Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Esaya 66:1-24

66  Yehovha u te: “Matilo i xiluvelo xa mina,+ misava i vunavelo bya mina.+ Kutani, xana yi kwihi yindlu leyi n’wina mi nga ndzi akelaka yona,+ naswona yi kwihi ndhawu leyi ndzi nga wiselaka eka yona?”+  “Hikwalaho swilo leswi hinkwaswo swi endliwe hi voko ra mina, hinkwaswo leswi swi va kona hikwalaho ka mina,”+ ku vula Yehovha. “Kutani, loyi ndzi ta n’wi languta, loyi a xanisekaka a tlhela a tivona nandzu emoyeni,+ a rhurhumerisiwa hi rito ra mina.+  “Loyi a tlhavaka nkunzi u fana ni loyi a dlayaka munhu.+ Loyi a endlaka xitlhavelo hi nyimpfu u fana ni loyi a tshovaka nhamu ya mbyana.+ Loyi a humesaka nyiko—ngati ya nguluve!+ Loyi a nyikelaka murhi wa risuna+ wa xitsundzuxo u fana ni loyi a nkhensaka hi marito ya masalamusi.+ Nakambe hi vona lava hlawuleke tindlela ta vona, naswona moya-xiviri wa vona wu tsakele swilo leswi nyenyetsaka.+  Na mina ndzi ta hlawula tindlela ta ku va xanisa;+ ndzi ta va tisela swilo leswi va chavisaka;+ hikwalaho ka leswi ndzi vitaneke kambe ku nga hlamuli munhu; ndzi vulavurile kambe a ku yingisanga munhu;+ va tshamela ku endla swo biha ematihlweni ya mina, va hlawule nchumu lowu ndzi nga wu tsakeriki.”+  Twanani rito ra Yehovha, n’wina lava rhurhumerisiwaka hi rito ra yena:+ “Vamakwenu lava mi vengaka,+ lava mi hlongolaka hikwalaho ka vito ra mina,+ va te, ‘Onge Yehovha a nga vangamisiwa!’+ Nakambe u fanele a humelela eka n’wina a tsakile,+ hi vona lava nga khomisiwa tingana.”+  Ku ni mpfumawulo wa hasahasa emutini, mpfumawulo lowu humaka etempeleni!+ I mpfumawulo wa Yehovha lowu tlheriselaka leswi fanelaka valala vakwe.+  U velekile a nga si va ni switlhavi swa ku veleka.+ A nga si khomiwa hi ku lun’wa ka ku veleka, u tswale n’wana waxinuna.+  I mani la tweke swo fana ni leswi?+ I mani la voneke swilo swo fana ni leswi?+ Xana tiko+ ri nga velekiwa hi siku rin’we hi switlhavi swa ku veleka?+ Kumbe, xana tiko+ ri nga velekiwa hi nkarhi wun’we?+ Hikuva Siyoni u ve ni switlhavi swa ku veleka a tlhela a veleka vana va yena.  “Loko ku ri mina, xana ndzi ta endla leswaku munhu a va ekusuhi ni ku veleka, kambe a nga veleki?”+ ku vula Yehovha. “Kumbe, xana ndzi endla leswaku ku va ni ku veleka naswona ndzi endla leswaku ku pfariwa?” ku vule Xikwembu xa wena. 10  Tsakani na Yerusalema, mi tsakisisa na yena,+ n’wina hinkwenu lava n’wi rhandzaka.+ Khanani swinene na yena, n’wina hinkwenu lava tshamelaka ku n’wi rilela;+ 11  hikwalaho ka leswi mi nga ta an’wa kutani mi enerisiwa hi vele ra nchavelelo lowukulu; hikwalaho ka leswi mi nga ta nwa, mi kuma ntsako lowu heleleke enhlungwini ya ku vangama kakwe.