Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 8:1-32

8  Kutani Yehovha a byela Muxe a ku: “Yana eka Faro, u ku eka yena, ‘Yehovha u te: “Tshika vanhu va mina va famba leswaku va ta ndzi tirhela.+  Loko u hambeta u ala ku va tshika va famba, ndzi ta ba ndhawu ya wena hinkwayo hi khombo ra machela.+  Kutani Nambu wa Nayili wu ta tala hi machela, kunene ma ta huma ma nghena endlwini ya wena ni le kamareni ra wena ra le ndzeni ro etlela eka rona ni le sangwini ra wena ni le tindlwini ta malandza ya wena ni le vanhwini va wena ni le switikweni swa wena ni le swibyeni swa wena swo pfuvela eka swona.+  Machela ma ta ta eka wena ni le ka varikwenu ni le ka malandza ya wena hinkwawo.”’”+  Endzhaku Yehovha a byela Muxe a ku: “Byela Aroni u ku, ‘Tshambulutela voko leri nga khoma nhonga+ ehenhla ka milambu, misele ya Nayili ni swidziva swa tinhlanga u endla leswaku machela ma ta ehenhla ka tiko ra Egipta.’”  Hiloko Aroni a tshambulutela voko ehenhla ka mati ya Egipta, kutani machela ma sungula ku huma ma funengeta tiko ra Egipta.  Hambiswiritano, vaprista lava endlaka masalamusi va endla leswi fanaka hi vutshila bya vona bya le xihundleni kutani va endla leswaku machela ma huma ehenhla ka tiko ra Egipta.+  Hi ku famba ka nkarhi Faro a vitana Muxe na Aroni a ku eka vona: “Kombelani Yehovha+ leswaku a susa machela eka mina ni vanhu va mina, hikuva ndzi tiyimiserile ku tshika vanhu va famba leswaku va ya endlela Yehovha+ xitlhavelo.”  Hiloko Muxe a byela Faro a ku: “Teka ku vangama loku nga eka mina, u ndzi byela leswaku ndzi ku kombelela rini, wena ni malandza ya wena ni vanhu va wena, leswaku machela ma susiwa eka wena ni le tindlwini ta wena. Ma ta sala ntsena eNambyeni wa Nayili.” 10  Hiloko a ku: “Mundzuku.” Kutani yena a ku: “Swi ta endleka hilaha u vuleke hakona, u ta tiva leswaku a ku na munhu un’wana la fanaka na Yehovha Xikwembu+ xa hina, 11  hikuva kunene machela ma ta suka eka wena ni le tindlwini ta wena ni le ka malandza ya wena ni le ka vanhu va wena. Ma ta sala+ ntsena eNambyeni wa Nayili.” 12  Hikwalaho Muxe na Aroni va huma eka Faro, kutani Muxe a huwelela eka Yehovha+ hikwalaho ka machela lawa a a ma tise eka Faro. 13  Hiloko Yehovha a endla hi ku pfumelelana ni rito+ ra Muxe, machela ma sungula ku fa etindlwini, eswivaveni ni le nhoveni. 14  Kutani va ma hlengeleta hi tinhulu-nhulu, tiko ri sungula ku nun’hwa.+ 15  Loko Faro a vona leswaku u pfuniwile, a nonon’hwisa+ mbilu yakwe; a nga va yingisanga, hilaha Yehovha a vuleke+ hakona. 16  Kutani Yehovha a byela Muxe a ku: “Byela Aroni u ku, ‘Tshambuluta nhonga+ ya wena u ba ntshuri wa misava, wu ta va tinyonyori etikweni hinkwaro ra Egipta.’” 17  Hiloko va endla sweswo. Hikwalaho Aroni a tshambuluta voko leri khomeke nhonga a ba ntshuri wa misava, kutani ku va ni tinyonyori eka vanhu ni le ka swiharhi. Ntshuri hinkwawo wa misava wu hundzuka tinyonyori etikweni hinkwaro ra Egipta.