Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Esaya 1:1-31

1  Xivono+ xa Esaya+ n’wana wa Amotsi lexi a xi voneke malunghana na Yuda na Yerusalema emasikwini ya Uzhiya,+ Yohatama,+ Akazi+ na Hezekiya,+ tihosi ta Yuda:+  Twana,+ Wena matilo, u yingisa, Wena misava, hikuva Yehovha hi byakwe u vulavurile: “Ndzi kurise vana va majaha ni ku va wundla,+ kambe vona va ndzi pfukerile.+  Nkunzi yi n’wi tiva kahle muxavi wa yona, ni mbhongolo yi xi tiva kahle xidyelo xa n’wini wa yona; Israyele yena a nga tivi,+ vanhu va mina a va tikhomanga hi ku twisisa.”+  Khombo etikweni ra vudyoho,+ vanhu lava tikeriwaka hi xidyoho, mbewu leyi endlaka leswo biha,+ vana lava onhaka!+ Va siye Yehovha,+ Mukwetsimi wa Israyele, va n’wi khome hi ndlela leyi nga kombisiki xichavo,+ va tlhelele endzhaku.+  Hi kwihi kun’wana laha mi nga ta tlhela mi biwa kona,+ leswaku mi engetela ku pfukela?+ Nhloko hinkwayo ya vabya, ni mbilu hinkwayo yi tsanile.+  Ku suka enkondzweni wa nenge ku ya fika enhlokweni ku hava ndhawu leyi hanyeke kahle.+ Timbanga ni ku vaviseka ni mimpfembeti—a swi kamiwanga kumbe ku boheleriwa, hambi ku ri ku olovisiwa hi mafurha.+  Tiko ra n’wina ra onheteriwa,+ miti ya n’wina yi hisiwa hi ndzilo;+ misava ya n’wina—yi dyiwa+ hi vafambi+ emahlweni ka n’wina, ku onheteriwa ku fana ni ku hluriwa hi vafambi.+  Nhwanyana wa Siyoni+ u siyiwe ku fana ni ntsonga ensin’wini ya vhinya, ku fana ni yindlu yo rindza eka yona ensin’wini ya marhakarhaka, ku fana ni muti lowu rhendzeriweke.+  Loko Yehovha wa mavuthu a a nga hi siyelanga vaponi va nga ri vangani,+ a hi ta va hi fane na Sodoma, a hi ta va hi kotise Gomora.+ 10  Twanani rito ra Yehovha,+ n’wina vafumi va tihanyi+ va Sodoma.+ Yingisani nawu wa Xikwembu xa hina, n’wina vanhu va Gomora. 11  “Xana switlhavelo swa n’wina swo tala swi ndzi pfuna ha yini?” ku vula Yehovha. “Ndzi korwile hi magandzelo yo hisiwa+ lama heleleke ya tinyimpfu+ ni mafurha ya swifuwo leswi wundliweke kahle;+ naswona a ndzi yi tsakelanga+ ngati+ ya swinkunzana ni swinyimpfana swa xinuna ni swiphongo.+ 12  Loko n’wina mi hambeta mi ta vona xikandza xa mina,+ i mani loyi a laveke leswi evokweni ra n’wina, leswaku mi kandziyela swivava swa mina?+ 13  Tshikani ku tisa magandzelo ya mavele lama nga pfuniki nchumu.+ Murhi wa risuna—i nchumu lowu nyenyetsaka eka mina.+ Ku thwasa ka n’weti+ ni savata,+ ku endliwa ka ntsombano+—a ndzi nge ku lehiseli mbilu ku tirhisiwa ka masalamusi+ enhlengeletanweni yo xiximeka. 14  Moya-xiviri wa mina wu venge+ ku thwasa ka tin’weti ta n’wina ni minkarhi ya n’wina leyi vekiweke ya ntsako. Swi hundzuke ndzhwalo eka mina;+ ndzi karhele ku swi lehisela mbilu.+ 15  Naswona loko mi pfula swandla swa n’wina,+ ndzi mi fihlela mahlo ya mina.