Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eksoda 20:1-26

20  Xikwembu xi ya emahlweni xi vulavula marito lawa hinkwawo, xi ku:+  “Hi mina Yehovha Xikwembu+ xa wena, lexi ku humeseke etikweni ra Egipta, u huma endlwini ya mahlonga.+  U nga tshuki u va ni swikwembu+ swimbe emahlweni ka xikandza xa mina.  “U nga tshuki u tiendlela xifaniso lexi vatliweke kumbe xivumbeko lexi fanaka ni xilo xihi ni xihi lexi nga ehenhla ematilweni kumbe lexi nga ehansi emisaveni kumbe ematini ehansi ka misava.+  U nga tshuki u swi nkhinsamela kumbe u yengiwa ku swi tirhela,+ hikuva mina Yehovha Xikwembu xa wena ndzi Xikwembu lexi lavaka ku tinyiketela loku hlawulekeke,+ lexi xupulaka vana hikwalaho ka swidyoho swa vatata wa vona, eka xitukulwana xa vunharhu ni le ka xitukulwana xa vumune, eka lava va ndzi vengaka;+  kambe lexi nga ni musa wa rirhandzu eka xitukulwana xa vugidi eka lava va ndzi rhandzaka, lava va hlayisaka swileriso+ swa mina.  “U nga tshuki u khoma vito ra Yehovha Xikwembu xa wena hi ndlela+ leyi nga pfuniki nchumu, hikuva Yehovha a nge tshiki ku xupula la khomaka vito rakwe hi ndlela+ leyi nga pfuniki nchumu.  “Tsundzuka siku ra savata leswaku u ri hlawulekisa,+  u ta endla ntirho naswona u fanele ku tirha ntirho wa wena hinkwawo hi masiku ya tsevu.+ 10  Kambe siku ra vunkombo i savata ya Yehovha Xikwembu+ xa wena. U nga tshuki u endla ntirho wihi ni wihi, wena kumbe n’wana wa wena wa jaha kumbe wa nhwanyana, hlonga ra wena ra xinuna kumbe ra xisati kumbe xifuwo xa wena kumbe muluveri wa wena la nga endzeni ka tinyangwa+ ta wena. 11  Hikuva hi masiku ya tsevu Yehovha u endle matilo ni misava, lwandle ni hinkwaswo leswi nga eka swona,+ kutani a wisa hi siku ra vunkombo.+ Hi yona mhaka leyi Yehovha a katekiseke siku ra savata naswona a ri hlawulekisa.+ 12  “Xixima tata wa wena ni mana+ wa wena leswaku masiku ya wena ma leha emisaveni leyi Yehovha Xikwembu xa wena a ku nyikaka yona.+ 13  “U nga tshuki u dlaya hi vomu.+ 14  “U nga tshuki u endla vuoswi.+ 15  “U nga tshuki u yiva.+ 16  “U nga tshuki u vula vumbhoni bya vunwa, u va mbhoni leyi kanetanaka ni munhu-kuloni.+ 17  “U nga tshuki u navela yindlu ya munhu-kuloni. U nga tshuki u navela nsati wa munhu-kuloni,+ kumbe hlonga rakwe ra xinuna kumbe ra xisati kumbe nkunzi yakwe kumbe mbhongolo yakwe kumbe xin’wana ni xin’wana lexi nga xa munhu-kuloni.”+ 18  “Vanhu hinkwavo a va vona ku dzindza ni ku vangama ka rihati ni mpfumawulo wa nanga ni ntshava yi huma musi. Loko vanhu va swi vona, hiloko va rhurhumela, va yimela ekule.+ 19  Kutani va byela Muxe va ku: “Wena vulavula na hina, hi yingisa; kambe Xikwembu xi nga vulavuli na hina hikuva hi nga tshuka hi fa.”+ 20  Hiloko Muxe a byela vanhu a ku: “Mi nga chavi, hikuva Xikwembu xa ntiyiso xi tile+ ku ta mi ringa, leswaku mi ta hambeta mi xi chava emahlweni ka swikandza swa n’wina, leswaku mi nga dyohi.”+ 21  Vanhu va hambeta va yimela ekule, kambe Muxe a ya ekusuhi ni papa ra ntima laha Xikwembu xa ntiyiso a xi ri kona.+ 22  Yehovha a ya emahlweni a byela Muxe+ a ku: “U ta byela vana va Israyele u ku, ‘N’wina mi swi vonile leswaku ndzi vulavule na n’wina ndzi ri ematilweni.+ 23  Mi nga tshuki mi endla swikwembu swa silivhere mina ndzi ri kona, naswona mi nga tshuki mi tiendlela+ swikwembu swa nsuku. 24  Mi ta ndzi endlela alitari ya misava,+ mi ta ndzi endlela switlhavelo swa gandzelo ro hisiwa ni switlhavelo swa xinakulobye ehenhla ka yona hi ntlhambi wa n’wina wa tinyimpfu, ni hi ntlhambi wa n’wina wa tihomu.+ Endhawini yin’wana ni yin’wana laha ndzi nga ta endla leswaku vito ra mina ri tsundzukiwa ndzi ta ta eka n’wina, kunene ndzi ta mi katekisa.+ 25  Loko mi ndzi endlela alitari ya maribye, mi nga yi aki hi maribye lama kovotliweke. Nkarhi lowu mi tlakusaka chizele ehenhla ka yona, mi ta yi nyamisa.+ 26  Mi nga tshuki mi tlhandlukela ealitarini ya mina hi swikhandziyo, leswaku swirho swa n’wina swa le xihundleni swi nga tshuki swi vonaka erivaleni ehenhla ka yona.’

Tinhlamuselo ta le hansi