tisa eBabilona kutani ndzi avanyisiwa na yena kona malunghana ni ku pfumala ku tshembeka kakwe loku a ku kombiseke ehenhla ka mina.+ 21  Loko ku ri vabaleki hinkwavo lava nga eka mavuthu yakwe hinkwawo, va ta wisiwa hi banga, lava va seleke va ta hangalasiwa hinkwako eka mheho yin’wana ni yin’wana.+ Mi ta tiva leswaku mina, Yehovha, ndzi swi vurile.”’+ 22  “‘Yehovha, Hosi leyi Lawulaka u te: “Mina ndzi ta teka, ndzi veka maninginingi ya murhi wa mukedari lowu tlakukeke;+ ku suka ehenhla ka swirhabyana swa wona ndzi ta kha xirhabyana xo olova,+ ndzi ta xi simeka ehenhla ka ntshava yo leha, yo tlakuka.+ 23  Ndzi ta xi simeka entshaveni leyi tlakukeke ya Israyele,+ kunene xi ta va ni marhavi, xi humesa mihandzu,+ xi va mukedari lowukulu.+ Ehansi ka wona ku ta tshama tinyenyana hinkwato ta ripapa rin’wana ni rin’wana; ti ta tshama endzhutini wa switluka swa wona.+ 24  Mirhi hinkwayo ya nhova yi ta tiva leswaku mina, Yehovha,+ ndzi tsongahate murhi lowu tlakukeke,+ murhi wa xiyimo xa le hansi ndzi wu veke ehenhla,+ ndzi omise murhi lowu wa ha tsakamaka,+ ndzi rhumbukisa murhi lowu omeke. Mina, Yehovha, ndzi swi vurile, ndzi swi endlile.”’”+

Tinhlamuselo ta le hansi