Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 34:1-35

34  Kutani Yehovha a byela Muxe a ku: “Tikovotlele swiphepherhele swimbirhi swa maribye leswi fanaka ni swo sungula,+ ndzi ta tsala marito lawa a ma ri eka swiphepherhele+ swo sungula, leswi u swi fayeke.+  U lungheka nimixo hikuva u fanele u tlhandlukela eNtshaveni ya Sinayi nimixo, u yima ekusuhi na mina ehenhla ka ntshava.+  Kambe a ku na munhu ni un’we la nga tlhandlukaka na wena, naswona u nga pfumeleli munhu ni un’we a vonaka entshaveni hinkwayo.+ Ku tlula kwalaho, ku hava ntlhambi wa tinyimpfu kumbe ntlhambi wa tihomu lowu nga ta dya emahlweni ka ntshava yoleyo.”+  Hikwalaho Muxe a kovotla swiphepherhele swimbirhi swa maribye leswi fanaka ni swo sungula, kutani a pfuka nimpundzu swinene a tlhandlukela eNtshaveni ya Sinayi, hilaha Yehovha a n’wi leriseke hakona, naswona a a khome swiphepherhele swimbirhi swa maribye hi mavoko.  Yehovha a rhelela+ a ri epapeni kutani a yima na yena kwalaho a vula vito ra Yehovha.+  Yehovha a hundza emahlweni ka xikandza xakwe, a vula a ku: “Yehovha, Yehovha, Xikwembu xa tintswalo+ ni nsovo,+ la hlwelaka ku hlundzuka,+ la teleke musa wa rirhandzu+ ni ntiyiso,+  la hlayiselaka vanhu va magidi+ musa wa rirhandzu, la rivalelaka xihoxo ni ku tlula nawu ni xidyoho,+ kambe a nga ka a nga tshiki ku xupula+ la faneriwaka hi ku xupuriwa, la xupulaka vana ni vatukulu hikwalaho ka xihoho xa vatatana, ehenhla ka xitukulwana xa vunharhu ni le henhla ka xitukulwana xa vumune.”+  Hi ku hatlisa Muxe a nkhinsama a tiwisela ehansi.+  Hiloko a ku: “Oho Yehovha, sweswi, loko ndzi kume ku tsakeriwa ematihlweni ya wena, ndzi kombela leswaku Yehovha a famba swin’we na hina,+ hikuva i vanhu va tinhamu to sihalala,+ wena u ta rivalela xihoxo xa hina ni xidyoho+ xa hina, wena u ta hi teka hi ri rifuwo ra wena.”+ 10  Hiloko yena a ku: “Sweswi ndzi endla ntwanano: Ndzi ta endla swilo swo hlamarisa emahlweni ka vanhu va wena hinkwavo, leswi nga si tshamaka swi tumbuluxiwa emisaveni hinkwayo kumbe exikarhi ka matiko hinkwawo;+ hakunene vanhu hinkwavo lava u nga exikarhi ka vona va ta vona ntirho wa Yehovha, hikuva i nchumu lowu chavisaka lowu ndzi wu endlaka ha wena.+ 11  “Tihlayisele leswi ndzi ku lerisaka swona namuntlha.+ Ndzi hlongola Vaamori ni Vakanana ni Vaheti ni Vaperezi ni Vahivhi ni Vayebusi+ emahlweni ka wena. 12  Tivonele leswaku u nga endli ntwanano ni vaaki va tiko leri u yaka eka rona,+ hikuva wu nga ha va ntlhamu eka wena.+ 13  Kambe n’wina mi ta hirimuxa tialitari ta vona, naswona mi ta tshova ni tinsika ta vona to kwetsima, ni timhandzi ta vona to kwetsima mi ta ti tsema.+ 14  A wu fanelanga u nkhisamela xikwembu ximbe,+ hikuva Yehovha, loyi vito rakwe a nga Rilaveta, i Xikwembu xa rilaveta;+ 15  hikuva u nga tshuka u endla ntwanano ni vaaki va tiko, hikuva entiyisweni va ta endla rimbewu leri nga amukelekiki ni swikwembu swa vona,+ naswona va endlela swikwembu swa vona xitlhavelo,+ kunene un’wana u ta ku rhamba kutani u ta dya swin’wana swa xitlhavelo xa yena.+ 16  U ta boheka ku teka vana va vona va vanhwanyana u tekela vana va wena,+ kunene vana va vona va vanhwanyana va ta endla rimbewu leri nga amukelekiki ni swikwembu swa vona, va endla leswaku vana va wena va majaha va endla rimbewu leri nga amukelekiki ni swikwembu swa vona.