Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 24:1-18

24  Kutani a byela Muxe a ku: “Tlhandlukelani eka Yehovha, wena na Aroni, Nadabu na Abihu+ ni vakulukumba va 70+ va Israyele, mi ta nkhinsama ma ha ri ekule.  Muxe hi byakwe u ta tshinela a ri yexe eka Yehovha; kambe vona va nga tshineli naswona vanhu va nga tlhandluki na yena.”+  Hiloko Muxe a fika a rungulela vanhu hinkwawo marito ya Yehovha ni hinkwaswo swiboho swa vuavanyisi,+ kutani vanhu hinkwavo va hlamula hi rito rin’we va ku: “Marito hinkwawo lawa Yehovha a ma vuleke hi tiyimiserile ku ma endla.”+  Hikwalaho Muxe a ma tsala ehansi marito hinkwawo ya Yehovha.+ Kutani a pfuka nimpundzu swinene a aka alitari ni tiphuphu ta 12 ehansi ka ntshava, leti ringaneke tinyimba ta 12 ta vana va Israyele.+  Endzhaku ka sweswo a rhuma majaha ya vana va Israyele, kutani ma humesa magandzelo yo hisiwa naswona ma endla switlhavelo hi tinkunzi, swi va switlhavelo swa xinakulobye+ eka Yehovha.  Hiloko Muxe a teka hafu ya ngati a yi chela eminkambaneni,+ kutani hafu leyin’wana ya ngati a xuva hi yona ehenhla ka alitari.+  Eku heteleleni a teka buku ya ntwanano+ a yi hlayela etindleveni ta vanhu.+ Kutani va ku: “Hinkwaswo leswi Yehovha a swi vuleke hi tiyimiserile ku swi endla ni ku yingisa.”+  Hikwalaho Muxe a teka ngati a n’wan’wasela vanhu+ hi yona, a ku: “Leyi i ngati ya ntwanano+ lowu Yehovha a wu endleke na n’wina malunghana ni marito lawa hinkwawo.”  Hiloko Muxe na Aroni, Nadabu na Abihu ni vakulukumba va 70 va Israyele va tlhandluka, 10  kutani va vona Xikwembu xa Israyele.+ Ehansi ka milenge ya xona a ku ri ni leswi a swi vonaka swi fana ni ku tirhiwa ka maribye ya swiphepherhele ya safiri, naswona swi fana ni matilo hi vutengi.+ 11  Kutani a nga tshambulutelanga voko ku lwa ni vavanuna lava hlawulekeke va vana va Israyele,+ kambe va vone xivono xa Xikwembu+ xa ntiyiso naswona va dya va nwa.+ 12  Kutani Yehovha a byela Muxe a ku: “Tlhandlukela eka mina entshaveni u tshama kona, hikuva ndzi lava ku ku nyika swiphepherhele swa maribye ni nawu ni xileriso, leswi ndzi nga ta swi tsala leswaku ndzi va dyondzisa.”+ 13  Hikwalaho Muxe na Yoxuwa mutirheli wakwe va suka va yima, Muxe a tlhandlukela entshaveni ya Xikwembu+ xa ntiyiso. 14  Kambe u byele vakulukumba a ku: “Hi rindzeni endhawini leyi kukondza hi tlhelela eka n’wina.+ Kutani maswivo, Aroni na Huru+ va na n’wina. Mani na mani la nga ni mhaka leyi khumbanaka ni nawu a a ye eka vona.”+ 15  Hikwalaho Muxe a tlhandlukela entshaveni loko papa ra ha funengete ntshava.+ 16  Kutani ku vangama+ ka Yehovha ku hambeta ku tshama ehenhla ka Ntshava ya Sinayi,+ naswona papa ri hambeta ri yi funengeta masiku ya tsevu. Eku heteleleni hi siku ra vunkombo a vitana Muxe a ri exikarhi ka papa.+ 17  Ematihlweni ya vana va Israyele ku vonakala ka ku vangama ka Yehovha a ku fana ni ndzilo+ lowu lovisaka ehenhla ka ntshava. 18  Hiloko Muxe a nghena exikarhi ka papa kutani a tlhandlukela entshaveni.+ Muxe a tshama entshaveni masiku ya 40 ni vusiku+ bya 40.

Tinhlamuselo ta le hansi