Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 39:1-43

39  Kutani va endla tinguvu+ leti lukiweke ta ku tirha ha tona endhawini yo kwetsima+ hi harani ya wasi ni voya lebyi pendiweke byi va bya xivunguvungu ni nguvu ya ribungwana.+ Hiloko va endla tinguvu to kwetsima+ leti a ti ri ta Aroni, hilaha Yehovha a leriseke Muxe hakona.  Hikwalaho a endla efodi+ hi nsuku, harani ya wasi ni voya lebyi pendiweke byi va bya xivunguvungu ni nguvu ya ribungwana ni ntsembyana wo vevuka lowu lukiweke.  Kutani va fula swiphepherhele swa nsuku swi va swiphepherhele swo lala, hiloko yena a swi tsemelela swi va tiharana leswaku a ti luka ni harani ya wasi ni voya lebyi pendiweke byi va bya xivunguvungu ni nguvu ya ribungwana ni ntsembyana wo vevuka, wu va ntirho wa mukhavisi.+  Va yi endlela swiphemu swa makatla leswi a swi hlanganisiwile. A swi hlanganisiwe emakumu mambirhi ya yona.  Va yi endlela ni vamba leri a ri ri eka yona, ri ri ra ku yi tsimba yi tiya, a ri endliwe hi nguvu leyi fanaka na yona hi ku ya hi leswi yi endlisiweke xiswona, yi endliwe hi nsuku, harani ya wasi, ni voya lebyi pendiweke byi va bya xivunguvungu ni nguvu ya ribungwana ni ntsembyana wo vevuka lowu lukiweke,+ hilaha Yehovha a leriseke Muxe hakona.  Kutani va endla maribye ya onikisi+ ma veheriwe eswiangarhelweni swa nsuku, ma kovotliwe ku fana niloko ku kovotliwa mfungho, hi ku ya hi mavito ya vana va Israyele.+  Hiloko a ma vehela emakatleni ya efodi ma va maribye ya xitsundzuxo+ eka vana va Israyele, hilaha Yehovha a leriseke Muxe hakona.  Kutani a endla xinkwamana xa le xifuveni+ hi ndlela leyi mukhavisi a endlaka ha yona, hi ndlela leyi efodi yi endliwaka ha yona, a xi endla hi nsuku, harani ya wasi ni voya lebyi pendiweke byi va bya xivunguvungu ni nguvu ya ribungwana ni ntsembyana wo vevuka lowu lukiweke.+  Loko xi petsiwile a xi va ni matlhelo ya mune yo ringana. Va endla ku leha ka xinkwamana xa le xifuveni ku va vuanamo bya xandla ni ku anama ka xona ku va vuanamo bya xandla loko xi petsiwile.+ 10  Hiloko va xi tata hi tilayini ta mune ta maribye. Layini yo sungula a ku ri ya rhubi, topazi ni emeralda.+ 11  Layini ya vumbirhi+ a ku ri ya tukoyisi, safiri+ ni yaspere.+ 12  Layini ya vunharhu+ a ku ri ya ribye ra lexemu, agata ni ametisita. 13  Layini ya vumune+ a ku ri ya krisolita, onikisi+ ni jeyida. A ma vekeriwe ni swiangarhelo swa nsuku etimbhoveni ta wona. 14  Maribye a ma vekiwe hi ku ya hi mavito ya vana va Israyele. A ma ri 12 hi ku ya hi mavito ya vona, ma kovotliwe ku fana niloko ku kovotliwa mfungho, ha rin’we hi ku ya hi vito ra rona, eka tinyimba ta 12.+ 15  Kutani ehenhla ka xinkwamana xa le xifuveni va endla tinketana leti lukiweke ku fana ni pindza, hi nsuku lowo tenga.+ 16  Hiloko va endla swiangarhelo swimbirhi hi nsuku ni swingwavila swimbirhi hi nsuku, va vehela swingwavila swimbirhi swa nsuku ehenhla ka makumu mambirhi ya xinkwamana xa le xifuveni.+ 17  Endzhaku ka sweswo va nghenisa mapindza mambirhi ya nsuku eswingwavileni swimbirhi leswi nga emakumu ka xinkwamana xa le xifuveni.+ 18  Kutani va nghenisa makumu mambirhi ya mapindza mambirhi eswiangarhelweni swimbirhi. Hiloko va swi vehela ehenhla ka swiphemu swa makatla swa efodi, emahlweni ka yona.+ 19  Endzhaku ka sweswo, va endla swingwavila swimbirhi hi nsuku, va swi vehela emakumu mambirhi ya xinkwamana xa le xifuveni etlhelo ra xona ra le ndzeni leri langutaneke ni efodi endzeni.+ 20  Kutani va endla swingwavila swimbirhi hi nsuku, va swi vehela ehenhla ka swiphemu swimbirhi swa makatla swa efodi hi le hansi, emahlweni ka yona, ekusuhi ni laha yi hlanganisiweke kona, ehenhla ka vamba ra efodi.+ 21  Eku heteleleni va boha xinkwamana xa le xifuveni hi swingwavila swa xona, va swi boha ni swingwavila swa efodi hi ngoti ya wasi, leswaku xi ta hambeta xi ri ehenhla ka vamba ra efodi nileswaku xinkwamana xa le xifuveni xi nga suki ehenhla ka efodi, hilaha Yehovha a leriseke Muxe hakona.