+ Hambiloko mi endla swikhongelo swo tala,+ a ndzi yingisi;+ mavoko ya n’wina ma tele ku halata ngati.+ 16  Tihlantsweni;+ tibasiseni;+ susani vubihi bya swiendlo swa n’wina ematihlweni ya mina;+ tshikani ku endla leswo biha.+ 17  Dyondzani ku endla leswinene;+ lavisisani vululami;+ ololoxani mutshikileri;+ avanyisani hi ndlela leyinene eka la nga riki na tatana;+ mi yimela mhaka leyi khumbaka noni.”+ 18  Yehovha u ri:+ “Tanani, sweswi, a hi lulamiseni timhaka exikarhi ka hina. Hambiloko swidyoho swa n’wina swo va swa ribungu, swi ta endliwa swi basa ku fana ni gamboko;+ hambiloko swi tshwuke ku fana ni nguvu ya xivunguvungu, swi ta fana ni voya. 19  Loko n’wina mi kombisa ku swi rhandza ni loko mi yingisa, mi ta dya leswinene swa tiko.+ 20  Kambe loko n’wina mi ala+ ni loko mi xandzuka, mi ta dyiwa hi banga; hikuva nomu wa Yehovha wu vurile.”+ 21  Vona ndlela leyi muti wo tshembeka+ wu hundzukeke nghwavava ha yona!+ A wu tele vululami;+ ku tshembeka a ku tshama eka wona,+ kambe sweswi ku ni lava dlayaka hi vomu.+ 22  Silivhere ya wena yi hundzuke ripambe.+ Byala bya wena bya mavele byi tempuriwe hi mati.+ 23  Tihosana ta wena ti sihalarile naswona ti tirhisana ni makhamba.+ Un’wana ni un’wana wa tona u rhandza xifumbarheriso+ naswona u hlongorisana ni tinyiko.+ La nga riki na tatana a ti n’wi avanyisi hi ndlela leyinene; ni nandzu wa noni a wu amukeleki eka tona.+ 24  Hikokwalaho marito ya Hosi ya ntiyiso, Yehovha wa mavuthu, Lowa Matimba wa Israyele,+ hi lawa: “Aha! Ndzi ta tiwisisa eka swirha swa mina, naswona ndzi ta tirihisela+ eka valala va mina.+ 25  Kutani ndzi ta tlherisela voko ra mina ehenhla ka wena, naswona ndzi ta n’okisa ripambe ra wena onge hiloko ndzi tirhisa munyu wa photheziyamu, naswona ndzi ta susa thyaka ra wena hinkwaro.+ 26  Kutani ndzi ta tlhela ndzi vuyisa vaavanyisi eka wena ku fana ni le ku sunguleni, ni vatsundzuxi eka wena ku fana ni le ku sunguleni.+ Endzhaku ka leswi u ta vitaniwa Muti wa ku Lulama, Muti wo Tshembeka.+ 27  Siyoni u ta kutsuriwa hi vululami,+ naswona vanhu va yena lava vuyaka, va ta kutsuriwa hi ku tshembeka.+ 28  Kutani lava tlulaka nawu ni lava va dyohaka va ta wa hi nkarhi lowu fanaka,+ naswona lava tshikaka Yehovha va ta hela.+ 29  Hikuva va ta khomisiwa tingana hi mirhi leyikulukumba leyi n’wina mi yi naveleke,+ naswona mi ta vekiwa ehansi hikwalaho ka mintanga leyi mi yi hlawuleke.+ 30  Hikuva mi ta fana ni murhi lowukulu lowu switluka swa wona swi vunaka,+ mi fana ni ntanga lowu nga riki na mati. 31  Kunene munhu wa matimba u ta va ricinda,+ naswona vuyelo bya swiendlo swakwe byi ta va nhlahle; kutani haswimbirhi swi ta tshwa hi nkarhi wun’we, ku ri hava loyi a timelaka.”+

Tinhlamuselo ta le hansi