Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Esaya 40:1-31

40  “Chavelelani, chavelelani vanhu va mina,” ku vula Xikwembu xa n’wina.+  “Vulavulani mi fikelela mbilu ya Yerusalema+ mi huwelela eka yena leswaku ntirho wa yena wa nyimpi wu hetisekile,+ leswaku xidyoho xa yena xi rihiwile.+ Hikuva u amukele hakelo leyi heleleke ya swidyoho swa yena hinkwaswo evokweni ra Yehovha.”+  Yingisani! Ku ni loyi a huwelelaka emananga:+ “Basisani ndlela ya Yehovha!+ Endlani gondzo lerikulu ra Xikwembu xa hina etimbaleni ta le kwandzasini ri lulama.+  Nkova wun’wana ni wun’wana a wu seleteriwe+ ni ntshava yin’wana ni yin’wana ni xitsunga swi mbundzumuxiwa.+ Kutani misava ya tindhundhuma yi fanele yi va tiko leri nga rivala ni misava leyi nga rikhwarha yi hundzuka rivala ra le nkoveni.+  Kunene ku vangama ka Yehovha ku ta hlavuteriwa,+ naswona nyama hinkwayo yi fanele yi ku vona,+ hikuva nomu wa Yehovha wu swi vurile.”+  Yingisa! Ku ni loyi a nge: “Huwelela!”+ Kutani un’wana u te: “Xana ndzi ta huwelela yini?” “Nyama hinkwayo i byanyi bya rihlaza, ni musa wa vona wa rirhandzu hinkwawo wu kotisa ku rhumbuka ka nhova.+  Byanyi bya rihlaza byi omile, ku rhumbuka ku vunile,+ hikuva moya wa Yehovha wu hunge ehenhla ka swona.+ Hakunene vanhu i byanyi bya rihlaza.+  Byanyi bya rihlaza byi omile, ku rhumbuka ku vunile;+ kambe loko ku ri rito ra Xikwembu xa hina, ri ta tshama hilaha ku nga riki na makumu.”+  Tlhandluka u ya entshaveni yo tlakuka,+ wena wansati la tisaka mahungu lamanene ya Siyoni.+ Tlakusa rito ra wena hi matimba, wena wansati la tisaka mahungu lamanene ya Yerusalema.+ Ri tlakuse. U nga chavi.+ Byela miti ya Yuda u ku: “Hi lexi Xikwembu xa n’wina.”+ 10  Waswivo! Yehovha, Hosi leyi Lawulaka u ta ta kukota loyi a tiyeke, voko ra yena ri ta n’wi fumela.+ Waswivo! Hakelo ya yena yi le ka yena,+ ni hakelo leyi a yi humesaka yi le mahlweni ka yena.+ 11  U ta risa ntlhambi wa yena ku fana ni murisi.+ Hi voko ra yena u ta hlengeleta swinyimpfana;+ u ta swi rhwala exifuveni xa yena.+ Leswi an’wisaka u ta swi byisa hi nkhathalelo.+ 12  I mani loyi a pimeke mati hi voko ra yena,+ a pima ni matilo hi xandla a katsa ni ntshuri wa misava+ exipin’weni,+ kumbe a kala tintshava hi xipimo ni switsunga hi swikalo? 13  I mani loyi a pimeke moya wa Yehovha, naswona i mani loyi a nga n’wi endlaka a tiva xo karhi ku fana ni loyi a n’wi tsundzuxaka?+ 14  Xana u kanele na mani leswaku a n’wi endla a twisisa, kumbe i mani loyi a n’wi dyondzisaka ndlela ya vululami, kumbe a n’wi dyondzisa vutivi,+ kumbe a n’wi tivisa ndlela ya ku twisisa ka xiviri?+ 15  Waswivo! Matiko ma fana ni thonsi leri humaka ekhuwaneni; naswona ma tekiwa tanihi ntshurinyana exikalweni.+ Waswivo! U tlakusa swihlala+ ku fana ni ntshuri wunene. 