+ 22  Hiloko a endla nguvu yo pfumala mavoko+ ya efodi, wu ri ntirho wa muluki wa mapesa, hinkwayo a yi endla hi harani ya wasi. 23  Mbhovo ya nguvu yo pfumala mavoko a yi ri exikarhi ka yona, yi fana ni mbhovo ya nguvu ya mahakatimba ya nsimbi. Mbhovo ya yona a yi ri ni ndzilakana lowu wu yi rhendzelaka leswaku yi nga handzuki.+ 24  Kutani eka nsomo wa nguvu yo pfumala mavoko va endla magrenada hi harani ya wasi ni voya lebyi pendiweke byi va bya xivunguvungu ni nguvu ya ribungwana, swi lukiwe swin’we.+ 25  Ku tlula kwalaho, va endla swingelengele hi nsuku lowo tenga, va vehela swingelengele exikarhi ka magrenada+ lama nga ehenhla ka nsomo wa nguvu yo pfumala mavoko swi yi rhendzela, swi ri exikarhi ka magrenada; 26  xingelengele ni grenada, xingelengele ni grenada ehenhla ka nsomo wa nguvu yo pfumala mavoko, swi yi rhendzela,+ swi ri swa ku tirha ha swona, hilaha Yehovha a leriseke Muxe hakona. 27  Endzhaku ka sweswo, va endla tinguvu to leha hi ntsembyana wo vevuka,+ hi ndlela leyi muluki wa mapesa a lukaka ha yona, ti ri ta Aroni ni vana vakwe, 28  ni xifunengeto xa nhloko+ hi ntsembyana wo vevuka ni swo tsondzela nhloko+ swa swin’wetsin’wetsi hi ntsembyana wo vevuka ni swirhangiso swa ntsembyana hi ntsembyana wo vevuka+ lowu lukiweke, 29  ni nceka+ lowu endliweke hi ntsembyana wo vevuka lowu lukiweke ni harani ya wasi ni voya lebyi pendiweke byi va bya xivunguvungu ni nguvu ya ribungwana, wu ri ntirho wa muluki, hilaha Yehovha a leriseke Muxe hakona. 30  Eku heteleleni va endla xiphepherele lexi vangamaka, mfungho wa ku tinyiketela ko kwetsima, va xi endla hi nsuku lowo tenga kutani va tsala marito eka xona hi ku kovotla ka mfungho: “Vukwetsimi i bya Yehovha.”+ 31  Hiloko va vehela ngoti ya harani ya wasi eka xona leswaku va ta xi tsimba eka xifunengeto xa nhloko+ hilaha Yehovha a leriseke Muxe hakona. 32  Hikwalaho ntirho hinkwawo wa ntsonga wa nhlangano wa tabernakela wu helela, hikuva vana va Israyele va hambete va endla hinkwaswo hilaha Yehovha a leriseke Muxe hakona.+ Va endle tano. 33  Kutani va tisa tabernakela+ eka Muxe, ntsonga+ ni swingolongondzwana+ swa wona hinkwaswo, swiove swa yona,+ marimba ya yona,+ swigogo swa yona+ ni tiphuphu ta yona ni minkotloto ya yona,+ 34  ni swifunengeto swa yona swa madzovo ya makhuna lama pendiweke+ ma va yo tshwuka ni swifunengeto swa yona swa madzovo ya tintini+ ni nguvu leyi sirhelelaka ya xiavanyiso,+ 35  ni areka+ ya vumbhoni ni tinsika+ ta yona ni xifunengeto,+ 36  tafula,+ swibya swa rona hinkwaswo+ ni xinkwa xa nkombiso, 37  xo tlhoma rivoni+ xa nsuku lowo tenga, timboni ta xona, layini ya timboni,+ ni swingolongondzwana+ swa xona hinkwaswo ni mafurha ya ku voninga,+ 38  ni alitari+ ya nsuku ni mafurha ya ku tota+ ni xinun’hweriso xa murhi wa risuna+ ni xiavanyiso+ xa nyangwa ya ntsonga, 39  alitari+ ya koporo ni ritavala+ ra koporo leri nga ra yona, tinsika+ ta yona ni swingolongondzwana+ swa yona hinkwaswo, xihlambelo+ ni xiangamo xa xona,+ 40  swincikinyo+ swa xivava, tiphuphu+ ta xona ni minkotloto+ ya xona ni xiavanyiso+ xa nyangwa ya xivava, tintambu ta xona ta ntsonga+ ni swikhomiso swa ntsonga+ swa xona, ni swingolongondzwana+ swa xona hinkwaswo swa vutirheli bya tabernakela, swa ntsonga wa nhlangano, 41  tinguvu+ leti lukiweke ta ku tirhela evukwetsimelweni, tinguvu to kwetsima+ ta Aroni lowa muprista ni tinguvu ta vana vakwe lava va nga ta va vaprista.+ 42  Hilaha Yehovha a leriseke Muxe hakona, hi yona ndlela leyi vana va Israyele va endleke ntirho hinkwawo ha yona.+ 43  Kutani Muxe a vona ntirho hinkwawo, kutani waswivo, va wu endle hilaha Yehovha a leriseke hakona. Hi yona ndlela leyi va endleke ha yona. Hikwalaho Muxe a va katekisa.+

Tinhlamuselo ta le hansi