Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 5:1-23

5  Endzhaku ka sweswo Muxe na Aroni va nghena kutani va byela Faro+ va ku: “Yehovha Xikwembu xa Israyele u te, ‘Tshika vanhu va mina va famba leswaku va ta ndzi endlela nkhuvo emananga.’”+  Kambe Faro a ku: “I mani Yehovha+ leswaku ndzi yingisa rito rakwe ndzi tshika Israyele a famba?+ A ndzi n’wi tivi Yehovha nikatsongo,+ kasi ku tlula kwalaho a ndzi nge n’wi tshiki Israyele a famba.”+  Hambiswiritano, va ya emahlweni va ku: “Xikwembu xa Vaheveru xi tihlanganise na hina.+ Hi kombela ku teka riendzo ra masiku manharhu hi ya emananga hi ya endlela Yehovha Xikwembu+ xa hina xitlhavelo; loko swi nga ri tano u ta hi ba hi ntungu kumbe hi banga.”+  Hiloko hosi ya Egipta yi ku eka vona: “Ha yini wena Muxe na Aroni mi tshikisa vanhu mintirho ya vona?+ Fambani mi ya tirha mintirho ya n’wina!”+  Faro a ya emahlweni a ku: “Maswivo! Sweswi vanhu va tiko se va tele,+ hakunene n’wina mi va tshikisa ku tirha mintirho+ ya vona.”  Hi ku hatlisa esikwini rero Faro a lerisa lava a va sindzisa vanhu ku tirha ni valanguteri+ va vona a ku:  “Mi nga ha hlengeleti byanyi ku fana ni le ku sunguleni leswaku mi nyika vanhu va endla switina.+ A va tihlengeletele byanyi hi voxe.  Ku tlula kwalaho, nhlayo leyi lavekaka ya switina leswi a va swi endla eku sunguleni, mi ta yi lava hi nsindziso eka vona. Mi nga va hunguteli, hikuva va loloha.+ Hi yona mhaka leyi va rilaka va ku, ‘Hi lava ku famba, hi lava ku ya endlela Xikwembu+ xa hina xitlhavelo!’  Ntirho a wu va tikele vanhu lava naswona mi va endla va wu tirha, mi nga va pfumeleli leswaku va nyikela nyingiso eka marito ya mavunwa.”+ 10  Hikwalaho lava sindzisaka vanhu ku tirha+ ni valanguteri va vona va huma kutani va byela vanhu va ku: “Faro u te, ‘A ndzi nge he tlheli ndzi mi nyika byanyi. 11  N’wina fambani, mi tikumela byanyi kun’wana ni kun’wana laha mi nga ta byi kuma kona, hikuva mintirho ya n’wina a yi nge hungutiwi nikatsongo.’”+ 12  Hikwalaho vanhu va hangalaka hinkwako etikweni ra Egipta leswaku va hlengeleta mahlanga ma va byanyi. 13  Kutani lava va va sindzisaka+ ku tirha va tshamela ku va sindzisa va ku: “Hetani mintirho ya n’wina, un’wana ni un’wana ntirho wakwe wa siku ni siku, ku fana ni le nkarhini lowu byanyi a bya ha kumeka.”+ 14  Endzhaku valanguteri+ va vana va Israyele, lava vanyiki va mintirho va Faro va va vekeke ehenhla ka vona, va biwile,+ vona va ku: “Ha yini tolo ni namuntlha+ mi nga hetanga mintirho leyi mi nyikiweke yona ya ku endla switina,+ ku fana ni le ku sunguleni?” 15  Hikwalaho valanguteri+ va vana va Israyele va ya rila eka Faro va ku: “Ha yini u endla malandza ya wena hi ndlela leyi? 16  Malandza ya wena a ma nyikiwi byanyi kambe va ri eka hina, ‘Endlani switina,’ kutani sweswi malandza ya wena ma biwa kasi i xihoxo xa vanhu va wena.”+ 17  Kambe yena a ku: “Ma loloha, ma loloha!+ Hi yona mhaka leyi mi nge, ‘Hi lava ku famba, hi lava ku ya endlela Yehovha xitlhavelo.’+ 18  Kutani sweswi fambani mi ya tirha! Hambileswi mi nga ta ka mi nga nyikiwi byanyi, kambe mi ta endla nhlayo leyi vekiweke ya switina.”+ 19  Hiloko valanguteri va vana va Israyele va tivona va ri eka xiyimo xo biha loko va byeriwa marito lama nge:+ “Mi nga hunguti nikatsongo switina leswi un’wana ni un’wana a swi endlaka siku ni siku.”+ 20  Endzhaku ka sweswo va hlangana na Muxe na Aroni,+ lava a va yime kwalaho ku ta hlangana na vona loko va huma eka Faro. 21  Hiloko hi ku hatlisa va ku eka vona: “Yehovha a a mi langute a mi avanyisa,+ tanihi leswi mi hi endleke risema ro biha+ emahlweni ka Faro ni le mahlweni ka malandza yakwe lerova va khoma banga hi voko leswaku va hi dlaya.”+ 22  Kutani Muxe a hundzulukela eka Yehovha a ku: “Yehovha,+ ha yini u vangele ku biha eka vanhu+ lava? Ha yini u rhume mina?+ 23  Hikuva ku sukela hi nkarhi lowu ndzi yeke ha wona emahlweni ka Faro leswaku ndzi vulavula hi vito ra wena,+ u endle swo biha eka vanhu lava,+ a wu va kutsulanga nikatsongo vanhu va wena.”+

Tinhlamuselo ta le hansi