Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 25:1-40

25  Yehovha a ya emahlweni a vulavula na Muxe+ a ku:  “Vulavula ni vana va Israyele leswaku va ta ndzi hlengeletela munyikelo: Mi ta hlengeleta munyikelo wa mina eka munhu un’wana ni un’wana loyi a susumetiwaka hi mbilu ya yena.+  Munyikelo lowu mi nga ta wu hlengeleta eka vona hi lowu: nsuku+ ni silivhere+ ni koporo,+  ni harani ya wasi, ni voya lebyi pendiweke byi va bya xivunguvungu, ni nguvu ya ribungwana, ni ntsembyana wo vevuka ni voya bya mbuti,+  ni madzovo ya makhuna lama pendiweke ma va yo tshwuka, ni madzovo ya tintini, ni ntsandza wa munga;+  mafurha ya rivoni,+ mafurha ya balsama+ lama nga ta va mafurha+ ya ku tota ni ya xinunh’weriso xa murhi wa risuna;+  ni maribye ya onikisi ni maribye ya ku veka eka efodi,+ ni ya xinkwamana xa le xifuveni.+  Kutani va ta ndzi endlela vukwetsimelo hikuva ndzi ta tshama exikarhi ka vona.+  Hi ku landza hinkwaswo leswi ndzi mi kombaka swona swi ri ntila wa tabernakela ni ntila wa hinkwaswo swo yi hetisisa, hi yona ndlela leyi mi nga ta yi endla ha yona.+ 10  “Va fanele va endla Areka hi ntsandza wa munga,+ ku leha ka yona yi va swisungunu swimbirhi ni hafu ni ku anama ka yona ku va xisungunu ni hafu, ni ku tlakuka ka yona yi va xisungunu ni hafu. 11  Kutani u fanele u yi nameka nsuku+ lowo tenga. U ta yi nameka endzeni ni le handle, naswona u fanele u yi endlela ndzilakana wa nsuku wu yi rhendzela matlhelo hinkwawo ehenhla ka yona.+ 12  U fanele u yi vumbela swingwavila swa mune swa nsuku u swi vehela ehenhla ka milenge ya yona ya mune, swingwavila swimbirhi swi ta va ehenhla ka tlhelo rin’we ra yona kasi swingwavila swimbirhi swi ta va ehenhla ka tlhelo lerin’wana ra yona.+ 13  U fanele u endla tinsika hi ntsandza wa munga kutani u ti nameka nsuku.+ 14  U fanele u nghenisa tinsika eswingwavileni leswi nga ehenhla ka matlhelo ya Areka leswaku u rhwala Areka hi tona. 15  Tinsika ti ta tshama eswingwavileni swa Areka. A ti fanelanga ti susiwa eka swona.+ 16  Endzeni ka Areka u ta veka vumbhoni lebyi ndzi nga ta ku nyika byona.+ 17  “U fanele u endla xifunengeto xa nsuku lowo tenga, ku leha ka xona ku va swisungunu swimbirhi ni hafu ni vuanamo bya xona byi va xisungunu ni hafu.+ 18  U fanele u endla makerubu mambirhi hi nsuku. U ta ma fula hi hamula ma va emakumu mambirhi ya xifunengeto.+ 19  Endla kerubu yin’we eka tlhelo leri kasi kerubu yin’wana yi va eka tlhelo lerin’wana.+ Mi ta endla makerubu ehenhla ka xifunengeto, emakumu ya xona mambirhi. 20  Makerubu ma ta phurumulela timpapa ta wona ehenhla, ma wungamela xifunengeto hi timpapa ta wona, swikandza swa wona swi langutanile.+ Swikandza swa makerubu swi ta languta xifunengeto. 21  Kutani u fanele u veka xifunengeto+ ehenhla ka Areka, endzeni ka Areka u ta veka vumbhoni lebyi ndzi nga ta ku nyika byona. 22  Ndzi ta tikombisa kwalaho eka wena naswona ndzi vulavula na wena ndzi ri ehenhla ka xifunengeto,+ ndzi ri exikarhi ka makerubu mambirhi lama nga ehenhla ka areka ya vumbhoni, ni hinkwaswo leswi ndzi nga ta ku lerisa swona leswaku u swi byela vana va Israyele.