Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Esaya 2:1-22

2  Nchumu lowu Esaya n’wana wa Amotsi a wu voneke malunghana na Yuda na Yerusalema:+  Exiphen’wini xo hetelela xa masiku+ ntshava ya yindlu+ ya Yehovha yi ta simekiwa yi tiya ehenhla ka tintshava,+ kunene yi ta tlakuseriwa ehenhla ka switsunga;+ kutani matiko hinkwawo ma fanele ma khitikanela eka yona.+  Kunene vanhu vo tala va ta famba va ri karhi va ku: “Tanani,+ a hi tlhandlukeleni entshaveni ya Yehovha, endlwini ya Xikwembu xa Yakobe; kutani u ta hi letela tindlela ta yena, hi ta famba emintileni ya yena.”+ Hikuva nawu wu ta huma eSiyoni ni rito ra Yehovha ri ta huma eYerusalema.+  Kunene u ta avanyisa exikarhi ka matiko,+ a lulamisa+ timhaka ta vanhu vo tala.+ Kutani va ta fula mabanga ya vona ma va swikomu ni mafumu ya vona ma va swikhutulo.+ Tiko a ri nge tlakuseli tiko rin’wana banga, naswona a va nge he dyondzi nyimpi.+  N’wina vanhu va yindlu ya Yakobe, tanani hi ta famba eku vonakaleni ka Yehovha.+  Hikuva u fularhele vanhu va wena, yindlu ya Yakobe.+ Hikuva va tele hi leswi humaka eVuxeni,+ naswona va endla masalamusi+ kukota Vafilisita, va taleriwe hi vana va vanhu vambe.+  Naswona tiko ra vona ri tele silivhere ni nsuku, ni xuma xa vona a xi na mpimo.+ Tiko ra vona ri tele tihanci, ni makalichi ya vona a ma na mpimo.+  Tiko ra vona ri tele swikwembu leswi nga pfuniki nchumu.+ Va nkhinsamela ntirho wa mavoko ya munhu, lowu endliweke hi tintiho ta munhu.+  Munhu wa la misaveni wa nkhinsama, munhu u va exiyin’weni xa le hansi, naswona a wu nge pfuki u va rivalerile.+ 10  Nghena eribyeni u tifihla entshurini hikwalaho ka ku chaviseka ka Yehovha, ni ku tlakuka kakwe loku hlawulekeke.+ 11  Mahlo lama tikurisaka ya munhu wa la misaveni ma fanele ma va exiyin’weni xa le hansi, ni ku tlakuka ka vanhu ku fanele ku yisiwa ehansi;+ kutani Yehovha hi yexe u fanele ku tlakusiwa hi siku rero.+ 12  Hikuva i siku ra Yehovha wa mavuthu.+ Ri le henhla ka un’wana ni un’wana la titlakusaka ni la tikukumuxaka ni le henhla ka un’wana ni un’wana la nge henhla kumbe wa xiyimo xa le hansi;+ 13  ni le henhla ka mikedari hinkwayo ya Lebanoni+ leyi tlakukeke, leyi nge henhla ni le henhla ka mirhi hinkwayo leyikulu ngopfu ya Baxani;+ 14  ni le henhla ka tintshava hinkwato leti tlakukeke ni le henhla ka switsunga hinkwaswo swo leha;+ 15  ni le henhla ka xihondzo xin’wana ni xin’wana lexi tlakukeke ni le henhla ka rirhangu rin’wana ni rin’wana leri tiyisiweke;+ 16  ni le henhla ka swikepe hinkwaswo swa Taraxixi+ ni le henhla ka mabyatso hinkwawo lama navelekaka. 17  Kutani ku tikurisa ka munhu wa la misaveni ku fanele ku va exiyin’weni xa le hansi,+ ni ku tlakuka ka vanhu ku fanele ku ya ehansi; Yehovha hi yexe u fanele ku tlakusiwa hi siku rero.+ 18  Kutani swikwembu leswi nga pfuniki nchumu swi ta nyamalala hi ku helela.+ 19  Vanhu va ta nghena emabakweni ya maribye ni le timbhoveni ta misava hikwalaho ka ku chaviseka ka Yehovha ni ku tlakuka kakwe loku hlawulekeke,+ loko a suka a yima leswaku misava yi chava.+ 20  Esikwini rero munhu wa la misaveni u ta teka swikwembu swakwe leswi nga pfuniki nchumu swa silivhere ni swikwembu swakwe leswi nga pfuniki nchumu swa nsuku leswi va n’wi endleleke swona leswaku a swi nkhinsamela, a swi lahlela emahlweni ka timfukuzana ni vamangadyana,+ 21  leswaku a nghena etimbhoveni ta maribye ni le mabakweni ya maribye, hikwalaho ka ku chaviseka ka Yehovha ni ku tlakuka kakwe loku hlawulekeke,+ loko a suka a yima leswaku misava yi chava. 22  Hikwalaho, n’wina yimelani ekule ni munhu wa la misaveni, loyi ku hefemula kakwe ku nga etinhompfini ta yena,+ hikuva i yini lexi nga endlaka leswaku a tsundzukiwa?+

Tinhlamuselo ta le hansi