Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 6:1-30

6  Kutani Yehovha a byela Muxe a ku: “Sweswi u ta vona leswi ndzi nga ta swi endla eka Faro,+ hikuva u ta va tshika va famba hi voko leri nga ni matimba, naswona u ta va hlongola etikweni+ rakwe hi voko leri nga ni matimba.”  Xikwembu xi ya emahlweni xi vulavula na Muxe xi ku eka yena: “Hi mina Yehovha.+  A ndzi hamba ndzi humelela eka Abrahama,+ Isaka+ na Yakobe+ ndzi ri Xikwembu xa Matimba Hinkwawo,+ kambe malunghana ni vito ra mina, Yehovha,+ a ndzi ti tivisanga+ ha rona eka vona.  Kutani ndzi simeke ni ntwanano wa mina na vona leswaku ndzi va nyika tiko ra Kanana, tiko ra vuluveri bya vona leri va luveleke+ eka rona.  Mina, ndzi ku twile ku konya ka vana va Israyele,+ lava Vaegipta va va endleke mahlonga, naswona ndza wu tsundzuka ntwanano+ wa mina.  Hikokwalaho byela vana va Israyele u ku, ‘Hi mina Yehovha, kunene ndzi ta mi humesa eku tshikileriweni hi mintirho yo nonon’hwa ya Vaegipta, ndzi mi kutsula evuhlongeni+ bya vona, hakunene ndzi ta mi kutsula hi voko leri tshambulutiweke ni hi vuavanyisi lebyikulu.+  Kunene ndzi ta mi teka mi va vanhu+ va mina, hakunene ndzi ta tikombisa ndzi ri Xikwembu eka n’wina;+ na n’wina kunene mi ta tiva leswaku hi mina Yehovha Xikwembu xa n’wina loyi a mi humesaka ehansi ka mintirho yo nonon’hwa ya Egipta.+  Kunene ndzi ta mi yisa etikweni leri ndzi yimiseke voko ra mina ndzi hlambanyela+ ku ri nyika Abrahama, Isaka na Yakobe; hakunene ndzi ta mi nyika+ rona ri va ra n’wina. Hi mina Yehovha.’”+  Endzhaku Muxe a vulavula ni vana va Israyele hi mhaka leyi, kambe a va n’wi yingisanga Muxe hikwalaho ka ku hela matimba ni hikwalaho ka vuhlonga+ lebyi nonon’hwaka. 10  Hiloko Yehovha a vulavula na Muxe a ku: 11  “Nghena, byela Faro hosi+ ya Egipta leswaku u fanele a tshika vana va Israyele va huma etikweni+ rakwe.” 12  Kambe Muxe a vulavula emahlweni ka Yehovha, a ku: “Waswivo! Vana va Israyele a va ndzi yingisanga;+ xana Faro u ta ndzi yingisisa ku yini,+ tanihi leswi milomu+ ya mina yi nga yimbangiki?” 13  Kambe Yehovha a ya emahlweni a vulavula na Muxe na Aroni, a tirhisa vona ku humesa xileriso eka vana va Israyele ni le ka Faro, hosi ya Egipta, leswaku a ta humesa vana va Israyele etikweni ra Egipta.+ 14  Lava i varhangeri va yindlu ya vatata wa vona: Vana va Ruveni, mativula+ ya Israyele, a ku ri Hanoko na Palu, Hezroni na Karimi.+ Leyi i mindyangu ya Ruveni.+ 15  Vana va Simiyoni a ku ri Yemuwele na Yamini na Ohadi na Yakini na Sohari na Xawulo, vana va wansati+ wa Mukanana. Leyi i mindyangu ya Simiyoni.+ 16  Lawa i mavito ya vana va Levhi,+ hi ku ya hi mindyangu ya vatukulu+ va vona: Gerixoni na Kohata na Merari.+ Malembe ya vutomi bya Levhi a ku ri malembe ya 137. 17  Vana va Gerixoni a ku ri Libni na Ximeyi,+ hi ku ya hi mindyangu+ ya vona. 18  Vana va Kohata a ku ri Amirama na Izihara na Hebroni na Uziyele.+ Malembe ya vutomi bya Kohata a ku ri malembe ya 133. 19  Vana va Merari a ku ri Maheli na Muxi.+ Leyi a ku ri mindyangu ya Valevhi, hi ku ya hi mindyangu ya vatukulu+ va vona. 20  Kutani Amirama a teka Yokebedi hahani wakwe a va nsati+ wakwe. Endzhakunyana a n’wi tswalela Aroni na Muxe.+ Malembe ya vutomi bya Amirama a ku ri malembe ya 137. 21  Vana va Izihara a ku ri Kora+ na Nefege na Zikiri. 22  Vana va Uziyele a ku ri Mixayele na Elizafani na Sitri.+ 23  Kutani Aroni a teka Elixeba n’wana wa Aminadaba, makwavo wa xisati wa Nasoni+ a va nsati wakwe. Endzhakunyana a n’wi tswalela Nadabu na Abihu, Eliyazara na Ithamara.+ 24  Vana va Kora a ku ri Asiri na Elkana na Abiyasafa.+ Leyi a ku ri mindyangu ya vana va Kora.+ 25  Kutani Eliyazara n’wana+ wa Aroni a teka un’wana wa vana va Putiyele a va nsati wakwe. Endzhakunyana a n’wi tswalela Finiyasi.+ Lava i varhangeri va vatata wa Valevhi, hi ku ya hi mindyangu+ ya vona. 26  Loyi i Aroni na Muxe lava Yehovha+ a va byeleke a ku: “Humesani vana va Israyele etikweni ra Egipta hi ku ya hi mavuthu+ ya vona.” 27  Hi vona a va byela Faro hosi ya Egipta leswaku a humesa vana va Israyele aEgipta.+ I Muxe na Aroni. 28  Kutani hi siku leri Yehovha a vulavuleke na Muxe etikweni ra Egipta+ ha rona, 29  Yehovha a ya emahlweni a byela Muxe a ku: “Hi mina Yehovha.+ Byela Faro hosi ya Egipta hinkwaswo leswi ndzi ku byelaka swona.” 30  Hiloko Muxe a vulavula emahlweni ka Yehovha a ku: “Waswivo! Milomu ya mina a yi yimbanga, kutani Faro u ta ndzi yingisisa ku yini?”+

Tinhlamuselo ta le hansi