+ 23  “Kutani u fanele u endla tafula+ hi ntsandza wa munga, ku leha ka rona ku va swisungunu swimbirhi ni vuanamo bya rona byi va xisungunu, ni ku tlakuka ka rona ku va xisungunu ni hafu. 24  U fanele u ri nameka nsuku lowo tenga, naswona u ta ri endlela ndzilakana hi nsuku wu ri rhendzela.+ 25  U fanele u ri endlela rhimi ya vuanamo bya voko yi ri rhendzela, naswona rhimi ya rona u ta yi endlela ndzilakana hi nsuku yi ri rhendzela.+ 26  U fanele u ri endlela swingwavila swa mune hi nsuku kutani u vehela swingwavila etinhleni ta mune ta milenge ya mune.+ 27  Swingwavila swi ta va ekusuhi ni rhimi swi va swiseketelo swa tinsika ta ku rhwala tafula.+ 28  U fanele u endla tinsika hi ntsandza wa munga, u ti nameka hi nsuku kutani va ta rhwala tafula hi tona.+ 29  “U fanele u endla tindyelo ta rona ni swinwelo swa rona ni swikelelo swa rona ni minkambana ya rona, leswi va nga ta chela leswi cheriwaka egandzelweni hi swona. U ta swi endla hi nsuku+ lowo tenga. 30  U fanele u veka xinkwa xa nkombiso nkarhi hinkwawo+ ehenhla ka tafula emahlweni ka mina. 31  “Kutani u fanele u endla xo tlhoma rivoni hi nsuku lowo tenga. Xo tlhoma rivoni xi ta furiwa+ hi hamula. Tshaku ra xona, marhavi ya xona, swinwelo swa xona, swikhaviso swa xona swa bundzu ni swiluva swa xona swi ta veheriwa eka xona. 32  Marhavi ya tsevu ma tlhomiwa ematlhelo ya xona, marhavi manharhu ya xo tlhoma rivoni ma ri etlhelo rin’we ra xona kasi marhavi manharhu ya xo tlhoma rivoni ma ri etlhelo lerin’wana ra xona.+ 33  Swinwelo swinharhu leswi vumbekeke ku fana ni swiluva swa almondi swi va eka ntlawa wun’we wa marhavi, swi siyana ni swikhaviso swa bundzu ni swiluva, kutani swinwelo swinharhu leswi vumbekeke ku fana ni swiluva swa almondi eka ntlawa lowun’wana wa marhavi, swi siyana ni swikhaviso swa bundzu ni swiluva.+ Hi yona ndlela leyi swi nga xiswona hi marhavi ya tsevu lama tlhomiweke eka xo tlhoma rivoni. 34  Kutani eka xo tlhoma rivoni ku ni swinwelo swa mune leswi vumbiweke ku fana ni swiluva swa almondi, leswi swikhaviso swa xona swa bundzu swi siyanaka+ ni swiluva swa xona. 35  Xikhaviso xa bundzu lexi nga ehansi ka marhavi mambirhi xi veheriwe eka xona ni xikhaviso xa bundzu lexi nga ehansi ka marhavi mambirhi laman’wana xi veheriwe eka xona, ni xikhaviso xa bundzu lexi nga ehansi ka marhavi man’wana mambirhi xi veheriwe eka xona, emarhavini ya tsevu lama veheriweke eka xo tlhoma rivoni.+ 36  Swikhaviso swa xona swa bundzu ni marhavi ya xona ma ta veheriwa eka xona. Hinkwaxo ka xona i nchumu wun’we lowu furiweke hi hamula, lowu endliweke hi nsuku+ lowo tenga. 37  Kutani u ta xi endlela timboni ta nkombo; timboni ti ta lumekiwa, naswona ti ta voninga ehenhla ka ndhawu leyi nga emahlweni ka xona.+ 38  Swo tamela ngoti ya rivoni swa xona ni swo tamela ndzilo swa xona swi endliwa hi nsuku+ lowo tenga. 39  U ta swi endla hi talenta ya nsuku lowo tenga swin’we ni swingolongondzwana swa xona hinkwaswo. 40  Tiyiseka leswaku u swi endla hi ku landza ntila lowu u kombisiweke wona entshaveni.+

Tinhlamuselo ta le hansi