Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eklesiasta 7:1-29

7  Vito ra antswa ku ri ni mafurha lamanene,+ ni siku ra ku fa ku ri ni siku leri munhu a velekiweke ha rona.+  Swa antswa ku ya endlwini ya xirilo ku ri ni ku ya endlwini ya nkhuvo,+ hikuva hilaha vanhu hinkwavo va yaka kona; naswona loyi a hanyaka u fanele a swi nghenisa embilwini yakwe.  Swa antswa ku dyiwa hi mbitsi ku ri ni ku hleka,+ hikuva mbilu ya antswa loko xikandza xi onyanile.+  Mbilu ya lavo tlhariha yi le ndlwini ya ku rila,+ kambe mbilu ya lavo hunguka yi le ndlwini ya ku tsaka.+  Swa antswa ku yingisa ku tshinya ka lowo tlhariha+ ematshan’weni ya ku va munhu a yingisa risimu ra swihunguki.+  Hikuva ku hleka ka xihunguki ku fana ni mpfumawulo wa mitwa ehansi ka mbita;+ leswi na swona i vuhava.  Hikuva ku tshikileriwa ku nga hlanganisa nhloko+ ya lowo tlhariha, naswona nyiko+ yi nga lovisa mbilu.+  Makumu ya mhaka ma antswa ku ri ni masungulo ya yona.+ Wa antswa loyi a lehisaka mbilu ku ri ni loyi moya wakwe wu titlakusaka.+  U nga hatliseli ku hlundzukisiwa+ emoyeni wa wena, hikuva ku khunguvanyisiwa ku tshama exifuveni xa swihunguki.+ 10  U nga vuli u ku: “Swi endlekisa ku yini leswaku masiku yo sungula ma antswa ku tlula lawa?”+ hikuva leswi a wu swi vutisanga hi vutlhari.+ 11  Vutlhari swin’we ni ndzhaka i swinene naswona swa pfuna eka lava va vonaka dyambu.+ 12  Hikuva vutlhari i xisirhelelo+ ku fana nileswi mali yi nga xisirhelelo;+ kambe mpfuno wa vutivi hileswaku vutlhari hi byoxe byi londzovota vini va byona va hanya.+ 13  Vona ntirho+ wa Xikwembu xa ntiyiso, hikuva i mani la kotaka ku ololoxa leswi xi swi gombonyokiseke?+ 14  Hi siku lerinene, tsaka,+ naswona xiya leswaku Xikwembu xa ntiyiso xi endle siku ra khombo ri fana ni lerin’wana,+ hi xikongomelo xa leswaku vanhu va nga swi tivi leswi nga ta humelela eka vona.+ 15  Hinkwaswo ndzi swi vonile emasikwini ya mina ya vuhava.+ Ku ni la lulameke la lovaka eku lulameni kakwe,+ naswona u kona wo homboloka la yaka emahlweni evubihini byakwe.+ 16  U nga vi la lulameke ku tlula mpimo,+ hambi ku ri ku vonakala u tlharihe ku tlurisa.+ Ha yini u fanele u tilovisa?+ 17  U nga vi wo homboloka ku tlula mpimo,+ hambi ku ri ku va xiphukuphuku.+ Ha yini u fanele u fa ku nga si va nkarhi wa wena?+ 18  Swa antswa loko wo khomelela eka lexi, kambe u nga ri susi voko ra wena eka lexin’wana;+ hikuva loyi a chavaka Xikwembu u ta famba na swona haswimbirhi.+ 19  Vutlhari byi ni matimba eka lowo tlhariha ku tlula vavanuna va khume lava nga emutini, lava lawulaka.+ 20  Hikuva a nga kona munhu la lulameke emisaveni la hambetaka a endla leswinene naswona a nga dyohiki.+ 21  Nakambe, u nga nyikeli mbilu ya wena emaritweni hinkwawo lawa vanhu va ma vulavulaka,+ leswaku u nga n’wi twi nandza wa wena loko a ku rhukana.+ 22  Hikuva mbilu ya wena yi swi tiva ko tala leswaku wena, wena n’wini u rhukane van’wana.+ 23  Hinkwaswo leswi ndzi swi kambele hi vutlhari. Ndzi te: “Ndzi ta tlhariha.” Kambe a swi ri ekule na mina.+ 24  Leswi swi veke kona swi le kule swinene naswona swi ente ngopfu. I mani la nga swi kumaka?+ 25  Mina ndzi hundzulukile, ni mbilu ya mina yi hundzulukile,+ leswaku ndzi tiva, ndzi kambisisa ni ku lavisisa vutlhari+ ni xivangelo xa swilo,+ ni ku tiva malunghana ni vuhomboloki bya ku hunguka ni vuphukuphuku bya ku penga;+ 26  naswona a ndzi kambisisa: Ndzi kume leswaku wansati loyi yena hi byakwe a nga tinkoka ta ku hlota naswona mbilu yakwe yi nga mintlhamu ni mavoko yakwe ma nga tinsimbi,+ wa bava swinene ku tlula rifu.+ Munhu hi lonene emahlweni ka Xikwembu xa ntiyiso loko a balekela wansati yoloye, naswona munhu wa dyoha loko a phasiwa hi yena.+ 27  “Waswivo! Ndzi kume leswi,” ku vula muhlengeleti,+ “nchumu lowu tekiweke endzhaku ka wun’wana, leswaku ku kumiwa vuyelo,+ 28  lebyi moya-xiviri wa mina a wu hambeta wu byi lava, kambe a ndzi byi kumanga. Ndzi kume munhu wun’we eka vanhu va gidi,+ kambe exikarhi ka lava hinkwavo, a ndzi n’wi kumanga wansati.+ 29  Waswivo! Ndzi kume leswi ntsena, leswaku Xikwembu xa ntiyiso xi endle vanhu va va vo lulama,+ kambe vona va tilukele mano yo tala.”+

Tinhlamuselo ta le hansi