Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Eklesiasta 5:1-20

5  Rindza milenge+ ya wena nkarhi wun’wana ni wun’wana loko u ya endlwini ya Xikwembu xa ntiyiso; naswona tshinela u yingisa,+ ematshan’weni ya ku nyikela xitlhavelo ku fana ni leswi swihunguki swi endlaka swona,+ hikuva a swi swi tivi leswaku swi endla swo biha.+  U nga hatlisisi nomu wa wena; naswona loko ku ri mbilu+ ya wena, yi nga hatliseli ku humesa rito emahlweni ka Xikwembu xa ntiyiso.+ Hikuva Xikwembu xa ntiyiso xi le matilweni+ kambe wena u le misaveni. Hi yona mhaka leyi marito ya wena ma faneleke ma va matsongo.+  Kunene norho wu fika hikwalaho ka mintirho yo tala,+ ni rito ra xihunguki hikwalaho ka marito yo tala.+  Nkarhi wun’wana ni wun’wana loko u endla xitshembiso lexi hlambanyiweke eka Xikwembu, u nga kanakani ku xi hetisisa,+ hikuva a ku na ku tsaka eka swihunguki.+ Xitshembiso lexi u xi hlambanyeke, xi hetisise.+  Swa antswa leswaku u nga xi endli xitshembiso lexi hlambanyiweke+ ku ri ni ku endla xitshembiso lexi hlambanyiweke kutani u nga xi hetisisi.+  U nga pfumeleli nomu wa wena leswaku wu dyohisa nyama ya wena,+ naswona u nga vuli emahlweni ka ntsumi+ leswaku a ku ri xihoxo.+ Ha yini Xikwembu xa ntiyiso xi fanele xi hlundzuka hikwalaho ka rito ra wena kutani xi boheka ku onha ntirho wa mavoko ya wena?+  Hikuva ku ni milorho+ hikwalaho ka mintirho yo tala, naswona ku ni vuhava ni marito yo tala. Kambe wena chava Xikwembu xa ntiyiso.+  Loko u vona la pfumalaka a tshikileriwa naswona vuavanyisi+ ni ku lulama swi susiwa hi ndlela yo homboloka emugangeni lowu lawuriwaka hi hosi, u nga hlamarisiwi hi mhaka yoleyo,+ hikuva loyi a tlakukeke ngopfu ku tlula la tlakukeke+ wa swi vona,+ naswona ku ni lava tlakukeke ehenhla ka vona.  Naswona mpindzulo wa misava wu le ka vona hinkwavo;+ hikuva ku tirheliwe hosi hikwalaho ka nsimu.+ 10  La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo.+ Leswi na swona i vuhava.+ 11  Loko swilo leswinene swi tala, lava va swi dyaka va tala hakunene.+ N’wini wa swona lonkulu u pfuneka ha yini, loko ku nga ri ku swi languta hi mahlo?+ 12  Bya nandziha vurhongo+ bya loyi a tirhelaka un’wana, ku nga khathariseki leswaku u dya leswitsongo kumbe swo tala; kambe swo tala swa loyi a fuweke a swi n’wi pfumeleli leswaku a etlela. 13  Ku ni khombo ro chavisa leri ndzi ri voneke ehansi ka dyambu: rifuwo ri hlayiseriwa n’wini wa rona lonkulu leswaku a weriwa hi khombo.+ 14  Rifuwo rero ri lovile+ hikwalaho ka ntirho lowu nga ni khombo, naswona u ve tatana wa n’wana hi nkarhi lowu a a nga ri na nchumu nikatsongo evokweni rakwe.+ 15  Leswi munhu a humiseke xiswona ekhwirini ra mana wakwe, u ta tlhela a fambisa xiswona a nga ri na nchumu;+ naswona a ku na nchumu niwutsongo lowu munhu a nga wu tekaka+ hikwalaho ka ntirho wakwe wa matimba, lowu a nga fambaka na wona a wu khome hi voko. 16  Leswi na swona i khombo ro chavisa: leswi munhu a tiseke xiswona, u ta fambisa xiswona; naswona wu kwihi mpindzulo wa loyi a tirhaka hi matimba a tirhela mheho?+ 17  Nakambe, emasikwini ya yena hinkwawo, u dya a ri emunyameni, a ri ni mbitsi ngopfu,+ a ri karhi a vabya naswona a hlundzukile. 18  Waswivo! Xilo lexinene lexi ndzi xi voneke, xo saseka, hileswaku munhu u fanele a dya, a nwa ni ku vona leswinene entirhweni wakwe hinkwawo wa matimba+ lowu a tikarhatelaka wona ehansi ka dyambu ku ringana nhlayo ya masiku yakwe ya vutomi lawa Xikwembu xa ntiyiso xi n’wi nyikeke wona, hikuva xexo i xiavelo xakwe. 19  Nakambe, munhu un’wana ni un’wana loyi Xikwembu xa ntiyiso xi n’wi nyikeke rifuwo ni swilo leswi vonakaka,+ xi tlhele xi n’wi pfumelela leswaku a swi dya,+ a teka xiphemu xakwe ni ku tsaka hi ku tikarhata kakwe.+ Leyi i nyiko ya Xikwembu.+ 20  Hikuva a nge he tshameli ku ma tsundzuka masiku ya vutomi byakwe, hikuva Xikwembu xa ntiyiso xa n’wi rivata hi ku tsaka ka mbilu yakwe.+

Tinhlamuselo ta le hansi