Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Esaya 59:1-21

59  Waswivo! Voko ra Yehovha a ri komanga ngopfu lerova ri nga tsandzeka ku ponisa,+ ni ndleve yakwe a yi lemekanga ngopfu lerova yi nga tsandzeka ku twa.+  E-e, kambe swihoxo swa n’wina swi hundzuke swilo leswi vangaka ku avana exikarhi ka n’wina ni Xikwembu xa n’wina,+ ni swidyoho swa n’wina swi endle leswaku xi mi tumbetela xikandza xa xona leswaku xi nga twi.+  Hikuva swandla swa n’wina swi nyamisiwe hi ngati,+ ni tintiho ta n’wina hi swidyoho. Milomu ya n’wina yi vulavule mavunwa.+ Ririmi ra n’wina ri tshamela ku hlevetela leswi nga lulamangiki nikatsongo.+  A nga kona loyi a huwelelaka hi ku lulama,+ naswona a nga kona loyi a yeke ehubyeni hi ku tshembeka. Ku tshembiwe leswi nga riki swa xiviri,+ naswona ku vulavuriwa leswi nga pfuniki nchumu.+ Ku tikiwe ku karhata, ku velekiwa leswo biha.+  Va tlhotlhorhe matandza ya nyoka ya vuxungu, va tshamele ku luka vulwembu bya pume.+ Mani na mani la dyaka matandza ya vona u ta fa, kutani tandza leri fayiweke ri ta tlhotlhorheka ri va mhiri.+  Vulwembu bya vona a byi nge vi nguvu, naswona a va nge tifunengeti hi mintirho ya vona.+ Mintirho ya vona i mintirho yo biha, naswona ntirho wa madzolonga wu le swandleni swa vona.+  Milenge ya vona yi tshamela ku tsutsumela evubihini lebyikulu,+ va hatlisela ku halata ngati leyi nga riki na nandzu.+ Miehleketo ya vona i miehleketo yo biha;+ ku phanga ni ku wisa swi le magondzweni ya vona lamakulu.+  Va honise ndlela ya ku rhula,+ naswona vululami a byi kona emintileni ya vona.+ Va hombolokise tindlela ta vona.+ Kunene a nga kona loyi a fambaka eka tona la nga ta tiva ku rhula.+  Hi yona mhaka leyi vululami byi nga ekule na hina, naswona ku tshembeka a ku hi kumi. Hi hambeta hi langutela ku vonakala, kambe waswivo, hi kuma munyama; hi langutela ku vangama, kambe hi hambeta hi famba eku dzwihaleni loku tshamaka ku ri kona.+ 10  Hi tshamela ku ambambela khumbi ku fana ni vanhu lava feke mahlo, naswona hi tshamela ku ambambela+ ku fana ni vanhu lava nga riki na mahlo. Hi khunguvanyekile ninhlikanhi lowukulu ku fana ni le munyameni wa nimadyambu; exikarhi ka tinhenha hi fana ni vanhu lava feke.+ 11  Hinkwerhu hi tshamela ku rila ku fana ni tibere; hi tshamela ku gugurhela ku fana ni matuva.+ A hi tshamela ku langutela vululami,+ kambe a byi nga ri kona; a hi langutele ku ponisiwa, kambe ku tshame ekule na hina.+ 12  Hikuva ku tlula nawu ka hina ku tele emahlweni ka wena;+ kasi loko ku ri swidyoho swa hina, un’wana ni un’wana u humese vumbhoni lebyi kanetanaka na hina.+ Hikuva ku tlula nawu ka hina ku le ka hina; loko ku ri swihoxo swa hina, hi swi tiva kahle.+ 13  Ku ve ni ku tlula nawu ni ku landzula Yehovha;+ a ku ri ni ku tlhentlha eka Xikwembu xa hina, ku vulavuriwa hi ntshikilelo ni ku pfukela,+ ku tika ni ku hlevetela marito ya mavunwa ku suka embilwini.+ 14  Kutani vululami byi boheke ku tlhelela endzhaku,+ ku tshembeka kona ku hambeta ku yima ekule.+ Hikuva ntiyiso wu khunguvanyekile entsendzeleni, leswi kongomeke a swi swi koti ku nghena.+ 15  Naswona ntiyiso a wu kumeki,+ un’wana ni un’wana loyi a fularhelaka vubihi wa phangeriwa.+ Kutani Yehovha a swi vona, a swi bihile ematihlweni ya yena leswi vululami a byi nga ri kona.+ 16  Kuteloko a vona leswaku a ku nga ri na munhu, a sungula ku hlamala leswi a ku nga ri na munhu la lamulelaka.+ Kutani voko rakwe ri n’wi ponisile, ni ku lulama ka yena hi kona loku n’wi seketeleke.+ 17  Hiloko a ambala ku lulama ku va nguvu ya mahakatimba ya nsimbi,+ ni xihuku xa ku ponisa enhlokweni yakwe.+ Ku tlula kwalaho, u vehele tinguvu ta ku rihisela ti va swiambalo,+ a titsondzela hi ku hiseka ku va nguvu yo pfumala mavoko.+ 18  U ta tisa vukarhi ehenhla ka swirha swakwe hi ku landza swiendlo swa swona,+ a khoma valala+ vakwe hi ndlela leyi va fanelaka. Swihlala u ta swi khoma hi ndlela leyi fanelaka swona.+ 19  Va ta sungula ku chava vito ra Yehovha+ ku sukela eku peleni ka dyambu, ni ku vangama ka yena ku sukela eku humeni ka dyambu,+ hikuva u ta fika ku fana ni nambu lowu karhataka, lowu kongomisiweke hi moya wa Yehovha.+ 20  “Kunene Mukutsuri+ u ta ta eSiyoni,+ ni le ka lava va nga ha wu tluliki nawu eka Yakobe,”+ ku vula Yehovha. 21  “Loko ku ri mina, ntwanano wa mina na vona hi lowu,”+ ku vule Yehovha. “Moya wa mina lowu nga ehenhla ka wena+ ni marito ya mina lawa ndzi ma ngheniseke enon’wini wa wena+—a swi nge susiwi enon’wini wa wena ni le non’wini wa vana va wena ni le non’wini wa vana va vana va wena,” ku vule Yehovha, “ku sukela sweswi ku ya fika hilaha ku nga riki na makumu.”+

Tinhlamuselo ta le hansi