Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Estere 5:1-14

5  Kutani hi siku ra vunharhu+ Estere a ambala swiambalo swa le vuhosini,+ endzhaku ka sweswo a yima exivaveni xa le mpfungwe+ xa yindlu ya hosi ku langutana ni yindlu ya hosi, hosi yi tshame exiluvelweni xa yona xa vuhosi etlhelo ka nyangwa ya yindlu.  Hi ku hatlisa loko hosi yi vona Estere lowa hosi ya xisati a yime exivaveni, a kuma tintswalo+ ematihlweni ya yona, lerova hosi yi nyiketa Estere nhonga ya vuhosi ya nsuku+ leyi a yi ri evokweni ra yona. Estere a tshinela kutani a khumba makumu ya nhonga ya vuhosi.  Kutani hosi yi ku eka yena: “Xana u na yini, Wena Estere hosi ya xisati, naswona xikombelo xa wena hi xihi?+ Hafu ya vuhosi+—a yi nyikiwe wena!”  Estere a hlamula a ku: “Loko swi vonaka swi ri swinene eka hosi, hosi na Hamani+ a va te namuntlha enkhubyeni+ lowu ndzi yi endleleke wona.”  Hiloko hosi yi ku: “N’wina, kombelani Hamani a endla hi ku hatlisa+ hi ku landza rito ra Estere.” Endzhaku hosi na Hamani va tile enkhubyeni lowu endliweke hi Estere.  Hi ku famba ka nkarhi hosi yi ku eka Estere hi nkarhi wa nkhuvo wa vhinyo: “Hi xihi xikombelo xa wena?+ A xi nyikiwe wena! Xana u kombela yini? Hafu ya vuhosi—a swi endliwe!”  Hiloko Estere a angula a ku: “Lexi ndzi xi kombelaka ni lexi ndzi xi lavaka hi lexi,  Loko ndzi kume tintswalo ematihlweni+ ya hosi niloko swi vonaka swi ri swinene eka hosi leswaku yi ndzi nyika leswi ndzi swi kombelaka ni ku ndzi endlela leswi ndzi swi lavaka, hosi na Hamani a va te enkhubyeni lowu ndzi nga ta va endlela wona mundzuku, kutani mundzuku ndzi ta endla hi ku landza rito ra hosi.”+  Hiloko Hamani a huma hi siku rero a tsakile+ ni mbilu yakwe yi tsakile; kambe hi ku hatlisa loko Hamani a vona Mordekayi enyangweni ya hosi,+ nileswaku a nga sukanga a yima+ ni ku rhurhumela hikwalaho ka yena,+ xikan’we-kan’we Hamani a n’wi karihela+ ngopfu Mordekayi. 10  Hambiswiritano, Hamani a tikhoma, a nghena endlwini yakwe. Hiloko a rhumela rito leswaku ku nghenisiwa vanakulobye na Zerexi+ nsati wakwe; 11  Hamani a va byela ku vangama ka rifuwo+ rakwe ni vana+ vakwe vo tala ni hinkwaswo leswi hosi yi n’wi kuriseke ha swona ni ndlela leyi a tlakukeke ha yona ehenhla ka tihosana ni malandza ya hosi.+ 12  Hamani a ya emahlweni a ku: “Ku tlula kwalaho, Estere lowa hosi ya xisati u nghenise hosi na mina ntsena enkhubyeni lowu a wu endleke,+ ni mundzuku+ ndzi rhambiwe eka yena ni hosi. 13  Kambe eka hinkwaswo leswi—a xi kona lexi xi ndzi tsakisaka, ntsena loko ndza ha vona Mordekayi lowa Muyuda a tshame enyangweni ya hosi.” 14  Hiloko Zerexi nsati wakwe ni vanakulobye hinkwavo va ku eka yena: “A va endle mhandzi+ yo tlakuka ku ringana swisungunu swa 50. Kutani nimixo+ byela hosi leswaku va hayeka Mordekayi eka yona.+ U nghena enkhubyeni ni hosi u tsakile.” Mhaka leyi yi vonaka yi ri yinene+ emahlweni ka Hamani, kutani a lerisa leswaku ku endliwa mhandzi.+

Tinhlamuselo ta le hansi