+ 18  Vaprista lava endlaka masalamusi va ringeta ku endla leswi fanaka hi vutshila+ bya vona bya le xihundleni, leswaku va vanga tinyonyori, kambe a va tsandzeka.+ Kutani tinyonyori ti va eka vanhu ni swiharhi. 19  Hikwalaho vaprista lava endlaka masalamusi va byela Faro va ku: “I ritiho+ ra Xikwembu!”+ Kambe mbilu ya Faro yi hambeta yi sihalala,+ a nga va yingisanga, hilaha Yehovha a vuleke hakona. 20  Hiloko Yehovha a byela Muxe a ku: “Pfuka nimpundzu swinene u ya yima emahlweni ka Faro.+ Waswivo! Yena u ya ematini! Kutani u ta n’wi byela u ku, ‘Yehovha u te: “Tshika vanhu va mina va famba leswaku va ta ndzi tirhela.+ 21  Kambe loko u nga tshiki vanhu va mina va famba, ndzi rhumela mabawa, eka wena ni malandza ya wena ni vanhu va wena ni le tindlwini ta wena; kutani tindlu ta Egipta ti ta tala hi mabawa,+ ni misava leyi ti nga ehenhla ka yona. 22  Kunene hi siku rero ndzi ta endla leswaku tiko ra Goxeni laha vanhu va mina va nga kona ri hlawuleka, ku nga vi na mabawa kona;+ u ta swi tiva hakona leswaku hi mina Yehovha exikarhi ka misava.+ 23  Hakunene ndzi ta endla leswaku ku va ni ku hambana exikarhi ka vanhu va mina ni vanhu va wena.+ Xikombiso lexi xi ta endleka mundzuku.”’” 24  Yehovha a hambeta a endla tano; kutani mabawa yo tala ma sungula ku hlasela yindlu ya Faro ni tindlu ta malandza yakwe ni tiko hinkwaro ra Egipta.+ Tiko ri onhaka hikwalaho ka mabawa.+ 25  Eku heteleleni Faro a vitana Muxe na Aroni a va byela a ku: “Fambani mi ya endlela Xikwembu xa n’wina xitlhavelo etikweni.”+ 26  Kambe Muxe a ku: “A swi amukeleki ku endla tano, hikuva hi ta va hi endlela Yehovha Xikwembu xa hina xitlhavelo lexi nyenyetsaka eka Vaegipta.+ A hi nge, hi endla xitlhavelo lexi nyenyetsaka emahlweni ka mahlo ya Vaegipta; xana a va nge hi khandli hi maribye? 27  Hi ta teka riendzo ra masiku manharhu hi ya emananga, hakunene hi ta endlela Yehovha Xikwembu xa hina xitlhavelo, hilaha a hi byeleke hakona.”+ 28  Kutani Faro a ku: “Mina—ndzi ta mi tshika mi famba,+ hakunene mi ta endlela Yehovha Xikwembu xa n’wina xitlhavelo emananga.+ Ntsena mi nga yi ekule ngopfu. Ndzi kombeleleni.”+ 29  Hiloko Muxe a ku: “Ndza suka eka wena, hakunene ndzi ta ku kombelela eka Yehovha, kunene mundzuku mabawa ma ta suka eka Faro, eka malandza yakwe ni le ka vanhu vakwe. Ntsena Faro a nga ha tlheli a hi kanganyisa hi ku ka a nga tshiki vanhu leswaku va ya endlela Yehovha+ xitlhavelo.” 30  Endzhaku ka sweswo Muxe a huma eka Faro, a kombela eka Yehovha.+ 31  Kutani Yehovha a endla hi ku ya hi rito ra Muxe,+ mabawa ma suka eka Faro, eka malandza yakwe ni le ka vanhu+ vakwe. A ku salanga ni rin’we. 32  Hambiswiritano, Faro a nonon’hwisa mbilu yakwe ni le nkarhini lowu, a nga va tshikanga vanhu va famba.+

Tinhlamuselo ta le hansi