Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 38:1-31

38  A ya emahlweni a endla alitari ya gandzelo ro hisiwa hi ntsandza wa munga. Ku leha ka yona a ku ri swisungunu swa ntlhanu ni ku anama ka yona ku ri swisungunu swa ntlhanu, yi ri matlhelo ya mune yo ringana, ku tlakuka ka yona a ku ri swisungunu swinharhu.+  Hiloko a endla timhondzo+ ta yona ehenhla ka tinhla ta mune ta yona. Timhondzo ta yona a ti veheriwe eka yona. Endzhaku ka sweswo, a yi nameka koporo.+  Endzhaku ka sweswo a endla swingolongondzwana hinkwaswo swa alitari, swiolelo ni mafoxolo ni minkambana, tiforoko ni swo tamela ndzilo. Swingolongondzwana swa yona hinkwaswo a swi endla hi koporo.+  Ku tlula kwalaho a endla ritavala eka alitari, rikoka leri endliweke hi koporo, ehansi ka rhimi ya yona, ehansi ku ya exikarhi ka yona.+  Hiloko a vumba swingwavila swa mune emakumu ya mune ekusuhi ni ritavala ra koporo, swi ri swiseketelo swa tinsika.  Endzhaku ka sweswo a endla tinsika hi ntsandza wa munga, a ti nameka koporo.+  Kutani a nghenisa tinsika eswingwavileni ematlhelo ya alitari ti ri ta ku yi rhwala hi tona.+ A yi endla hi mapulanga yi va bokisi leri pfulekeke.+  Kutani a endla xihlambelo xa koporo+ ni xiangamo xa koporo hi ku tirhisa swivoni swa vavasati lava nga malandza lava a va endla ntirho lowu hleriweke enyangweni ya ntsonga wa nhlangano.+  Kutani a endla xivava.+ Swincikinyo swa xivava swa tlhelo leri languteke eNegebu, ku ya edzongeni, a swi ri swa ntsembyana wo vevuka lowu lukiweke, swi ri swisungunu swa 100.+ 10  Tiphuphu ta kona ta 20 ni minkotloto ya kona ya 20 a swi ri swa koporo. Timhingu ta tiphuphu ni mahlangano ya tona a swi ri swa silivhere.+ 11  Nakambe, etlhelweni ra n’walungu a ku ri ni swisungunu swa 100. Tiphuphu ta rona ta 20 ni minkotloto ya tona ya 20 a swi ri swa koporo. Timhingu ta tiphuphu ni mahlangano ya tona a swi ri swa silivhere.+ 12  Kambe etlhelweni ra vupela-dyambu, swincikinyo a swi ri swa swisungunu swa 50. Tiphuphu ta rona a ti ri khume ni minkotloto ya tona yi ri khume.+ Timhingu ta tiphuphu ni mahlangano ya tona a swi ri swa silivhere. 13  Kutani etlhelweni ra le vuxeni leri languteke evuhuma-dyambu a ku ri swisungunu swa 50.+ 14  Swincikinyo a swi ri swisungunu swa 15 etlhelweni rin’we. Tiphuphu ta rona a ti ri tinharhu ni minkotloto ya tona yi ri yinharhu.+ 15  Kutani etlhelweni lerin’wana, eka rona ni le ka tlhelo lerin’wana ra nyangwa ya xivava, swincikinyo a swi ri swisungunu swa 15. Tiphuphu ta rona a ti ri tinharhu ni minkotloto ya tona a yi ri yinharhu.+ 16  Swincikinyo hinkwaswo swa xivava leswi swi xi rhendzeleke a swi ri swa ntsembyana wo vevuka lowu lukiweke. 17  Minkotloto ya tiphuphu a yi ri ya koporo. Timhingu ta tiphuphu ni mahlangano ya tona a swi ri swa silivhere ni le henhla ka tona a ti namekiwe silivhere, naswona a ku ri ni mahlangano ya silivhere ya tiphuphu hinkwato ta xivava.