+ 12  Hikuva Yehovha u te: “Maswivo, ndzi yisa ku rhula eka yena kukota nambu+ ni ku vangama ka matiko kukota xinambyana lexi khulukaka,+ kunene mi ta an’wa.+ Mi ta rhwariwa hi tsheve, mi ta xingiwa.+ 13  Ku fana ni munhu loyi mana wakwe a hambetaka a n’wi chavelela, na mina ndzi ta hambeta ndzi mi chavelela;+ naswona mi ta chaveleriwa malunghana na Yerusalema.+ 14  Kunene mi ta vona, mbilu ya n’wina yi ta boheka ku khana,+ marhambu+ ya n’wina ma ta hluka kukota byanyi byo olova.+ Kunene voko ra Yehovha ri ta tivisiwa eka malandza ya yena,+ kambe entiyisweni u ta sola valala va yena.”+ 15  “Hikuva Yehovha u ta ku fana ni ndzilo,+ ni makalichi yakwe ma fana ni xidzedze,+ leswaku a tlherisela ku hlundzuka ka yena hi vukarhi lebyikulu ni ku tshinya ka yena hi malangavi ya ndzilo.+ 16  Entiyisweni Yehovha u ta lwa ni nyama hinkwayo hi ndzilo, ina, hi banga rakwe;+ kunene va ta tala lava dlayiweke hi Yehovha.+ 17  Lava va tihlawulekisaka va tibasisela mintanga+ leyi nga endzhaku ka loyi a nga exikarhi, va dya nyama ya nguluve+ ni lexi nyenyetsaka, ni maxindyana,+ va ta fika emakumu ya vona hinkwavo,” ku vula Yehovha. 18  “Malunghana ni mintirho+ ya vona ni miehleketo ya vona,+ ndza ta leswaku ndzi hlengeleta matiko hinkwawo ni tindzimi ti va swin’we;+ va ta ta va ta vona ku vangama ka mina.”+ 19  “Exikarhi ka vona ndzi ta veka xikombiso,+ ndzi ta rhuma van’wana va lava balekeke ematikweni,+ va ya eTaraxixi,+ ePulu ni le Ludi,+ lava kokaka vurha, Tubala na Yavhani,+ swihlala swa le kule,+ lava nga xi twangiki xiviko malunghana na mina kumbe ku vona ku vangama ka mina;+ kunene va ta vulavula hi ku vangama ka mina exikarhi ka matiko.+ 20  Entiyisweni va ta humesa vamakwenu hinkwavo ematikweni+ va va nyiko eka Yehovha,+ hi tihanci ni hi makalichi ni hi tigolonyi leti funengetiweke ni hi timeyila ni hi tikamela ta matswele,+ entshaveni ya mina yo kwetsima,+ Yerusalema,” ku vule Yehovha, “ku fana ni loko vana va Israyele va tisa nyiko yi ri exibyeni lexi baseke endlwini ya Yehovha.”+ 21  “Naswona ndzi ta teka van’wana eka vona va va vaprista ni Valevhi,” ku vula Yehovha. 22  “Hikuva, tanihi leswi matilo lamantshwa+ ni misava leyintshwa+ leyi ndzi yi endlaka swi nga emahlweni ka mina,”+ ku vula Yehovha, “hi ndlela yoleyo vana va n’wina+ ni vito ra n’wina swi ta tshama swi ri kona.”+ 23  “Kunene ku suka eku thwaseni ka n’weti ku ya eku thwaseni ka n’weti ni ku suka eka savata ku ya eka savata, nyama hinkwayo yi ta nkhinsama emahlweni ka mina,”+ ku vula Yehovha. 24  “Entiyisweni va ta huma kutani va languta mintsumbu ya vanhu lava a va tlula nawu wa mina;+ hikuva swivungwana leswi nga eka vona a swi nge fi, ni ndzilo wa vona a wu nge timeki,+ va ta va nchumu lowu hlambisaka timbilu emahlweni ka nyama hinkwayo.”+

Tinhlamuselo ta le hansi