Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Esaya 5:1-30

5  Ndzi kombela ku yimbelelela murhandziwa wanga risimu leri nga ra murhandziwa wanga, malunghana ni nsimu yakwe ya vhinya.+ A ku ri ni nsimu ya vhinya leyi murhandziwa wanga a a ri na yona exitsungeni lexi noneke.  Hiloko a sungula ku cela a susa maribye kutani a byala vhinya yo tshwuka leyi hlawulekeke, a aka xihondzo exikarhi ka yona.+ Nakambe a ku ri ni xikamelo xa madiriva lexi a xi celeke eka yona.+ Naswona a a tshama a langutele leswaku yi ta humesa madiriva lamanene,+ kambe yi ya emahlweni yi humesa madiriva yo biha.+  “Kutani sweswi, N’wina vaaki va Yerusalema na n’wina vanhu va Yuda, ndzi kombela mi avanyisa exikarhi ka mina ni nsimu ya mina ya vhinya.+  I yini lexi xa ha lavaka ku endliwa ensin’wini ya mina ya vhinya lexi ndzi nga siki xi endlaka?+ Hikokwalaho ka yini ndzi langutele leswaku yi humesa madiriva lamanene, kambe yi humese madiriva yo biha?  Kutani sweswi ndzi kombela ku mi tivisa leswi ndzi swi endlaka hi nsimu ya mina ya vhinya: Ku ta susiwa rihlampfu ra yona,+ kutani yi fanele yi hisiwa.+ Ku fanele ku mbundzumuxiwa rirhangu ra yona, naswona yi fanele yi va ndhawu leyi nga ta kandziyeriwa.+  Ndzi ta yi endla yi fana ni nchumu lowu lovisiweke.+ A yi nge tsheniwi, naswona a yi nge hlakuriwi.+ Kutani ku fanele ku mila xihlahla xa mitwa ni mfava;+ naswona ndzi ta lerisa mapapa leswaku ma nga ha nisi mpfula ehenhla ka yona.+  Hikuva nsimu ya vhinya+ ya Yehovha wa mavuthu i yindlu ya Israyele, vanhu va Yuda i swibyariwa leswi a a swi tsakela.+ A a tshama a langutele vuavanyisi,+ kambe waswivo, ku ni ku tlula nawu; a a langutele ku lulama, kambe waswivo, ku ni xirilo.”+  Khombo eka lava hlanganisaka yindlu ni yindlu,+ ni lava hlanganisaka nhova ni nhova kukondza ndhawu+ yi nga ha vi kona naswona n’wina mi tshamisisiwe mi ri swenu exikarhi ka tiko!  Etindleveni ta mina Yehovha wa mavuthu [u hlambanyile leswaku] tindlu to tala, hambileswi ti nga tikulu nileswi ti nga tinene, ti ta va xilo xo hlamariwa, ti ri hava vaaki.+ 10  Hikuva hambi tiekere+ ta khume ta nsimu ya vhinya ti ta humesa mpimo wun’we ntsena wa bati,+ mpimo wa homere wa mbewu wu ta humesa mpimo wa efa ntsena.+ 11  Khombo eka lava pfukaka nimpundzu swinene va lava swakunwa leswi pyopyaka,+ lava tshamaka kukondza ku va vusiku, va kala va hisiwa hi vhinyo!+ 12  Kutani eminkhubyeni ya vona ku kumeka haripa ni xitende, xingomana ni xitiringo ni vhinyo;+ kambe ntirho wa Yehovha a va wu languti ni ntirho wa mavoko ya yena a va wu vonanga.+ 13  Hikokwalaho vanhu va mina va ta ya evukhumbini hi ku pfumala vutivi;+ naswona vanhu lava tidzunisaka+ ha vona va ta dlawa hi ndlala ni ntshungu wa vona wu ta dlawa hi torha.+ 14  Hikokwalaho Sheol yi pfule moya-xiviri wa yona naswona yi ahlamise nomu wa yona ku tlula mpimo;+ kutani leswi hlawulekeke eka yena, swin’we ni ntshungu wa yena ni hasahasa ya yena ni loyi a khanaka, kunene swi ta rhelela eka yona.+ 15  Munhu wa la misaveni u ta nkhinsama, naswona munhu u ta va exiyin’weni xa le hansi hambi ma ri mahlo ya lava tlakukeke ma ta va exiyin’weni xa le hansi.