16  Hambi ku ri Lebanoni a yi enelanga ku endla ndzilo wu tshama wu pfurha, ni swiharhi+ swa yona a swi enelanga ku endla gandzelo ro hisiwa.+ 17  Matiko hinkwawo ma fana ni nchumu lowu nga riki kona emahlweni ka yena;+ yena u ma teke ma nga ri nchumu, ma ri xilo lexi nga riki xa xiviri.+ 18  Xana n’wina mi nga xi fanisa na mani Xikwembu,+ naswona i xifaniso xihi lexi mi nga xi fanisaka na xona?+ 19  La tivaka ntirho wa mavoko u vumbe xifaniso lexi endliweke hi ku n’okisiwa,+ la tirhaka hi nsimbi a xi nameka nsuku,+ a fula tinketana ta silivhere.+ 20  A hlawula+ murhi wo karhi wu va munyikelo, murhi lowu nga bolangiki. A lavisisa la nga ni vuswikoti byo endla ntirho wa mavoko, leswaku a endla xifaniso lexi vatliweke+ lexi nga ta ka xi nga tsekatsekisiwi.+ 21  Xana a mi swi tivi? Xana a mi swi twi? Xana a mi byeriwanga ku sukela eku sunguleni? Xana a mi ku tirhisanga ku twisisa ku sukela emasungulweni ya misava?+ 22  Ku ni Loyi a tshamaka ehenhla ka xirhendzevutana xa misava,+ lava tshamaka eka yona va fana ni tinjiya, Loyi a anamisaka matilo ku fana ni nturhu wo vevuka, loyi a ma andlalaka ku fana ni ntsonga wo tshama eka wona,+ 23  Loyi a tsongahataka tindhuna leti tlakukeke ti nga vi nchumu, loyi a endleke vaavanyisi va misava va va nchumu lowu nga riki wa xiviri.+ 24  Va nga si simekiwa; va nga si byariwa; xikundzu xa vona xi nga si dzima timitsu emisaveni.+ Kutani loko munhu a huhutela ehenhla ka vona, va oma;+ naswona xidzedze xi ta va teka+ ku fana ni mahlanga. 25  “Kambe, xana n’wina mi nga ndzi fanisa na mani lo-yi ndzi nga ringanaka na yena?” ku vula Mukwetsimi.+ 26  “Tlakuselani mahlo ehenhla mi vona. I mani loyi a tumbuluxeke swilo leswi?+ Hi Loyi a humesaka vuthu ra swona hi nhlayo ya swona, hinkwaswo u swi vitana hi vito.+ Hikwalaho ka ku tala ka matimba lamakulu,+ nileswi a nga ni ntamu lowukulu, ku hava ni xin’we xa swona lexi pfumalekaka. 27  “Hikwalaho ka yini u vula, Wena Yakobe, naswona hikwalaho ka yini u vula, Wena Israyele, u ku, ‘Ndlela ya mina yi tumberile eka Yehovha+ ni vululami bya mina a byi lemukiwi hi Xikwembu xanga’?+ 28  Xana a wu si swi tiva kumbe ku swi twa?+ Yehovha, Mutumbuluxi wa vugima-musi bya misava, i Xikwembu hilaha ku nga riki na makumu.+ A nga karhali kumbe ku hela matimba.+ Ku twisisa ka yena a ku lavisiseki.+ 29  Loyi a karhaleke u n’wi nyika matimba;+ kasi loyi a nga riki na wona matimba lamakulu+ u n’wi engetelela matimba. 30  Vafana va ta karhala, va hela matimba, ni majaha ma ta khunguvanyeka hakunene, 31  kambe lava tshembaka+ Yehovha va ta tlhela va kuma matimba.+ Va ta tlakuka hi timpapa ku fana ni magama.+ Va ta tsutsuma va nga heli matimba; va ta famba va nga karhali.”+

Tinhlamuselo ta le hansi