+ 17  “U nga tiendleli swikwembu swa xifaniso xa hava lexi n’okisiweke.+ 18  “U ta hlayisa nkhuvo wa swinkwa leswo-ke-comela.+ U ta dya swinkwa leswo-ke-comela hilaha ndzi ku leriseke hakona, masiku ya nkombo hi nkarhi lowu vekiweke hi n’hweti ya Abibi,+ hikuva u hume hi n’hweti ya Abibi aEgipta. 19  “Hinkwaswo leswi pfulaka mbeleko ro sungula i swa mina,+ ni malunghana ni swifuwo swa wena hinkwaswo, mativula ya nkunzi ni ya nyimpfu.+ 20  Mativula ya mbhongolo u ta ma kutsula hi nyimpfu.+ Kambe loko u nga ma kutsuli, u fanele u ma tshova nhamu. Mativula hinkwawo ya vana va wena vaxinuna u ta ma kutsula.+ Va nga humeleli emahlweni ka mina va nga khomanga nchumu.+ 21  “U ta tirha masiku ya tsevu, kambe hi siku ra vunkombo u ta hlayisa savata.+ U ta hlayisa savata+ hi nkarhi wa ku rima ni wa ntshovelo. 22  “U ta hambeta u endla nkhuvo wa mavhiki hi swirhangana swa ntshovelo wa koroni,+ ni nkhuvo wa ku hlengeleta eku heleni ka lembe.+ 23  “Waxinuna un’wana ni un’wana wa n’wina u ta humelela+ kanharhu hi lembe emahlweni ka Hosi ya ntiyiso, Yehovha, Xikwembu xa Israyele. 24  Hikuva ndzi ta hlongola matiko emahlweni ka wena,+ naswona ndzi ta endla ndhawu ya wena yi va leyikulu;+ a ku na munhu la nga ta navela tiko ra wena loko wa ha tlhandlukele ku ya vona xikandza xa Yehovha Xikwembu xa wena, kanharhu hi lembe.+ 25  “U nga tshuki u endla ngati ya xitlhavelo xa mina yi va xitlhavelo swin’we ni leswi cheriweke comela.+ Xitlhavelo xa nkhuvo wa paseka xi nga tshuki xi siyiwa ku fikela nimixo.+ 26  “Mihandzu leyinene ya misava ya wena leyi wupfeke+ ku sungula u ta yi tisa endlwini ya Yehovha Xikwembu+ xa wena. “U nga tshuki u sweka ximbutana entswambeni wa mana wa xona.”+ 27  Yehovha a ya emahlweni a byela Muxe a ku: “Titsalele marito lawa ehansi,+ hikuva ndzi endla ntwanano na wena ni vana va Israyele hi ku landza marito lawa.”+ 28  Kutani a tshama kwalaho na Yehovha masiku ya 40 ni vusiku bya 40. A nga dyanga xinkwa naswona a nga nwanga mati.+ Kutani a tsala marito ya ntwanano eswiphepherheleni, Marito ya Khume.+ 29  Kutani loko Muxe a rhelela a suka eNtshaveni ya Sinayi, swiphepherhele swimbirhi swa Vumbhoni a swi ri evokweni ra Muxe loko a rhelela a suka entshaveni,+ Muxe a a nga swi tivi leswaku nhlonge ya xikandza xakwe a yi humesa miseve hikwalaho ka leswi a vulavuleke na yena.+ 30  Loko Aroni ni vana va Israyele hinkwavo va vona Muxe, phela waswivo, nhlonge ya xikandza xakwe a yi humesa miseve kutani va chava ku tshinela ekusuhi na yena.+ 31  Kutani Muxe a va vitana. Hikwalaho Aroni ni tindhuna hinkwato leti nga exikarhi ka ntshungu va tlhelela eka yena, Muxe a sungula ku vulavula na vona. 32  Ro sungula endzhaku ka sweswo vana va Israyele hinkwavo va tshinela ekusuhi na yena, kutani a va lerisa hinkwaswo leswi Yehovha a n’wi byeleke swona eNtshaveni ya Sinayi.+ 33  Loko Muxe a heta ku vulavula na vona, a funengela nturhu exikandzeni.+ 34  Kambe loko Muxe a nghena emahlweni ka Yehovha ku ya vulavula na yena, a a susa nturhu kukondza a huma.+ Kutani a huma a ya vulavula ni vana va Israyele leswi a lerisiweke swona.+ 35  Vana va Israyele va vona xikandza xa Muxe, leswaku nhlonge ya xikandza xa Muxe yi humesa miseve;+ Muxe a tlhela a funengela nturhu exikandzeni kukondza a nghena a vulavula na yena.+

Tinhlamuselo ta le hansi