+ 16  Yehovha wa mavuthu u ta tlakuka hikwalaho ka vuavanyisi,+ naswona Xikwembu xa ntiyiso, Mukwetsimi,+ kunene xi ta tihlawulekisa hi ku lulama.+ 17  Kutani swinyimpfana swa xinuna swi ta dya byanyi kukota emadyelweni ya swona; naswona valuveri va ta dya tindhawu leti nga marhumbi ta swifuwo leswi wundliwaka kahle.+ 18  Khombo eka lava kokaka xihoxo hi mapindza ya leswi nga riki ntiyiso, ni xidyoho onge hiloko va xi koka hi tintambhu ta golonyi;+ 19  lava nge: “Ntirho wakwe a wu hatlise; a wu te hi ku anghwetla, leswaku hi ta wu vona; naswona xitsundzuxo xa Mukwetsimi wa Israyele a xi tshinele, a xi te, leswaku hi ta xi tiva!”+ 20  Khombo eka lava vulaka leswaku leswinene swi bihile nileswaku leswo biha i swinene,+ lava vekaka munyama ematshan’weni ya ku vonakala ni ku vonakala ematshan’weni ya munyama, lava vekaka leswo bava ematshan’weni ya leswo tsokombela ni leswo tsokombela ematshan’weni ya leswo bava!+ 21  Khombo eka lavo tlhariha ematihlweni ya vona ni lavo tlhariha emahlweni ka swikandza swa vona!+ 22  Khombo eka lava nga ni matimba eku nweni ka vhinyo, ni le ka vanhu va ntamu lowukulu wo pfanganisa swakunwa leswi pyopyaka,+ 23  lava vulaka leswaku lowo homboloka u lulamile hi ku lava xifumbarheriso,+ ni lava tekelaka lowo lulama ku lulama ka yena!+ 24  Hikokwalaho kukota leswi ririmi ra ndzilo ri dyaka mahlanga+ nileswi ri vohlisaka byanyi byo oma hi malangavi, xikundzu xa vona xi ta fana ni ku nun’hwa ka leswo bola,+ naswona ku rhumbuka ka vona ku ta haha ku fana ni mapa, hikuva va bakanye nawu wa Yehovha wa mavuthu,+ naswona a va kombanga xichavo+ eka marito ya Mukwetsimi wa Israyele. 25  Hi yona mhaka leyi Yehovha a va hlundzukeleke ngopfu vanhu va yena, naswona u ta tshambulutela voko rakwe ehenhla ka vona, a va ba.+ Kutani tintshava ti ta rhurhumela,+ mintsumbu ya vona yi ta fana ni thyaka exikarhi ka switarata.+ Hikwalaho ka sweswo hinkwaswo, ku hlundzuka ka yena a ku tlhelanga, kambe voko ra yena ra ha tshambulukile. 26  Naswona u yimise xikombiso etikweni lerikulu ra le kule,+ a ri vitana a ri emakumu ya misava;+ kutani waswivo, hi ku anghwetla ri ta fika hi rivilo.+ 27  Ku hava loyi a karhaleke kumbe loyi a khunguvanyekaka exikarhi ka vona. Ku hava loyi a khudzehelaka naswona ku hava loyi a etlelaka. Kunene vamba ra swisuti swa vona a ri nge ntshunxiwi, ni tingoti ta maphaxani ya vona a ti nge tsemiwi hi le xikarhi; 28  hikuva miseve ya vona yi lotiwile ni mavurha ya vona hinkwawo ma kungiwile.+ Masondzo ya tihanci ta vona ma ta tekiwa ma ri ribye ro tiya,+ ni mavhilwa ya tona ma ta kotisa mheho leyikulu.+ 29  Ku vomba ka vona ku fana ni ka nghala, naswona va vomba ku fana ni swinghalana swa ntshiva.+ Kutani va ta pfhumpfha, va khoma lexi hlaseriwaka, va xi teka khwatsi, naswona a ku nge vi na mukutsuri.+ 30  Kutani va ta xi pfhumpfhela esikwini rero kukota ku pfuma ka lwandle.+ Munhu u ta languta tiko, kutani waswivo, ku ni munyama+ lowu vangaka ku karhateka; ni ku vonakala ku hundzuke munyama hikwalaho ka mathonsi lawa ma ri thonelaka.

Tinhlamuselo ta le hansi