+ 18  Kutani xiavanyiso xa nyangwa ya xivava a wu ri ntirho wa muluki, xi ri xa harani ya wasi ni voya lebyi pendiweke byi va bya xivunguvungu ni nguvu ya ribungwana ni ntsembyana wo vevuka lowu lukiweke,+ ku leha ka xona a ku ri swisungunu swa 20 kasi ku anama ka xona xi ri swisungunu swa ntlhanu, xi ringana ni swincikinyo swa xivava.+ 19  Tiphuphu ta xona ta mune ni minkotloto ya tona ya mune a swi ri swa koporo. Timhingu ta xona a ti ri ta silivhere naswona tinhloko ta tona ni mahlangano ya tona a swi namekiwe silivhere. 20  Kutani hinkwaswo swikhomiso swa ntsonga swa tabernakela, ni leswi rhendzeleke xivava a swi ri swa koporo.+ 21  Leswi landzelaka i nxaxamelo wa swilo swa tabernakela, tabernakela ya Vumbhoni,+ leswi xaxametiweke hi xileriso xa Muxe ku ri vutirheli bya Valevhi+ ehansi ka nkongomiso wa Ithamara+ n’wana wa Aroni lowa muprista. 22  Kutani Bezalele+ n’wana wa Uri n’wana wa Huru wa nyimba ya Yuda a endla hinkwaswo leswi Yehovha a swi leriseke Muxe. 23  A a ri na Oholiyabu+ n’wana wa Ahisamaki wa nyimba ya Dani, la tivaka ntirho wa mavoko ni mukhavisi ni muluki wa harani ya wasi ni voya lebyi pendiweke byi va bya xivunguvungu ni nguvu ya ribungwana ni ntsembyana wo vevuka. 24  Nsuku hinkwawo lowu tirhisiweke entirhweni hinkwawo wa ndhawu yo kwetsima wu va ntsengo wa nsuku wa gandzelo leri ndziwitiwaka,+ titalenta ta 29 ni tixikele ta 730 hi ku ya hi xikele+ ya ndhawu yo kwetsima.+ 25  Kutani silivhere ya lava va tsarisiweke va ntshungu a yi ri titalenta ta 100 ni tixikele ta 1 775 hi ku ya hi xikele ya ndhawu yo kwetsima. 26  Hafu ya xikele ya munhu ha un’we a ku ri hafu ya xikele hi ku ya hi xikele ya ndhawu yo kwetsima, eka vavanuna hinkwavo lava hundzelaka eka lava tsarisiweke ku suka eka malembe ya 20 hi vukhale ku ya ehenhla,+ va ringana 603 550.+ 27  Titalenta ta 100 ta silivhere ti tirhisiwe eku vumbiweni ka minkotloto ya ndhawu yo kwetsima ni minkotloto ya nguvu leyi sirhelelaka. Minkotloto ya 100 yi ringana ni titalenta ta 100, talenta yin’we eka nkotloto wun’we.+ 28  Kutani eka tixikele ta 1 775 a endla timhingu ta tiphuphu naswona a nameka tinhloko ta tona, a ti hlanganisa swin’we. 29  Koporo ya gandzelo leri ndziwitiwaka a yi ri titalenta ta 70 ni tixikele ta 2 400. 30  Kutani a tirhisa yona ku endla minkotloto ya nyangwa ya ntsonga wa nhlangano ni alitari ya koporo ni ritavala ra koporo leri nga ra yona, ni swingolongondzwana hinkwaswo swa alitari, 31  ni minkotloto leyi rhendzelaka xivava, ni minkotloto ya nyangwa ya xivava, ni swikhomiso swa ntsonga+ hinkwaswo swa tabernakela ni swikhomiso swa ntsonga hinkwaswo leswi rhendzeleke xivava.

Tinhlamuselo ta le hansi